Filipi 2:20 - Kaili Ledo

²⁰ Kutudu ia sabana ledo ria roaku ntanina ri sii nosangu pekiri nte yaku bo mpuu-mpuu nompekirika kabelomiu.

Filipi 2:20 Referans Kwoze

Filipi 2:2

Sabana haitu, kuperapi komiu mpuu-mpuu mompakadamba raraku ivei: matuvu mosimpotove, mosangu rara, mosangu pekiri bo mosangu patuju.

Filipi 2:22

Nisanimiu mbotomo i Timotius namala raparasaya. Ia nokarajaa ntamo nosanggani-nggani ante yaku nompatolele Kareba Belo nasimbayu mpo ngana nantulungi tuamana.

1 Korintus 16:10

Ane makava ri situ i Timotius, tarimamiu mabelo ia ala matinda rarana monturo nte komiu, apa ia muni nantui pokarajaa i Pue Yesus nasimbayu mpo yaku.

Yohanes 12:6

Kakanana ledo tona napakasi nitora i Yudas, tapi aga karona mboto apa ia topelea. Iamo anaguru anu niparasaya nombaboli doira, bo sanggani-sanggani nipeleana doi haitu. Haitu sampe niulina ivesia.

Yohanes 10:13

Tona nigaji haitu mangova malai sabana ia aga nigaji. Ledo rapotovena bimba-bimba haitu.

2 Timotius 1:5

Yaku nosukuru nte Alatala apa nitoraku iko nomparasaya i Yesus nte mpuu-mpuu raramu. Tupumu mombine i Lois, bo tinamu, i Eunike anu nokolu nomparasaya. Bo nisaniku pomparasayamu nasimbayu nte pomparasayara.

Kolose 4:11

Tabe muni lako nte i Yesus anu nidae i Yustus. Lako ri pura-pura toYahudi anu nomparasaya i Kristus, aga ira tatalu nokajaraa nte yaku sii-sii nangelo tona majadi todea ri Poparenta nu Alatala. Ira mpuu-mpuu nantulungi yaku.

Roma 15:5

Alatala anu nompakaroso rarata bo nompakatetida rarata tempo kita nombarasai kasusa. Sia sampe kuperapi Alatala mombatulungi komiu matuvu mosinggabelo nte roa riara pangoseakamiu i Yesus Kristus,

1 Timotius 4:6

Ane mupatuduki pura-pura haitu pangane ka sampesuvuta sampomparasaya, iko majadi topokarajaa nabelo ka i Yesus Kristus. Bo iko mompakaroso raramu mboto ante Tesa nu Alatala anu niparasayata, bo ante pepatuduki nakana anu nioseakamu sampe sii-sii.

2 Timotius 3:10

Tapi, Timotius, nisanimumo yaku ledo nasimbayu nte tona pangane. Nipariaramumo pepatudukiku, nipasialamumo pokaingguku bo patuju katuvuku. Nisanimumo pomparasayaku, posabaraku, pepotoveku bo pantidamakaku riara kasusa.