याकूब 1:12 - बुक्सा

¹² धन्‍न है बौ आदमी, जो परख मै खरो लिकरै है, कैसेकै बौ खरो लिकरकै जिन्‍दगी को बौ मुकट पागो, जिसको बादो परमेसर नै अपने पियार कन्‍नै बारौ सै करो है।

याकूब 1:12 Referans Kwoze

1 पतरस 5:10

अब परमेसर जो सिगरे किरपा को धनी है, जिसनै तुमकै मसी मै अपनी हमेसा की महिमा के ताँई बुलाओ है, तुमरो थोड़े देर को दुख सैहनै के बाद बौ खुदई तुमकै सिद्‍द, पक्‍के, सकतिसाली और तागत बारो बनागो।

परकासन 2:10

जो दुख तेकै झेलने पड़ंगे, उनसै मत डर, कैसेकै देखौ, सैतान तुम्मै सै, कुछ कै जेलखाने मै डान्‍नै बारो है कै तुम परखे जाऔगे और तुमकै दस दिन तक सताओ जागो। तू मौत को सामनो करते बखत बी बिसवास मै ईमानदार रैह और मैं तेकै जिन्‍दगी को मुकट दंगो।

याकूब 5:11

देखौ, सबर रखनै बारौ कै हम धन्‍न कैबै हैं। तुम लोगौ नै आयूब के सबर के बारे मै तौ सुनोई है, और परभु नै आखरी मै बाकै बाको ईनाम बी दओ, बाकै बी तुम जानौ हौ। कैसेकै परभु बेसानी तरस खानै बारो और दया कन्‍नै बारो है।

रोमियो 8:28

और हम जानै हैं, कै जो लोग परमेसर सै पियार रक्‍खै हैं, मतलब जिसकै परमेसर नै अपनी मरजी सै बुलार खाओ है उनके ताँई सब बात मिलकै भलाई कैई लामै हैं।

मत्‍ती 10:22

मेरे नाम के कारन सब लोग तुमसै बैर करंगे, पर जो अन्‍त तक बिसवास मै बनो रैहगो उसई कै मुक्‍ति मिलैगी।

1 कुरन्‍थियों 9:25

खेल मै हिस्सा लैनै बारे खिलाड़ी अपने सरीर के ऊपर काबू करकै धियान सै खुद कै तईयार करै है। बौ बी ऐंसे ईनाम के ताँई जो जादा बखत के ताँई ना रैहबै है। पर हम ऐंसे ईनाम के ताँई करै हैं, जो हमेसा रैहबै है।

1 पतरस 3:14

और अगर तुमकै धरम के काम करते भए दुख बी सैहनो पड़ै, तौ तुम धन्‍न हौ इसताँई नाई उनकी धमकिऔं सै घबराऔ और नाई डरौ।

2 तीमुथियुस 4:8

अब सुरग मै मेरे ताँई धारमिकता को मुकट तईयार करकै रखर खाओ है और परभु जो सच्‍चो नियाय कन्‍नै बारो है। मैंकै बा दिन देगो और मैंकैई ना पर उन सबई लोगौ कै बी देगो जो पियार के संग बाको फिर सै आनै को पैंड़ो देख रए हैं।

याकूब 2:5

हे मेरे पियारे भईयौ सुनौ; का परमेसर नै जा दुनिया के गरीब लोगौ कै ना चुनो कै बे बिसवास मै पक्‍के और मसी के राज के अधकारी हौं, जिसको बादो बानै अपने पियार कन्‍नै बारौ से करो है?

1 पतरस 5:4

और जब रखबारी कन्‍नै बारो बड़ो गड़रिया परकट होगो तौ तबई तुमकै महिमा को मुकट देओ जागो। जिसकी चमक कबी कम ना होवै है।

1 कुरन्‍थियों 2:9

पर जैसो पबित्‍तर सास्तर मै लिखो है, “जिन बातौं कै ना तौ आँखौ नै देखो और ना कानौ नै सुनो, और नाई कोई आदमी उनकै अपने मन मै सोच सकै है। बेई बात परमेसर नै अपने पियार कन्‍नै बारौ के ताँई तईयार करी हैं।”

परकासन 3:21

“जो जीत जागो उसकै मैं अपने संग अपने सिंगासन मै बैठांगो, जैसे मैं बी जीत पाकै अपने अब्बा के संग बाके सिंगासन मै बैठ गओ।

1 पतरस 4:13

तुम जितने मसी के दुख मै सामिल होबौ हौ, उत्‍तोई तुम खुस होईयो और जब बाकी महिमा परकट होगी तौ तुम खुसी के मारे आपेमै ना रैहओगे।

1 कुरन्‍थियों 8:3

पर अगर कोई परमेसर सै पियार रक्‍खै है, तौ परमेसर बाकै जानै है।

परकासन 3:19

“मैं जिनसै पियार करौं हौं, उनकै डाँटौ और डन्ड देवौ हौं, इसताँई जोसीलो बन और मन फिरा।

इबरानिओ 10:32

अपने बे पुराने दिन याद करौ जब तुमरे ऊपर परमेसर को उज्‍जेरो चमको हो तब दुख और परेसानिऔ कै सैहते भए कैसे तुम टिके रैहए।

इबरानिओ 6:15

तब इब्राहिम नै सबर रक्‍खो और परमेसर के बादेऔ कै पा लओ।

मत्‍ती 25:34

“तब राजा अपने खाने हात बारे लोगौ सै कैगो, हे मेरे अब्बा के धन्‍न लोगौ, आऔ और उस राज के हकदार बन जाऔ, जो दुनिया के सुरू सैई तुम लोगौ के ताँई तईयार करो गओ है।

इबरानिओ 11:17

बिसवास की बजै सैई जब परमेसर इब्राहिम कै परख रओ हो तौ बानै अपने लौंड़ा इसहाक कै बलि चढ़ानै के ताँई दे दओ और जिस इब्राहिम नै बादेऔ कै पाओ हो बौई अपने एकई लौंड़ा की बलि चढ़ानै के ताँई तईयार हो।

1 यहून्‍ना 4:19

हम इसताँई पियार करै हैं कैसेकै पैले परमेसर नै हम सै पियार करो है।

इबरानिओ 12:5

का तुम बा हौसला कै भूल गए हौ जो परमेसर नै तुमकै अपने बालक समज कै दओ हो, “मेरे पियारे बालकौ, परभु तुमकै सुदारै है बा बात कै हलके मै ना लेईओ, और अगर बौ तुमकै डाँटै तौ हिम्मत मत हारिओ।

लूका 6:22

“धन्‍न हौ तुम, जब आदमी के लौंड़ा के बजै सै लोग तुमसै बैर करंगे, और तुमकै लिकार दंगे, और तुमरी बुराई करंगे, और तुमरो नाम बुरो समजकै काट दंगे।

रोमियो 5:4

और सबर सैई अच्‍छो सौभाब और अच्‍छे सौभाब सै उमीद पैदा होवै है।

2 तीमुथियुस 2:15

खुद कै परमेसर की सेवा के लायक बनाऔ और ऐंसे काम कन्‍नै की कोसिस करौ जिसमै तुमरी इज्‍जत होए और सच्‍चे बचन कै सई तरीका सै काम मै लाऔ।

1 पतरस 4:14

अगर मसी के नाम सै लोग तुमरी बेजती करै हैं तौ तुम खुद कै धन्‍न समजौ; कैसेकै महिमा को आत्‍मा जो परमेसर की आत्‍मा है बौ तुमरे भीतर बसै है।