Ibrani 13:16 - Kaili Ledo

¹⁶ Bo nee rakalingasita mositulungi bo movia anu nabelo, sabana haitu muni nireke pesombata anu nompakadamba rara nu Alatala.

Ibrani 13:16 Referans Kwoze

2 Tesalonika 3:13

Tapi komiu sampesuvu-sampesuvu, nee masau raramiu movia anu nabelo.

Roma 12:13

Tulungimo roa sampomparasaya anu napepa, bo tarimamo torata riara banuamiu.

Galatia 6:10

Jadi tempo da naria loga kita kana movia anu nabelo ka pura-pura tona, nelabipa ka sampesuvuta sampomparasaya.

Ibrani 6:10

Alatala ledo natenggo raraNa, Ia ledo malinga raraNa ante poviamiu bo pepotovemiu. Nipopakitamiu tovemiu ka Ia tempo komiu nombatulungi sampesuvumiu sampomparasaya, nompamula lako ri nggauluname sampe sii-sii.

1 Timotius 6:18

Popatoramo tona nakalumana, mokainggu mabelo ala pokainggura nabelo haitu majadi kakalumanara. Ira kana majoi rara bo masadia mombatulungi tona ntanina.

Filipi 4:18

Jadi, ala rasanimiu, nitarimaku puramo pedekei nipakatumiu, bo nelabi-labi! Pura-pura pedekei nipakatumiu nitarimakumo lako nte i Epafroditus. Sii-sii nagana puramo anu niparaluuku. Pedekeimiu haitu nasimbayu mpo pesomba navangi, anu nitarima nu Alatala bo nipodamba raraNa.

Efesus 4:28

Topangangga kana menonto mangangga. Ira kana mokarajaa ante palera mboto mompaelo katuvura ala mamala ira mantulungi tona ntanina napepa.

1 Tesalonika 5:15

Jagaimo ala ledo maria komiu mombabalasi pokainggu nadaa ante anu nadaa. Komiu kana masaro mompasimbuku movia anu nabelo ka roa-roamiu bo ka tona ntanina muni.

Suro-Suro 10:38

Nisanimiu muni Alatala nompelisi i Yesus toNazaret bo nidekeiNa Nosa Gasa bo kuasa. Nisanimiu muni i Yesus hau ri umba-umba novia anu nabelo, bo nipakabeloNa pura-pura tona nipandasa Magau nu Seta sabana Alatala naria nte Ia.

Lukas 18:22

Nangepe haitu, nangulimo i Yesus ka ia, “Da naria sangayapa kana mupovia. Pobalu pura-pura kakalumanamu bo dekei alina haitu ka tona napakasi ala mukava kakalumana ri suruga. Maupu sia, oseakamo Yaku!”

3 Yohanes 1:11

Vegaku, nee mupasiala pokainggu nadaa, tapi pasialamo pokainggu nabelo. Isema-sema novia anu nabelo, iramo ana-ana nu Alatala. Tapi isema-sema novia anu nadaa, ledo ntoto nosisani nte Alatala.

Galatia 6:6

Tona nipatudukika Tesa nu Alatala masipato mantulungi topompatuduki ia, bo mombabagi ka ia nuapa-nuapa nabelo naria nte ia.

Filemon 1:6

Kita nosangu rara nte topomparasaya ntanina sabana pomparasayata i Yesus. Yaku nosambaya ala posangu raramu nte topomparasaya ntanina, manggeni iko mpuu-mpuu mombapaha mpengaya-ngaya belo naria nte kita anu nosangu rara nte i Kristus.

Filipi 4:14

Naupa ivesia, nitulungimiu yaku riara kasusaku ri sii bo anu nipoviamiu haitu nabelo.

Suro-Suro 9:36

Napara ngata Lida naria ngata ntanina nosanga Yope. Ri ngata Yope naria saito mombine topangoseaka i Yesus, sangana i Tabita. (Riara basa Yunani sangana i Dorkas, batuana “rusa”.) Pokaingguna nabelo, bo ia nasaro nantulungi tona napakasi.