1 Yohanes 3:7 - Kaili Ledo

⁷ Sampesuvu-sampesuvu nipotoveku, nee rapaloga tona mombabagiu komiu. Toramo! Isema-sema batena novia dota nu Alatala, iamo tona nanoa ri panggita nu Alatala nasimbayu mpo i Kristus nanoa ri panggita nu Alatala.

1 Yohanes 3:7 Referans Kwoze

1 Yohanes 2:29

Nisanimiumo i Kristus batena nangoseaka dota nu Alatala. Sabana haitu kana rasanimiu muni, isema-sema nangoseaka dota nu Alatala, iamo ana nu Alatala.

Roma 2:13

Apa ledo topangepe Atura agama nanoa ri panggita nu Alatala, tapi topangoseaka Atura haitu nireke nu Alatala nanoa.

1 Yohanes 3:3

Isema-sema manjarumaka majadi masimbayu mpo i Kristus, ia kana mombajagai pokaingguna ala katuvuna mpuu-mpuu magasa masimbayu mpo katuvu i Kristus.

1 Yohanes 2:26

Tesa hitu nitulisiku ka komiu apa bali-bali i Kristus nompasimbuku mompatuduki anu nasala ka komiu.

1 Yohanes 2:1

Sampesuvu-sampesuvu nipotoveku, patujuku notulisi sura hitu ka komiu ala nee rapoviamiu dosa. Tapi ane maria tona movia dosa, naria saito topombasaliku, Iamo i Yesus Kristus anu nanoa. Iamo mombasaliku kita ri ngayo nTuamaNa Alatala.

Suro-Suro 10:35

Isema-sema natundu nte Alatala bo novia anu nanoa, tona haitumo nitarima nu Alatala. Alatala ledo nompelisi tona lako ri umba.

Efesus 5:9

Apa inggu ntona anu natuvu ri karemena nabelo bo nanoa bo ia namala raparasaya.

1 Petrus 2:24

I Yesus mbotomo nanjimbuaka dosa-dosata tempo Ia nipaku ri kayu salib, ala kita rakabasaka lako ri kuasa nu dosa bo matuvu mangoseaka dota nu Alatala. Bo kita nipakabelomo lako ri baka-baka i Kristus.

1 Korintus 6:9

Jadi, ledo nisanimiu tona ledo nangoseaka dota nu Alatala ledo ntoto manggava bagia riara Poparenta nu Alatala? Nee sampe komiu rabagiu! Tona nokainggu nabuga, tona nompakande tupu-tupu ntanina, tona nobualo, bo tona nompogau simbo langgai atau simbo mombine, ira pura-pura ledo ntoto manggava bagia riara Poparenta nu Alatala.

Yakobus 2:19

Komiu nomparasaya aga saito Alatala. Haitu nabelo, tapi seta-seta muni nomparasaya Alatala aga saito bo ira nolete naviora!

Filipi 1:11

Bo pokainggumiu mpuu-mpuu majadi mabelo bo manoa sabana pokarajaa i Yesus Kristus riara nggatuvumiu, sampe madea mpuu tona mombabila bo mompakaoge Alatala.

Matius 5:20

Pariaramo tesaKu hitu! Komiu kana matutupa nangoseaka dota nTupu pade guru-guru agama bo toFarisi. Ane ledo, komiu ledo ntoto mamala majadi todea riara Poparenta nu Alatala.”

Yakobus 1:22

Jadi oseakamo tesa nu Alatala, bo nee aga raepe bayangi. Apa ane aga raepe bayangi, komiu nombabagiu karomiu mboto.

Ibrani 7:2

Naupu haitu i Abraham nombabagi pura-pura mbara-mbara nialasina lako ri magau-magau, bo nidekeina sabagia lako ri sapulu bagia ka i Melkisedek. Sanga i Melkisedek haitu, batuana “Magau Nanoa,” bo ia muni Magau ngata Salem anu naria batuana “Magau Topanggeni Posinggabelo.”

Ibrani 1:8

Tapi niuliNa ka AnaNa ivei: “Ikomo Alatala, bo poparentaMu maroo sampe ri kasae-saena, Iko moparenta todeaMu ante rara nanoa.

Efesus 5:6

Jadi, nee komiu rabagiu ntona ante tesa-tesara anu ledo ria gunana, anu nanguli pokainggu ivehaitu ledo nasala. Toramo! Pokainggu ivehaitumo nompopeumba rau rara nu Alatala ka tona ledo natundu nte Ia.

1 Yohanes 3:18

Sampesuvu-sampesuvu nipotoveku, nee aga mompotove sampesuvuta sampomparasaya ri sumba. Kita kana mompotove mpuu bo kita kana mompopakita tove haitu ante pokainggu nabelo.

1 Yohanes 4:17

Ane kita nompotove sampesuvuta sampomparasaya, haitumo tandana kita mpuu-mpuu nompotove Alatala sampe ledo makaja rarata mantingayo Ia ri Eo Potangara ri kaupu dunia. Ledo makaja rarata mantingayo Ia sabana pokaingguta ri dunia hitu masimbayu mpo pokainggu i Kristus.