Efesus 6:19 - Kaili Ledo

¹⁹ Bo posambayaka muni yaku ala tempo yaku motesa, Alatala mombadekei ka yaku tesa-tesa masipato, bo nau bara nuapa majadi, yaku mabia mompatolele Kareba Belo anu ledo nisani ntona nggaulu.

Efesus 6:19 Referans Kwoze

Kolose 4:3

Posambayaka muni kami ala Alatala mombadekei loga nabelo ka kami mompatolele karebaNa anu notesaki niaNa anu nipakadupa i Kristus. NiaNa haitu da nitabuniaka bara ipia, tapi sii-sii nipatolelekumo kareba i Kristus haitu. Bo sii-sii yaku nitarunggu sabana pokarajaaku nompatolele kareba haitu.

Suro-Suro 4:29

Pue, epemo tesara nomparangga kami. Kami batuaMiu, bo kami merapi tulungi nte Komiu ala kami ledo maeka mompatolele tesaMiu.

2 Tesalonika 3:1

Kapolana, sampesuvu-sampesuvu, posambayakamo kami. Perapi nte Alatala ala TesaNa masalisa matolele bo ratarima mabelo, mpo anu najadi nte komiu bara ipia.

1 Tesalonika 5:25

Sampesuvu-sampesuvu, tulungi posambayaka kami.

Ibrani 13:18

Sampesuvu-sampesuvu, posambayakamo kami. Nisani kami, rara ntai kami nagasa apa kami batena madota mokainggu nabelo riara mpengaya-ngaya.

Suro-Suro 4:31

Naupu ira nosambaya, banua nikasiromura haitu nogoya. Ira pura-pura nikuasai nu Nosa Gasa nu Alatala, bo nipatolelera tesa nu Alatala bo domo ntoto naeka rarara.

1 Tesalonika 2:2

Dopame kami nakava ri ngatamiu, kami mpuu-mpuu nipandasa bo nipakadaa ntona ri ngata Filipi. Nisanimiumo tesana. Nau nadea tona nangeva kami, tapi Tuputa nompakaroso rara kami ala kami ledo maeka mompatolele Kareba BeloNa ka komiu ri ngata Tesalonika.

2 Korintus 8:7

Sampesuvu-sampesuvu, nabelo pura anu nipoviamiu. Pomparasayamiu mpuu-mpuu naroso. Napande mpuu komiu notesa. Nisanimiu pepatuduki nakana, naoge raramiu nombatulungi tona ntanina, bo naoge mpuu pompotovemiu kami. Jadi ivesia muni mabelo rapasimbukumiu mombatulungi tona napakasi.

Efesus 1:9

Alatala nompopaisani ka kita niaNa anu dopa nisani nu manusia bara ipia. Nangoseaka dotaNa mboto, Alatala nompakatantu lako ri nggauluname ala niaNa haitu rapakadupa i Kristus

1 Korintus 4:1

Jadi kami pakenimiu kana rarekemiu batua i Kristus. Kami hii niparasayaka nu Alatala mompatolele tesaNa anu dopa nisani ntodea ri dunia.

Suro-Suro 28:31

Ledo nakaja rarana nompopaisani ka ira kareba Poparenta nu Alatala bo nipatudukina muni ka ira kareba i Pue Yesus Kristus. Pura-pura anu nipoviana haitu ledo naria nitagi ntona.

Suro-Suro 19:8

Talu-mbula kasaena i Paulus hau njuu ri banua petupu ntoYahudi ri ngata haitu. Ledo nakaja rarana nombatesa Poparenta nu Alatala bo nosinjula pekiri nte ira. Dotana ala ira momparasaya i Yesus.

Suro-Suro 13:46

Tapi i Paulus bo i Barnabas aga nantambai kabiara notesa ka ira ivei: “Masipato Tesa nu Alatala rapasimbayu ntani ruru ka komiu toYahudi. Tapi nipoaramiu tesa haitu. Nipakalantomiu mboto komiu ledo masipato manggava katuvu nabelo sampe ri kasae-saena. Sabana haitu, kami domo mompatolele tesa haitu ka komiu toYahudi! Hitupa kami hau nte tona ledo toYahudi,

Filemon 1:22

Naria vai sangupa kuperapi nte iko, tulungi pakasadia ka yaku ponturo ri banuamu, sabana nisarumakaku posambayamiu pura-pura raepe nu Alatala bo yaku rakabasaka lako ri tarunggu bo mamala mosinggava vai nte iko.

Kolose 2:2

Yaku nompasimbuku ala raramiu pura-pura rapakaroso bo komiu mosangu rara bo mosimpotove. Apa ane ivesia, pomparasayamiu mpuu-mpuu maroso bo komiu ledo molengga-lengga sabana nisanimiumo anu nakana. Jadi komiu mosisani belo nte i Kristus, Iamo poko nia nu Alatala, nia anu nitabuniaka lako ri nggauluname.

2 Korintus 3:12

Kami nanjarumaka pojanji nu Alatala anu nabaru, anu ledo mabali-bali. Haitumo sampe kami nabia mpuu nompatolele Kareba Belo.

