1 Petrus 1:7 - Kaili Ledo

⁷ Patuju nu pesori-pesori haitu ala rasani kaliangu pomparasayamiu. Bulava nigonu ante apu ala rasani bara maria galona bara ledo. Pomparasayamiu noalipa pade bulava anu namala magero. Jadi pomparasayamiu kana rapesori muni ante mpengaya pesori. Bo ane pomparasayamiu mpuu-mpuu maliangu, komiu ratoiya bo rabila bo rapakaoge tempo i Yesus Kristus makava mpanjili ri dunia.

1 Petrus 1:7 Referans Kwoze

Yakobus 1:12

Nabelo mpuu tona naroso rarana riara kasusa bo pesori! Ane maroso rarana sampe ri kaupu pesori haitu, Alatala mombadekei katuvu nabelo ka ia sampe ri kasae-saena. Katuvu nabelo haitu nijanji nu Alatala ka tona nompotove Ia.

1 Petrus 4:12

Sampesuvu-sampesuvu nipotoveku, nee mahera komiu nombarasai susa bo pari nantamo mpuu, mpo kapane nu apu. Haitu najadi mompakaliangu pomparasayamiu. Nee mahera bo nee rapekirimiu kasusa nirasaimiu haitu ledo ria kasimbayuna.

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

1 Korintus 3:13

Rapana ane mapapu banua, tantu pareva nabelo nipake novia banua haitu maboli, tapi pareva ledo nabelo mapapu puramo. Ivesia muni ante pokarajaa ntopokarajaa ka Alatala. Kabelo nu pokarajaara saito-saito kana rapakalanto bara maipia tempo i Yesus makava mpanjili ri dunia. Pokarajaara haitu rauji nu Alatala ala malanto pokarajaara haitu bara mabelo bara ledo.

Yudas 1:24

Ratoiyatamo Alatala sabana Ia nakuasa nombajagai kita ala ledo rakabasakata pomparasayata. Ia nakuasa manggeni kita hau ri suruga mantingayo Ia riara kaogeNa, bo ledo maria salata, bo melabi kadamba rarata.

2 Petrus 1:4

Ivesia muni Alatala nombadekei ka kita pedekei-pedekei nijanjiNa, anu nabelo mpuu bo nelabi noguna. Ane rapaketa pedekei-pedekei haitu, domo raoseakata dota rarata nadaa ri dunia hitu anu nompakagero katuvu manusia, bo rapakuleta mompasiala inggu nu Alatala mboto.

1 Petrus 2:4

Jadi pekoumo nte i Yesus! Ia nirapaka vatu natuvu anu nipoara nu manusia sabana nisarumakara ledo ria gunana. Tapi Alatala nompelisi vatu haitu sabana haitu vatu tobelona ri panggitaNa.

Matius 25:21

Nanguli madika, ‘Nabelomo! Komiu batua nabelo, natutu nantui bago anu niparasayaka komiu. Komiu namala niparasaya ante mbara-mbara sakide. Sabana haitu, mbara-mbara nadea kuparasayaka komiu. Kamaimo madamba mosanggani ante yaku.’

Pompakita 3:10

Komiu nangoseaka parentaKu anu nanguli pakaroo rara bo mosabara tempo nipandasa. Sabana haitu, Kusaliku komiu lako ri kasusa makava ri njumangu dunia mompesori tona nonturo ri dunia.

Pompakita 2:10

Tapi nee maeka komiu mantingayo kasusa bo kapari anu domo masae kana rarasaimiu. Pariaramo! Magau nu Seta mompopesua sanu komiu hau rantarunggu bo mompesori komiu ala moura pomparasayamiu. Komiu rapandasa sapulu eo kasaena. Tapi nee maupu raramiu momparasaya Yaku nau komiu rapatesi, sabana Kudekei ka komiu hadia padagi, haitumo komiu matuvu mabelo sampe ri kasae-saena.

Pompakita 1:7

Peintamo! Ia makava nibungu kulimu. Ia rakita ntona pura-pura, nau ira anu nombatosu usuNa. Bo pura-pura valaa manusia ri dunia motumangi mpojea manggita Ia. Haitu mpuu-mpuu majadi! Amin!

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

Suro-Suro 8:20

Tapi nesana i Petrus, “Masurukavu mpuu iko bo doimu! Nisarumakamu kabaraka nidekei nu Alatala mamala raali ante doi?

Yohanes 12:26

Isema-sema mokarajaa ka Yaku kana mangoseaka Yaku ala ri umba-umba Kukalau, ia mosanggani-nggani nte Yaku. Bo isema-sema mokarajaa ka Yaku natantu rabila nTuamaKu.

Yohanes 5:44

Berimbamo komiu mamala momparasaya Yaku? Apa komiu aga madota rabila nu roa. Ledo nipasimbukumiu manggava pebila nu Alatala Saito-itoNa!

Lukas 12:33

Jadi pobalumo mbara-mbaramiu bo dekeimo alina haitu ka tona napakasi. Poviamo batutu doi anu ledo mamala magero. Batuana, poviamo anu mompakadamba rara nu Alatala. Ivesiamo komiu momboli kakalumana ri suruga, anu ledo maupu-upu bo ledo rapangangga ntona atau rakandesi nu saipa.

