2 Korintus 1:12 - Kaili Ledo

¹² Nadamba mpuu rara kami apa nisani kami nabula rara kami. Kami nasaro nokainggu nanoa nte tona pura-pura, nelabipa nte komiu. Pura-pura anu nipovia kami, ledo ria nuapa-nuapa nitabuniaka kami. Patuju kami nanoa, nangoseaka dota nu Alatala. Pokainggu kami ledo nangoseaka kapande nu manusia, tapi nangoseaka pompakule nidekei nu Alatala.

2 Korintus 1:12 Referans Kwoze

1 Korintus 2:13

Jadi ane kami nompatuduki nombatesa Alatala, kami ledo notesa ante tesa-tesa napande nipatuduki ka kami nangoseaka kapande nu manusia, tapi ante tesa-tesa nipatuduki nu Nosa Gasa ka kami. Kami nombatentei pepatuduki lako nte Nosa Gasa ka tona naria Nosa Gasa haitu.

2 Korintus 2:17

Nadea tona nompatolele Tesa nu Alatala ala mangelo untu ka karora mboto. Tapi ledo ivesia kami. Patuju kami nagasa bo tesa kami nakana, apa kami nisuro nu Alatala mompatolele TesaNa. Jadi kami notesa ante kuasa i Kristus bo Alatala nanggita povia kami haitu.

1 Tesalonika 2:10

Nisanimiu mboto kagasa katuvu kami nte komiu topomparasaya i Kristus. Pokainggu kami nagasa bo nanoa, bo ledo ria nuapa-nuapa masipato rasalai. Nisanimiu bo nisani nu Alatala muni tesaku hitu nakana.

1 Petrus 3:21

Uve oge haitu nirapaka ada pediu anu nompakasalama kita sii-sii. Ada pediu haitu ledo ada pompegasa tapa lako ri karota, tapi tandana kita topangoseaka i Yesus. Ada haitu nireke pojanjita nte Alatala ala kita mangoseaka Ia sabana niampungiNa dosata. Bo niampungiNa mpuu dosata sabana i Yesus natuvu mpanjili lako ri kamateNa.

Ibrani 13:18

Sampesuvu-sampesuvu, posambayakamo kami. Nisani kami, rara ntai kami nagasa apa kami batena madota mokainggu nabelo riara mpengaya-ngaya.

2 Korintus 8:8

Ledo niparentaku komiu kana mombadekei maoge. Yaku aga mompopaisani ka komiu kambaso pepotove ntoMakedonia nantulungi tona ntanina. Patujuku ala kusani ane komiu muni mpuu-mpuu nompotove tona ntanina.

2 Korintus 4:2

Tapi ane kami, kami domo nangoseaka pokainggu nadaa anu nepakaeya. Kami ledo nebagiu bo ledo nantenggoaka Tesa nu Alatala. Alatala sabi kami bo nikitaNa kami aga nompatolele anu nakana ala rasani ntodea kami namala raparasaya.

1 Korintus 15:10

Tapi lako ri pepotove nu Alatala, yaku najadi suro i Pue Yesus. Bo pepotoveNa haitu naria aselena riara nggatuvuku. Yaku nokarajaa nelabipa kantamona pade suro-suro i Yesus ntanina. Tapi kakanana ledo yaku anu nokarajaa ntamo ivesia. Alatala anu nompotove yaku, Iamo nokarajaa nosanggani-nggani ante yaku.

Suro-Suro 24:16

Haitumo sabana yaku nasaro nompasimbuku mokainggu nabelo ala ledo maria nuapa-nuapa nipoviaku masala ri panggita nu Alatala bara ri panggita nu manusia.

Suro-Suro 23:1

Nakava sumai, nikanoto i Paulusmo toPolibu Mbaso Agama bo niulina, “Sampesuvu-sampesuvuku. Sampe ri eo hitu, yaku natuvu nanoa, nagasa ri panggita nu Alatala.”

