1 Petrus 2:9 - Kaili Ledo

⁹ Tapi sampesuvu-sampesuvu, komiu ledo mpo ira haitu. Komiumo todea nipelisi nu Alatala. Komiumo nipelisi majadi mpo topanggeni pesomba anu mantulungi magau. Komiumo todeaNa nipatani ka Ia, komiumo najadi bagiaNa. Komiu nipelisi nu Alatala mompatolele panggaviaNa anu nipokumaaka ka tona ntanina. Iamo nompokio komiu mesuvu lako ri kalandana ala matuvu riara karemeNa anu nabelo mpuu.

1 Petrus 2:9 Referans Kwoze

Pompakita 1:6

Kita nipajadiNa todea riara poparentaNa, kita nipajadiNa topanggeni pesomba anu manggeni pesomba ka TuamaNa Alatala. Masipato i Yesus ratoiya bo rabila, bo masipato Ia momparenta sampe ri kasae-saena! Amin!

Pompakita 5:10

Ira nipajadiMiu magau bo topanggeni pesomba anu nanggeni pesomba ka Tuputa Alatala. Bo ira moparenta mpo magau ri dunia hitu.”

2 Timotius 1:9

Alatala nompakasalama kita bo nompokio kita majadi todeaNa nagasa. Kita nipakasalama ledo sabana pompasimbukuta mboto, tapi sabana nia nu Alatala bo pepotoveNa. Ri lamba pamulana dopame dunia nipajadi, Alatala nonia mamimo mompopakita pepotoveNa ante anu rapovia i Yesus Kristus.

1 Petrus 2:5

Komiu muni nasimbayu mpo vatu-vatu natuvu, jadi dekei Alatala mompake komiu majadi banua petupu ka Ia. Bo riara banua petupu haitu komiu majadi mpo topanggeni pesomba, anu natuvu nipatani ka Alatala. Bo komiu namala metupu nte Ia ante pekeniaka Nosa Gasa. Petupumiu haitu najadi pesomba anu rapokonoa rara nu Alatala sabana anu nipovia i Yesus Kristus.

Titus 2:14

I Kristus nombadekei karoNa nipatesi nanjambei kita ala mombasompo dosata. NikabasakaNa kita lako ri pura-pura pokaingguta nadaa, nipegasaNa kita bo nipataniNa kita majadi todeaNa mboto anu matutu nokainggu nabelo.

Suro-Suro 26:18

Kutudu iko hau mombabuka matara, ala ira domo matuvu ri kalandana tapi matuvu riara reme nu Alatala, ala ira rakabasaka lako ri kuasa Magau nu Seta bo matundu nte Alatala. Bo dosa-dosara raampungi bo ira majadi todea nu Alatala anu nipelisiNa, sabana pomparasayara Yaku.’ ”

Pompakita 20:6

Nabelo mpuu tona rapakatuvu mpanjili tempo pembangu ntomate pamulana, apa iramo todea nu Alatala. Ira ledo mambela pehuku niuli kamatea karongganina. Tapi ira majadi topanggeni pesomba ka Alatala bo ka i Kristus. Bo ira momparenta mpo magau mosanggani-nggani ante i Kristus sanjobu mpae kasaena.

Matius 5:16

Ivesia muni reme anu naria riara ntaimiu, nee ratabuniaka! Komiu kana matuvu ante pokainggu nabelo ala tona ntanina mamala manggita pokainggumiu haitu bo mantoiya Tuamamiu ri suruga.”

Kolose 1:13

Iamo nombakabasaka kita lako ri kuasa nalanda bo nompajadi kita todeaNa ri Poparenta nu AnaNa nipotoveNa.

1 Korintus 3:17

Isema-sema mombagero banua niponturo nu Alatala haitu, ia kana rahuku nu Alatala, sabana banua haitu nagasa. Toramo! Komiumo banua haitu!

Suro-Suro 20:28

Komiu kana mombajagai karomiu mboto. Jagai muni todea topomparasaya, anu niparasayaka Nosa Gasa ka komiu. Komiu kana mompiara todea nu Alatala, nasimbayu mpo topoevu nompiara bimbana. Apa Tuputa Yesus namate bo raaNa natiti mombasompo dosata ala kita majadi todeaNa.

Filipi 3:14

Yaku mpo topangova anu ledo neili nompeinta anu ri puri tapi nangova nompetoto anu raalana. Yaku nompasimbuku njuu mangoseaka i Kristus, ala kukava hadia padagi radekei nu Alatala ka yaku ri suruga, haitumo, nipokiokaNa kita matuvu mosangu rara nte i Yesus Kristus ri suruga sampe ri kasae-saena.

Matius 4:16

Bara ipia komiu nonturo ri kalandana bo dosa, tapi sii-sii nikitamiumo reme nu Alatala. Bara ipia komiu natuvu naeka ka kamatea, tapi sii-sii komiu nivanta nu rememo.” Yesaya 9:1-2

Roma 9:24

Bo kitamo hii anu nipasadiaNa manggava belo haitu. Sanu kita nipokioNa lako nte toYahudi bo sanu nipokioNa lako nte tona ledo toYahudi.

Suro-Suro 26:28

Nanguli Magau Agripa ka i Paulus, “Nisarumakamu yaku hii mamala kaliu-liu mupajadi toKristen?”

1 Petrus 4:11

Jonjona, isema-sema nidekeika pompakule mompasimbayu Tesa nu Alatala kana motesa mpo tona niposumba nu Alatala mboto. Isema-sema nidekeika pompakule mantulungi tona ntanina, kana mantulungi ante karoso nidekei nu Alatala ka ia. Pakemo pompakule-pompakule haitu ala nau damo nuapa majadi, Alatala ratoiya bo rabila sabana anu nipovia i Yesus Kristus ri katuvumiu. Alatalamo nakuasa bo masipato ratoiya bo rabila sampe ri kasae-saena. Amin!

Efesus 1:6

Alatala novia pura-pura haitu ala ratoiyata Ia. Nelabi mpuu kaoge nu toveNa ka kita! Lako ri kabelo nu raraNa, Ia nompopelabi bayangi toveNa ka kita anu nosangu rara ante AnaNa nipotoveNa.

Efesus 1:14

Nosa Gasa haitu panggangisita, ala rasanita Alatala mpuu-mpuu mombadekei ka kita pura-pura anu nijanjiNa ka todeaNa. Jadi, nisanita Alatala mpuu-mpuu mombakabasaka kita lako ri dunia nadaa hitu sabana kita todeaNa. Haitumo sampe masipato kita mantoiya kaoge nu Alatala anu nipokumaaka!

Yohanes 17:19

Tata, Kudekei katuvuKu ka Komiu bo novia dotaMiu, ala manggeni belo ka anaguruKu, haitumo ala ira mpuu-mpuu mangoseaka pepatuduki nakana bo majadi todeaMiu nagasa.”

Efesus 3:21

Alatala masipato ratoiya ntodea topomparasaya. Ia masipato ratoiya sii-sii bo sampe ri kasae-saena sabana anu nipovia i Yesus Kristus. Amin!