यहून्‍ना 3:18 - बुक्सा

¹⁸ जो कोई बामै बिसवास करै है, बाकै दोसी ना ठैराओ जागो, पर जो कोई बामै बिसवास ना करै है, बौ दोसी ठैराओ जा चुको है, इसताँई कै बानै परमेसर के इकलौते लौंड़ा के नाम मै बिसवास ना करो।

यहून्‍ना 3:18 Referans Kwoze

1 यहून्‍ना 5:10

जो परमेसर के लौंड़ा के ऊपर बिसवास करै है, बौ अपने भीतर बा गभाई कै रक्‍खै है। अगर कोई परमेसर मै बिसवास ना करै है, तौ बौ परमेसर कै झूँटो ठैराबै है। कैसेकै बानै बा गभाई को बिसवास ना करो, जो परमेसर नै अपने लौंड़ा के बारे मै दई ही।

मरकुस 16:16

जो बिसवास करै और जल संस्कार लै उनकै मुक्‍ति मिलैगी, पर जो बिसवास ना करै बौ दोसी ठैराओ जागो।

रोमियो 8:1

और अब जो मसी ईसु मै हैं, उनके ऊपर सजा की आगियाँ ना है।

यहून्‍ना 5:24

“मैं तुमसै सच-सच कैरओ हौं, जो मेरे बचन सुनकै मेरे भेजनै बारे मै बिसवास करै है, हमेसा की जिन्‍दगी बाकी है, और बाके ऊपर सजा को हुकम ना है, पर मौत सै पार होकै बौ जिन्‍दगी मै पौंच चुको है।

1 यहून्‍ना 5:12

जिसके धौंरे ईसु मसी है, बाके धौंरे हमेसा की जिन्‍दगी है, और जिसके धौंरे परमेसर को लौंड़ा यानी ईसु मसी ना है, बाके धौंरे हमेसा की जिन्‍दगी बी ना है।

यहून्‍ना 3:36

जो लौंड़ा मै बिसवास करै है, हमेसा की जिन्‍दगी बाई की है, पर बौ जो लौंड़ा की ना मानै है बाकै जिन्‍दगी ना मिलैगी, और परमेसर को घुस्सा बाके ऊपर बनो रैहगो।

रोमियो 5:1

परमेसर नै हमरे बिसवास के कारन हमकै धरमी मानो है। परभु ईसु मसी के दुआरा हमरो परमेसर सै मेल हो गओ है।

1 यहून्‍ना 4:9

परमेसर नै अपनो पियार हमरे ऊपर ऐंसे दिखाओ कै बानै अपनो इकलौतो लौंड़ा जा दुनिया मै भेजो, जिस्सै कै हम बाके लौंड़ा के दुआरा जी सकैं।

रोमियो 8:34

फिर कौन है जो सजा की आगियाँ देगो? मसी ईसु बौ हो जो मर गओ पर बौ मुरदौं मै सै फिर जी उठो, और परमेसर के खाने हात की ओर बैठो है, और हमरे ताँई बिनती बी करै है।

यहून्‍ना 20:31

पर जे इसताँई लिखे गए हैं कै तुम बिसवास करौ, कै ईसुई परमेसर को लौंड़ा मसी है, और बिसवास करकै बाके नाम सै जिन्‍दगी पाऔ।

यहून्‍ना 6:47

“मैं तुमसै सच-सच कैरओ हौं, कै जो कोई बिसवास करै है, हमेसा की जिन्‍दगी बाई की है।

यहून्‍ना 6:40

कैसेकै मेरे अब्बा की इच्‍छा जौ है, कै हर एक आदमी जो लौंड़ा कै देखै है, और बाके ऊपर बिसवास करै है, बौ हमेसा की जिन्‍दगी पागो, और मैं खुद आखरी दिन मै बाकै जिन्‍दो करंगो।”

यहून्‍ना 1:18

परमेसर कै किसी नै कबी ना देखो, परमेसर को इकलौतो लौंड़ा जो खुद परमेसर है और अब्बा के संग है, बाई नै बौ परकट करो है।

इबरानिओ 2:3

तौ भला हम लोग इत्‍ती अच्‍छी मुक्‍ति कै छोड़कै आनै बारी सजा सै कैसे बचंगे? जिसके बारे मै पैलेई परभु नै कैई ही और जिन लोगौ नै सुनी है और उन्‍नै जौ साबित बी करो कै जे बात सच्‍ची हैं।

इबरानिओ 12:25

चौकस रौह और बा बोलनै बारे सै मौह ना फेरौ। अगर बे लोग बासै मौह फेरकै ना बच पाए जिसनै उनकै धरती मै चितौनी दई ही तौ अगर हम बासै मौह फेरैं जो सुरग सै चितौनी देरओ है, तौ हम डन्ड सै ना बच पांगे।

यहून्‍ना 1:12

पर जितनौ नै बाकै अपनाओ, और जो लोग बाके नाम मै बिसवास करैं हैं, उन सबकै बानै परमेसर की औलाद होनै को हक दओ।

यहून्‍ना 3:16

“कैसेकै परमेसर नै दुनिया सै ऐंसो पियार करो कै बानै अपनो इकलौतो लौंड़ा दे दओ, कै जो कोई उसमै बिसवास करै बौ नास ना होए, पर हमेसा की जिन्‍दगी पाय।

इबरानिओ 3:19

इसताँई हम जौ बात देखै हैं कै, बे बिसवास ना कन्‍नै की बजै सै बहाँ पौंच ना सके।

1 यहून्‍ना 3:23

और बाकी आगियाँ जौ है कै हम बाके लौंड़ा ईसु मसी के नाम मै बिसवास करैं और जैसी आगियाँ मसी नै हमकै दई है बैसेई हम एक दूसरे सै पियार रक्‍खैं।