1 Petrus 3:16

Bo komiu kana matuvu ante rara ntai nagasa, mbelaka maria tona manjalai pokainggu nabelo nipoviamiu sabana pangoseakamiu i Kristus, ira kana maeya mboto.

1 Timotius 1:5

Patuju parentaku hitu ala kita mosimpotove, ante tove neumba lako ri rara nagasa, pekiri rara ntai anu ledo nombasalai kita, bo pomparasayata i Kristus mpuu-mpuu nakana.

Filipi 1:10

Ane ivesia komiu, rasanimiu mompelisi anu nabelopa rapoviamiu, bo katuvumiu majadi magasa bo ledo maria salamiu sampe i Kristus makava mpanjili.

Efesus 6:14

Jadi, komiu kana masadia mombatidamaka peeva balimiu! Komiu kana matutu mangoseaka pepatuduki nakana. Haitumo sulepemiu. Komiu kana mokainggu manoa. Haitumo baju asemiu anu nombalenduti karomiu.

Galatia 6:4

Aginapa simbo raparesana pokaingguna mboto ala rasanina bara nabelo pokaingguna bara ledo. Ane nabelo pokaingguna, mamala ia madamba mompekirika pokaingguna haitu. Ledo paraluu ia mompoposisala atau mompakasimbayu pokaingguna ante pokainggu ntona ntanina,

2 Korintus 11:3

Tapi nakini mpuumo raraku, nee-nee raakalani ntona komiu sampe komiu domo ante raramiu mpuu-mpuu mompotove i Kristus. Apa ivesia najadi nte i Hawa anu niakalani nu ule tempo nggaulu.

2 Korintus 1:17

Tapi niaku haitu nabali. Bara raulimiu yaku aga nebalingoya. Atau raulimiu yaku nompakatantu niaku nangoseaka dotaku mboto, sanggani nanguli “Iyo,” sanggani nanguli “Ledo.”

1 Korintus 5:8

Sabana haitu, kita muni mosusa madamba. Kita kana mombatedaka ragi njae bo mangande roti ledo noragi. Batuana, kita kana menonto mokainggu nadosa bo matuvu ante pokainggu nabelo bo nanoa.

1 Korintus 4:4

Nabula raraku. Pangisaniku mboto, ledo naria anu masipato rapakasala riara nggatuvuku. Tapi ledo kabula raraku hitu mompakatantu yaku manoa ri panggita nu Alatala. Aga i Pue Yesus mamala mombabotusi bara nasala yaku bara ledo.

Roma 9:1

Yaku nosangu rara ante i Kristus, jadi yaku ledo nodava. Pekiri rara ntaiku nikeniaka Nosa Gasa, bo pekiri rara ntaiku muni nanguli yaku ledo nodava. Anu kuuli hitu mpuu-mpuu nakana, ledo aga davaku:

Yakobus 4:6

Tapi Alatala nombatulungi kita lako ri kabelo nu raraNa. Bo petulungiNa haitu naogepa pade pura-pura anu nipoinota. Haitumo sampe naria tesa nitulisi riara Buku Gasa ivei: “Alatala nangeva tona nalanga rarana, tapi tona naede rarana nipoasiNa.”

1 Korintus 1:17

Yaku ledo nitudu i Kristus mombadiu tona, tapi mompatolele Kareba Belo. Bo ane nompatolele Kareba haitu, yaku ledo notesa nangoseaka kapande nu manusia, mbelaka maria tona aga momparasaya sabana kapandeku motesa bo ledo rasanira mpuu kuasa i Kristus mompakasalama ira ante kamateNa ri kayu salib.

1 Korintus 12:8

Saito tona nidekeika nu Nosa Gasa pompakule mapande motesa. Tona ntanina nidekeika nu Nosa Gasa haitu muni pompakule mombatentei anu nipopaisani nTupu ka ia.