2 Korintus 11:6 - Kaili Ledo

⁶ Naupa nakana yaku ledo napande notesa ri ngayo ntodea, ledo ivesia pangisaniku, apa nisaniku mpuu pepatuduki nakana. Haitu bate-batena nipopakita kami ka komiu riara mpengaya-ngaya pepatuduki bo pokainggu kami bara ipia.

2 Korintus 11:6 Referans Kwoze

Efesus 3:4

bo ane rabacamiu, rasanimiu muni anu nipopaisani ka yaku, haitumo, patuju nu Alatala anu nipakadupa riara nggatuvu i Kristus.)

2 Korintus 4:2

Tapi ane kami, kami domo nangoseaka pokainggu nadaa anu nepakaeya. Kami ledo nebagiu bo ledo nantenggoaka Tesa nu Alatala. Alatala sabi kami bo nikitaNa kami aga nompatolele anu nakana ala rasani ntodea kami namala raparasaya.

1 Korintus 1:17

Yaku ledo nitudu i Kristus mombadiu tona, tapi mompatolele Kareba Belo. Bo ane nompatolele Kareba haitu, yaku ledo notesa nangoseaka kapande nu manusia, mbelaka maria tona aga momparasaya sabana kapandeku motesa bo ledo rasanira mpuu kuasa i Kristus mompakasalama ira ante kamateNa ri kayu salib.

1 Korintus 1:21

Alatala napande mpuu, bo nipakatantuNa manusia ledo mamala mosisani ante Ia ane aga manjarumaka kapandera mboto. Tapi nibotusiNa mompakasalama isema-sema momparasaya Kareba Belo nipatolele kami. Tano mai tona ri dunia nanguli Kareba haitu aga tesa ntodoyo.

2 Korintus 12:12

Tempo yaku naria ri situ nte komiu, nipoviaku tanda-tanda anu nompakalanto yaku mpuu-mpuu suro i Yesus. Yaku nosabara nokarajaa nau nadea kasusa nirasaiku, bo nipoviaku tanda-tanda nipokumaaka bo kabaraka-kabaraka ante kuasa lako nte Alatala.

2 Korintus 10:10

Nisaniku naria tona nanguli ivei: “Riara sura-sura i Paulus tesana nalonto bo nasodo, tapi ane ia mboto naria nte kita, ingguna damo nanonto, bo tesana ledo ria gunana.”

2 Korintus 5:11

Jadi naeka rara kami movia anu ledo rapokono nTupu, apa nisani kami Ia mombatangara kita pura-pura. Jadi haitumo sabana kami nompasimbuku manggeni tona momparasaya i Yesus. Nisani nu Alatalamo isi rara ntai kami. Bo nisarumakaku rasanimiu muni isi rara ntai kami bo domo monggai raramiu mompekirika kami.

1 Korintus 2:13

Jadi ane kami nompatuduki nombatesa Alatala, kami ledo notesa ante tesa-tesa napande nipatuduki ka kami nangoseaka kapande nu manusia, tapi ante tesa-tesa nipatuduki nu Nosa Gasa ka kami. Kami nombatentei pepatuduki lako nte Nosa Gasa ka tona naria Nosa Gasa haitu.

2 Korintus 7:2

Sampesuvu-sampesuvu, kami madota ala komiu mompotove kami bo mantarima kami! Ledo ria sanggania kami novia nadaa ka komiu, ledo ria saitoa nipakarugi kami. Ledo muni naria saitoa nibagiu kami ala mompakauntu karo kami mboto.

1 Korintus 12:8

Saito tona nidekeika nu Nosa Gasa pompakule mapande motesa. Tona ntanina nidekeika nu Nosa Gasa haitu muni pompakule mombatentei anu nipopaisani nTupu ka ia.

2 Korintus 6:6

Riara mpengaya haitu, nalantomo kami mpuu-mpuu batua nu Alatala, apa pokainggu kami nagasa, nisani kami Tesa nu Alatala, kami nosabara bo nabelo rara nte tona. Nosa Gasa nokarajaa riara nggatuvu kami bo kami nompotove tona ntanina ante rara mpuu-mpuu.