Matius 25:23

Nanguli madika, ‘Nabelomo! Komiu batua nabelo, bo natutu nantui bago niparasayaka komiu. Komiu namala niparasaya ante mbara-mbara sakide. Sabana haitu, madea kuparasayaka komiu. Kamaimo madamba mosanggani ante yaku.’

Matius 19:28

Nesana i Yesus ka ira, “Pariaramo tesaKu hitu. Yaku, Ana nu Manusia momparenta ante kuasa bara maipia tempo Alatala mompakabaru mpengaya-ngaya. Bo komiu topangoseaka Yaku momparenta mosanggani-nggani nte Yaku bo monturo ri sapulu randua gadera magau bo mombatangara todea Israel, haitumo muli nu sapulu randua ana i Israel.

Pompakita 3:18

Haitu sampe Kutevai ka komiu ivei: Alimo bulava nipakagasa riara apu lako nte Yaku ala komiu mpuu-mpuu makalumana ri panggitaKu. Bo ali munimo pakea mputi lako nte Yaku, ala komiu mamala mopakea bo ledo maeya matamiu rakita ntona komiu novuloa. Bo ali munimo pakuli ragese ri matamiu ala komiu mamala mekita mpanjili.

2 Petrus 1:1

Sampesuvu-sampesuvuku anu mpuu-mpuu nomparasaya i Yesus Kristus, nasimbayu mpo kami. Iamo Alatala bo Topompakasalama kita, anu nompopompakule pura-pura kita nomparasaya sabana Ia nanoa bo ledo nompelenje. Sura hitu lako nte yaku, i Simon Petrus. Yaku batua bo suro i Yesus Kristus.

1 Petrus 2:7

I Kristus, anu nirapaka vatu haitu, noali mpuu ka komiu topomparasaya. Tapi ane tona ledo nomparasaya, ia nasimbayu mpo anu nitulisi riara Buku Gasa ivei: “Vatu nipoara ntopovia banua, vatu haitumo anu nopokopa ka banua haitu.” Mazmur 118:22

1 Petrus 1:5

Sampesuvu-sampesuvu, komiu masipato mantarima belo haitu, sabana komiu nomparasaya i Yesus. Bo komiu batena nijagai nu Alatala ante kuasaNa ala komiu mamala mombarasai belo anu nasadiamo radekeiNa ka komiu ri kaupu nu dunia.

Roma 2:29

Tapi toYahudi anu mpuu-mpuu todea nu Alatala, haitumo tona mpuu-mpuu rarana nangoseaka Alatala. Bo tona mpuu-mpuu nisuna, nisuna riara ntaira. Batuana, ira najadi todea nu Alatala sabana pokarajaa Nosa Gasa nu Alatala riara ntaira, ledo sabana pangoseakara atura-atura nitulisi. Tona ivehaitu ratoiya nu Alatala, nau ledo nitoiya nu manusia.

Lukas 17:30

Ivesia muni pokainggu ntona bara maipia tempo Yaku, Ana nu Manusia makava.

Roma 2:10

Tapi pura-pura tona nokainggu nabelo kana ratoiya bo rabila bo manggava katuvu nabelo lako nte Alatala, pamula-mulana toYahudi bo muni tona ntanina,

Roma 8:19

Sii-sii pura-pura isi nu dunia ante lentora rarara nantongoraka tempona Alatala mompopakita kaoge nu ana-anaNa.

1 Petrus 1:13

Sampesuvu-sampesuvu, naria mamimo panjarumakata naroso. Sabana haitu, komiu kana mompakanoto raramiu bo mainga, bo maroo manjarumaka belo radekei ka komiu tempo i Yesus Kristus makava mpanjili.

1 Petrus 4:13

Kakanana komiu kana madamba, sabana komiu nombarasai kasusa bo kapari nasimbayu mpo anu nirasai i Kristus mboto. Apa ane komiu nombarasi susa bo pari mpo nirasai i Kristus, mambaso mpuu kadamba nu raramiu tempo Ia makava mpanjili. Tempo haitu, kaoge i Kristus anu nipokumaaka rapopakita ka pura-pura manusia.

1 Petrus 5:1

Naria muni anu kuuli ka komiu pakeni ntodea topomparasaya! Yaku nabia notulisi ka komiu sabana yaku muni pakeni ntopomparasaya, bo yaku mboto nanggita kasusa bo kapari nirasai i Kristus bara ipia. Bo ane i Kristus makava mpanjili bo mompopakita kuasaNa bo kaogeNa ka pura-pura manusia, yaku muni manggava bagia ri kuasaNa bo kaogeNa haitu. Jadi yaku mpuu-mpuu nerapi nte komiu

2 Petrus 3:14

Sampesuvu-sampesuvu nipotoveku, komiu nompopea kajadia-kajadia haitu, jadi pasimbukumo ala pokainggumiu mabelo bo ledo maria anu rasalai atau mepakaeya ri panggita nu Alatala. Bo pasimbukumo matuvu mosinggabelo ante Ia.