2 Korintus 7:1 - Kaili Ledo

¹ Sampesuvu-sampesuvu nipotoveku. Pura-pura janji nu Alatala haitu nipambela ka kita. Jadi kita kana mombakabasaka pura-pura pokainggu bo pekiri nadaa. Kita kana mangoseaka Alatala ante rarata mpuu-mpuu, bo kana maeka movia anu ledo rapokonoNa.

2 Korintus 7:1 Referans Kwoze

1 Tesalonika 4:7

Kita nipokio nu Alatala ledo matuvu mabuga, tapi nipokioNa matuvu magasa ante pokainggu anu mompakadamba raraNa.

1 Petrus 2:11

Sampesuvu-sampesuvu nipotoveku, katuvuta ri dunia hitu nasimbayu mpo topesovo bo torata anu nonturo aga sampalai. Jadi yaku mpuu-mpuu nerapi nte komiu, nee raoseakamiu dota rara nadaa anu batena nangeva nyawamiu nangoseaka dota nu Alatala.

Yakobus 4:8

Pekitulungimo nte Alatala bo Alatala mpuu-mpuu mombatulungi komiu. Komiu topovia dosa, tumo movia dosa. Komiu toporompenga pekiri, pakasangumo pekirimiu mangoseaka Alatala.

1 Yohanes 3:3

Isema-sema manjarumaka majadi masimbayu mpo i Kristus, ia kana mombajagai pokaingguna ala katuvuna mpuu-mpuu magasa masimbayu mpo katuvu i Kristus.

1 Tesalonika 5:23

Kuperapi nte Alatala, topombadekei katuvua nabelo ka kita, ala Ia mboto mompakagasa katuvumiu sampe komiu mpuu-mpuu matuvu mpo todeaNa nagasa. Kuperapi Alatala mombajagai karomiu, rara ntaimiu, bo pekirimiu sampe ledo ntoto maria nuapa-nuapa rasalai tempo Tuputa Yesus Kristus makava mpanjili.

1 Petrus 1:22

Sampesuvu-sampesuvu, katuvumiu nipakagasamiu sabana komiu nangoseaka pepatuduki nakana. Haitumo sampe komiu namala nompotove sampesuvumiu sampomparasaya ante rara naliangu. Sabana haitu, posipotovemo ante rara mpuu-mpuu.

1 Korintus 6:20

Komiu nitolosi nu Alatala bo nibayariNa pakaupumo. Haitumo sabana komiu masipato matuvu ante pokainggu nabelo ala Alatala rabila.

1 Yohanes 1:7

Tapi ane kita natuvu riara reme nasimbayu mpo Alatala naria riara nu reme, kita natuvu nosangu rara nte roa, bo Alatala mombalelaka pura-pura dosata sabana raa nu AnaNa i Yesus anu namate ala dosata mamala raampungi.

Ibrani 4:1

Sampesuvu-sampesuvu, da naria pojanji nu Alatala nombadekei loga ka kita menonto mosanggani-nggani ante Ia. Haitu sampe kita kana mainga ala nee maria saitoa kita maboli.

Matius 5:48

Jadi komiu kana mokainggu mabelo ante mpuu-mpuu raramiu, nasimbayu eva pokainggu nu Alatala, Tuamata ri suruga.”

Matius 5:8

Nabelo mpuumo tona nagasa bo naliangu rarana, sabana iamo manggita Alatala.

1 Yohanes 1:9

Tapi ane kita mombanoa dosa-dosata ri ngayo nu Alatala, raampungiNa dosata bo rapakagasaNa rarata lako ri pura-pura anu nadaa. Apa ivesia nijanjiNa ka kita bo Ia namala rasarumaka mompakadupa pojanjiNa, bo movia anu nanoa.

