Efesus 3:16 - Kaili Ledo

¹⁶ Naoge mpuu kuasa bo kabelo nu Alatala! Jadi kuperapi ala Ia mpuu-mpuu mompakaroso rara ntaimiu ante Nosa GasaNa

Efesus 3:16 Referans Kwoze

Kolose 1:11

Kami nerapi ala Alatala mompakaroso raramiu ante pura-pura kuasaNa, nangoseaka barakaNa anu naoge mpuu, ala rapakulemiu mosabara nau bara nuapa majadi bo ledo molengga-lengga raramiu.

Filipi 4:13

Nipakuleku nantingayo nuapa-nuapa ante petulungi i Yesus Kristus anu nompakaroso yaku.

2 Timotius 4:17

Tapi i Pue Yesus nantulungi yaku, bo Ia nompakaroso yaku sampe nipakuleku nompatolele pura-pura Kareba Belo ka pura-pura tona anu ledo toYahudi ri sii. Kaupuna yaku nikabasaka lako ri kuasa ntona madota mompatesi yaku.

2 Korintus 4:16

Jadi haitu sampe ledo naupu rara kami. Nau karo kami nantambai kalentena, tapi eo-eo rara kami nantambai karosona.

Efesus 6:10

Kaupuna, komiu kana maroso ante kuasa nitarimamiu lako ri kuasa nTupu anu nabaraka, apa komiu nosangu rara ante Ia.

2 Korintus 12:9

Tapi niuliNa ka yaku, “Nemo. Nipotoveku iko, bo haitu naganamo ka iko. Apa ane nalente iko, kuasaKu malanto mpuumo riara nggatuvumu.” Jadi, haitumo sampe yaku nadamba nangoe anu nompopakita kalenteku, apa ane yaku nalente, kuasa i Kristus nokarajaa riara ntaiku.

Filipi 4:19

Alatala nisombaku mompakagana ka komiu pura-pura anu niparaluumiu lako ri kakalumanaNa anu naoge mpuu, sabana anu nipovia i Yesus Kristus.

Roma 7:22

Pekiri riara ntaiku, nipokonoku atura nu Alatala.

1 Korintus 16:13

Komiu kana mainga bo nee menonto momparasaya i Kristus. Komiu kana maroso bo nee maeka ka nuapa-nuapa.

Roma 9:23

Ia nosabara nte ira ala mompopakita kambaso nu kaogeNa ka kita anu nipoasiNa bo nipasadiaNa mami lako ri nggauluname manggava bagia ri kaogeNa.

Kolose 1:27

Apa dota nu Alatala ala rasani ntodeaNa kabelo bo kaoge niaNa ka pura-pura manusia. NiaNa haitumo: i Kristus natuvu riara ntaita, jadi nisanita kita mpuu-mpuu matuvu mabelo nte Alatala sampe ri kasae-saena.

Efesus 3:8

Yaku natueipa pade pura-pura todea nu Alatala ntanina. Tapi naupa ivesia, Alatala nabelo mpuu nte yaku bo nidekeiNa ka yaku pokarajaa mompatolele Kareba Belo ka komiu tona ledo toYahudi. Kareba haitu notesaki kabelo i Kristus anu naoge mpuu, ledo rapakuleta mombarekena.

Efesus 1:18

Kuperapi ala Ia mompakareme pekirimiu ala mpuu-mpuu rasanimiu kabelo anu nisarumakata lako nte Alatala anu nompokio kita majadi todeaNa. Kuperapi ala rasanimiu kabelo bo kaoge nu belo nipakasadia nu Alatala radekei ka todeaNa bara maipia.

Matius 6:13

Nee rapalamba kami rapesori bo kabasakamo kami lako ri kuasa Magau nu Seta. [Sabana Komiumo Magau nakuasa bo nipokumaaka sampe ri kasae-saena. Amin.]

Efesus 1:7

Kita nikabasaka lako ri pehuku nu dosa sabana raa kamate i Kristus bo posangu rarata nte Ia. Dosata niampungi nu Alatala sabana toveNa anu nelabi kaogena.

Ibrani 11:34

Sanu ira nompepaya apu narega mpuu, bo nadea ngganimo ira nikabasaka lako ri tona nasadia mombatimbe ira. Tempo ira nalente, nipakaroso mpanjili. Ira najadi naroso riara posieva sampe nipakulera nombadagi tantara-tantara ntosangatana.

1 Petrus 3:4

Tapi kagayamiu kana mopuna lako riara ntaimiu, haitumo lako ri inggumiu nalusu bo natinonto. Haitumo kagayana anu ledo ntoto malipo bo noali mpuu ri panggita nu Alatala.

Efesus 2:7

Alatala novia ivesia ala ri tempo makava bo sampe ri kasae-saena, manusia manggita kaoge nu toveNa bo kabelo nu raraNa anu ledo ria kasimbayuna. ToveNa bo kabelo raraNa haitu nipopakitaNa ka kita ante anu nipovia i Yesus Kristus.

Roma 2:29

Tapi toYahudi anu mpuu-mpuu todea nu Alatala, haitumo tona mpuu-mpuu rarana nangoseaka Alatala. Bo tona mpuu-mpuu nisuna, nisuna riara ntaira. Batuana, ira najadi todea nu Alatala sabana pokarajaa Nosa Gasa nu Alatala riara ntaira, ledo sabana pangoseakara atura-atura nitulisi. Tona ivehaitu ratoiya nu Alatala, nau ledo nitoiya nu manusia.

Efesus 3:15

Iamo Tuama nu pura-pura anu naria, nau kita ri dunia, nau isi suruga.

Kolose 2:2

Yaku nompasimbuku ala raramiu pura-pura rapakaroso bo komiu mosangu rara bo mosimpotove. Apa ane ivesia, pomparasayamiu mpuu-mpuu maroso bo komiu ledo molengga-lengga sabana nisanimiumo anu nakana. Jadi komiu mosisani belo nte i Kristus, Iamo poko nia nu Alatala, nia anu nitabuniaka lako ri nggauluname.