1 Korintus 1:5

Katuvumiu nipakasugiNa riara mpengaya-ngaya sabana komiu nosangu rara ante i Yesus Kristus. NidekeiNa ka komiu kapande notesa bo mpengaya-ngaya pangisani nabelo.

Suro-Suro 14:3

I Paulus bo Barnabas nasae nonturo ri sia. Ledo naeka ira notesa i Pue Yesus ka tona. Nitesara pepotoveNa bo kabelo raraNa bo i Pue nombadekei kuasa ka ira movia kabaraka-kabaraka bo tanda-tanda nipokumaaka ala rasani ntodea tesa nu suro-suro haitu mpuu-mpuu nakana.

Suro-Suro 9:27

Jadi i Barnabas hau nombatulungi i Saulus. Nikenina ia hau motesa nte suro-suro. I Barnabas notesa ka ira berimba i Saulus nanggita i Pue Yesus ri tatanga nu dala, bo i Pue notesa ka ia. Nitesana muni kabia i Saulus nompatolele kareba i Yesus ka tona ri ngata Damsyik.

1 Timotius 3:16

Nabelo mpuu pepatuduki nakana niparasayata, anu dopa nisani ntona nggaulu tapi sii-sii nipopaisani nu Alatala ka kita ivei: Ia najadi manusia bo Nosa Gasa nosabiki Ia mpuu-mpuu tona nipelisi nu Alatala. Ia nikita nu malaeka nu Alatala bo karebaNa nipatolele ka tona dopa nosisani nte Alatala. Ia niparasaya ntona ri umba-umba ri dunia bo Ia nianggataka hau ri suruga.

2 Korintus 7:4

Ledo nakaja raraku notesa pakalanto ka komiu. Nadamba mpuumo raraku nantora komiu. Nau nadeamo susa bo pari nambela kami, hitupa narosomo raraku bo nelabi kadamba raraku nantora komiu.

2 Korintus 1:11

Nisani kami ane komiu muni mantulungi mosambayaka kami, Alatala bate-batena mompakasalama kami riara kasusa. RadekeiNa belo ka kami sabana madea tona mosambaya ka kami. Bo madea tona manguli tarima kasi ka Ia ane rakitara nipoiyoNa pomperapira ka kami.

1 Korintus 2:7

Kapande nipatolele kami, iamo kapande lako nte Alatala. Kapande haitu ledo nisani ntona ri dunia. Tapi dopame dunia nipajadi, Alatala nonia mamimo mompopaisani kapandeNa haitu ka kita sii-sii. Haitu nipoviaNa ala manggeni belo ka kita.

Roma 15:30

Sampesuvu-sampesuvu, kita nosangu rara ante Tuputa Yesus Kristus bo kita nosimpotove sabana pokarajaa Nosa Gasa riara ntaita. Sabana haitu, kuperapi nte komiu, pekakaimo mpuu-mpuu nte Alatala mosanggani-nggani ante yaku, mosambaya ka yaku.

Suro-Suro 18:26

Ledo naeka rara i Apolos notesa ri banua petupu ntoYahudi. Tempo i Priskila bo i Akwila nangepe ia, nikeniramo ia hau ri banuara. Bo ri sia nitesakara pakalanto nia nu Alatala mompakasalama manusia sabana anu nipovia i Yesus.

Suro-Suro 4:13

Topolibu haitu nokumaa pura-pura nanggita kabia i Petrus bo i Yohanes notesa, nemopa nisanira randua suro haitu aga tona biasa anu ledo nosikola nalanga. Lako rahaitu nisanira mpuumo randua suro haitu nosamporoa nte i Yesus bara ipia.

Suro-Suro 2:4

Ira pura-pura nikuasai Nosa Gasa nu Alatala bo nompamulamo notesa ante mpengaya basa ntanina nisovadakara nangoseaka anu nidekei nu Nosa Gasa ka ira.

Suro-Suro 9:29

Bo nitesana muni ka toYahudi anu nobasa Yunani bo nosinjanai nte ira. Tapi ira aga nompasimbuku mompatesi ia.

Roma 16:25

Ratoiyata Alatala! Ia nakuasa mompakaroso pomparasayamiu mpo niuli ri Kareba Belo nipatoleleku, haitumo kareba i Yesus Kristus. Kareba i Kristus haitumo nia nu Alatala anu nitabuniakaNa lako ri lamba pamulana.

2 Korintus 6:11

Sampesuvu-sampesuvu ri Korintus, nitesa kami isi rara kami ka komiu. Ledo nitabuniaka kami pepotove kami ka komiu. Kami mpuu-mpuu nompotove komiu.

Efesus 3:9

Yaku nidekeika pokarajaa muni mompopaisani ka pura-pura tona berimba Alatala nompakadupa niaNa, haitumo, niaNa mompopakasangu toYahudi bo tona ledo toYahudi lako ri posangu rarara nte i Kristus. Lako ri lamba pamulana, Alatala Topompajadi dunia hitu dopa nompopaisani niaNa haitu.