Efesus 2:3

Bara ipia kita pura-pura nokainggu nasimbayu mpo tona haitu; kita muni natuvu nangoseaka mpengaya-ngaya dota rarata nadaa. Kita aga novia anu nompakasana karota bo pekiri rara ntaita nadaa. Kakanana kita masipato rapambela pehuku nu Alatala sabana pokaingguta haitu. Kita nasimbayu mpo tona ntanina nadaa.

Roma 5:20

Atura agama nidekei nu Alatala ala mantambai kadea dosa nipovia nu manusia. Tapi nau dosa manusia nantambai kadeana, pepotove nu Alatala naogepa.

1 Petrus 5:10

Komiu kana mombarasai susa, tapi ledo masae. Maliu haitu Alatala mboto mompakagana nuapa-nuapa nakura nte komiu. Ia mompakaroo raramiu sampe ledo maria tona ntanina mamala mompopolengga atau mompopoura pomparasayamiu. Alatala mpuu-mpuu mompakaroso komiu apa nabelo mpuu raraNa bo Iamo nompokio komiu manggava bagia ri kuasaNa bo kaogeNa sampe ri kasae-saena sabana komiu nosangu rara ante i Kristus.

Ibrani 12:28

Jadi haitu sampe kita masipato manguli tarima kasi nte Alatala, sabana Ia nombadekei loga ka kita majadi todea riara PoparentaNa bo PoparentaNa haitu ledo ntoto mogoya. Bo kita kana metupu nte Alatala ante cara nipodambaNa. Kita kana mekou nte Ia bo maeka movia anu ledo nipokonoNa.

Ibrani 12:23

Bo komiu nantingayo todea topomparasaya Alatala. Ira nireke ana-ana lumbua nu Alatala bo sanga-sangara nitulisi riara buku nu Alatala ri suruga. Komiu nantingayo Alatala, Topotangara pura-pura manusia. Bo komiu nantingayo nyawa-nyawa ntona nanoa anu namatemo, anu najadi nagasa.

1 Tesalonika 3:13

Kami merapi Alatala mompakaroso raramiu ala komiu magasa bo ledo makura nuapa-nuapa ri ngayo nTuamata Alatala tempo Tuputa i Yesus makava ante pura-pura todeaNa anu nagasa.

2 Korintus 1:20

Apa pura-pura pojanji nu Alatala nipakadupa riara nggatuvu i Kristus. Haitu sampe kita anu nosangu rara ante i Kristus namala nanguli, “Amin! Nakana mpuu pojanji-pojanji nu Alatala!” Bo haitu najadi ala Alatala rabila bo ratoiya.

Suro-Suro 9:31

Jadi todea topangoseaka i Yesus ri njumangu bagia Yudea, Galilea bo Samaria domo nipandasa. Kasae-sae kadea-dea tona nomparasaya i Yesus, bo todea topomparasaya nantambai karoso pomparasayara sabana ira natundu nte Alatala, bo sabana Nosa Gasa nantulungi ira.

Matius 12:33

Ane kayu nabelo, nabelo muni vuana. Ane kayu ledo nabelo, ledo muni nabelo vuana. Kabelo nu kayu nikita ri vuana.

Ibrani 6:9

Sampesuvu-sampesuvu nipotoveku, naupa ivesia tesaku, niparasaya kamimo komiu ledo mpo tana rapindasi haitu. Niparasaya kami naria asele nabelopa nte komiu, haitumo pomparasayamiu bo pokainggumiu masipato ka tona nipakasalama.

1 Petrus 1:15

Tapi komiu kana magasa ri mpengaya-ngaya anu nipoviamiu, sabana Alatala muni nagasa bo Iamo nompokio komiu majadi todeaNa.

1 Petrus 1:17

Sampesuvu-sampesuvu, komiu nanggasangai Alatala Tuamamiu tempo komiu nosambaya. Jadi komiu kana matuvu mekou nte Ia ane komiu da nonturo mpo topesovo ri dunia hitu. Apa Iamo mombatangara pura-pura tona nangoseaka pokainggura mboto bo Ia ledo nompelenje.