Ibrani 2:17 - Kaili Ledo

¹⁷ Haitu sampe Ia kana najadi nasimbayu ntoto ante kita sampesuvu-sampesuvuNa. Ane Ia nasimbayu ntoto nte kita, Ia namala majadi Pakeni nTopanggeni Pesomba anu naasi mataNa nanggita todeaNa bo natutu nombatui pokarajaa nidekei nu Alatala ka Ia, sampe dosa manusia namala nisompo.

Ibrani 2:17 Referans Kwoze

Ibrani 4:14

Jadi nariamo Pakeni nTopanggeni Pesomba anu naoge mpuu, Iamo i Yesus, Ana nu Alatala. Ia noliu ri langi bo nesua ri suruga ri ngayo nu Alatala ala mantulungi kita. Jadi kita kana maroo momparasaya bo nee menonto mangaku i Yesusmo Tuputa.

Ibrani 2:14

Kita anu niuli i Yesus ana-ana, aga manusia biasa anu mamate. Jadi haitu sampe i Yesus muni najadi manusia bo nombarasai pura-pura anu nirasaita. Ia najadi manusia ala Ia mamala mamate mompakaropu kuasa Magau nu Seta anu nombakuasai kamatea.

Ibrani 7:26

Jadi i Yesusmo Pakeni nTopanggeni Pesomba anu nompakule nombatulungi kita. Ia nagasa, ledo ntoto ria salaNa atau dosaNa. Ia nitaniaka lako ri tona nadosa, bo Ia nioretaka sampe ri ponturo nalangapa pade pura-pura anu naria ri langi, haitumo ri suruga.

Roma 5:10

Bara ipia, tempo kita da nangeva Alatala, nidekeiNa AnaNa mamate mombasambei kita, ala kita rapoposinggabelo mpanjili ante Ia. Sii-sii kita nosinggabelomo ante Alatala, jadi natantumo kita rapakasalama lako ri pehuku bara maipia, sabana i Kristus bate-batena natuvu.

Ibrani 2:11

I Yesus nompegasa katuvuta nadosa. Kita anu nipegasaNa bo Ia anu nompegasa kita nosangu Tuama. Haitu sampe i Yesus ledo naeya mataNa nanguli kita sampesuvuNa.

Ibrani 3:5

Ane Nabi Musa, ia natutu nokarajaa ka Alatala nantulungi todeaNa, nasimbayu mpo potudua nombatulungi riara banua nu tuana. Pura-pura anu nipovia i Musa nogambara anu rapopaisani nu Alatala ri tempo makava.

Kolose 1:21

Bara ipia komiu muni natuvu nantubengosi Alatala. Komiu nangeva Alatala sabana pekirimiu bo pokainggumiu nadaa.

Ibrani 7:28

Nangoseaka Atura-atura agama Yahudi, tona nalente bo nadosa nianggataka najadi Pakeni nTopanggeni Pesomba, apa ira aga manusia biasa. Tapi naliu Atura-atura haitu, Alatala nojanji ante sumpa, bo nangoseaka pojanji haitu, nianggatakaNa AnaNa mboto majadi Pakeni nTopanggeni Pesomba. Bo AnaNa haitu nipajadi Topetolo anu ledo nakura nuapa-nuapa sampe ri kasae-saena.

Efesus 2:16

Lako ri kamateNa ri kayu salib, i Kristus nompopakasangu toYahudi bo tona ledo toYahudi, bo nompoposinggabelo pura-pura kita nte Alatala bo nompakaupu pura-pura posievata.

Roma 15:17

Jadi yaku nadamba nompekirika pokarajaa nituiku ka Alatala, sabana yaku nosangu rara ante i Yesus Kristus.

Ibrani 3:2

Ia natutu novia anu nipakatantu nu Alatala ka Ia nasimbayu mpo Nabi Musa natutu nokarajaa nantulungi todea nu Alatala, anu nirapaka banua nu Alatala.

Ibrani 2:16

Natantumo ledo malaeka nitulungiNa, aga kita muli i Abraham.

Ibrani 3:1

Jadi, sampesuvu-sampesuvuku anu nipelisi nu Alatala bo nipokioNa matuvu mabelo ri suruga. Pekirimo pakabelo-belo i Yesus hitu. Ia nisuro nu Alatala najadi Pakeni nTopanggeni Pesomba ri agama nioseakata.

Ibrani 4:15

Ia Pakeni nTopanggeni Pesomba anu nangisani kalenteta, sabana Ia mboto nombarasai mpengaya pesori nasimbayu mpo kita, tapi Ia ledo novia dosa.

Ibrani 5:1

Pura-pura Pakeni nTopanggeni Pesomba nipelisi lako nte todea bo nianggataka manjambei todea mantingayo Alatala. Pokarajaara haitu, manggeni pedekei-pedekei ka Alatala bo pesomba-pesomba anu majadi posompo dosa.

Ibrani 5:2

Pakeni-pakeni nTopanggeni Pesomba aga manusia muni bo nadea kalentera. Haitumo sabana nalusu rarara nantulungi tona nadoyo bo nasalandala.

Ibrani 5:5

Ivesia muni i Kristus. Ledo nianggatakaNa mboto karoNa majadi Pakeni nTopanggeni Pesomba anu nibila. Tapi Ia nipelisi bo nianggataka nu Alatala. Alatala nanguli ivei: “Ikomo AnaKu, apa eo hitu Yaku najadi TuamaMu.” Mazmur 2:7

Ibrani 5:10

Bo Ia nianggataka nu Alatala najadi Pakeni nTopanggeni Pesomba nasimbayu mpo i Melkisedek, Pakeni nTopanggeni Pesomba nggaulu.

Ibrani 6:20

Ia nokolu nesua hamai mompakasadia dala ka kita. Ia nianggataka najadi Pakeni nTopanggeni Pesomba sampe ri kasae-saena, nasimbayu mpo i Melkisedek.

Ibrani 8:1

Patuju ntesaku pangane ivei: Naria mamimo Pakeni nTopanggeni Pesomba ivehaitu nte kita. Ia nonturo ri suruga ri panggana nu Alatala anu Neliu KaogeNa.

Ibrani 8:3

Pura-pura Pakeni nTopanggeni Pesomba nianggataka ala manggeni pedekei bo pesomba ka Alatala. Jadi i Yesus muni paraluu maria pesomba rakeniNa ka Alatala.

Ibrani 9:11

Tapi i Kristus nakava mpo Pakeni nTopanggeni Pesomba anu nanggeni kabelona nirasaita mamimo. Ia noliu riara Tenda nTupu anu nelabi kaogena bo nelabi kabelona pade Tenda nTupu ri dunia hitu, bo nesua ri Tombi Nelabi Kagasana ri suruga. Tenda nTupu ri suruga haitu ledo nipovia mpale manusia, batuana, ledo nopuna lako ri dunia hitu. Tempo i Kristus nesua ri Tenda haitu aga sanggani sampe ri kasae-saena. Ia ledo nanggeni raa ntovau lakina atau raa ana japi rapesombaNa, tapi raaNa mboto nikeniNa. Ivesiamo Ia nombakabasaka kita lako ri dosata sampe ri kasae-saena.

Ibrani 10:21

Bo Ia najadi Pakeni nTopanggeni Pesomba anu nanggeniaka todea nu Alatala.