गलातिऔ 6:12 - बुक्सा

¹² जो लोग तुमरो खतना कन्‍नै के ताँई दबाब डारै हैं बे लोगौ की नजरौ मै खुद कै बड़ो दिखानो चाँहै हैं, बे जौ इसताँई करै हैं कै उनकै मसी के कुरूस की बजै सै दुख झेलनो ना पड़ै।

गलातिऔ 6:12 Referans Kwoze

गलातिऔ 5:11

ओ भईयौ और बहनौ, अगर मैं अब तक खतना को परचार करौ हौं, तौ लोग मैंकै काए सता रए हैं? और अगर जौ सच होतो, तौ मसी के कुरूस के बारे मै जो मैं सिकाबौ हौं बासै कोई परेसानी ना होती।

कुलुसिऔं 2:23

जे नियम देखनै मै गियान बारे लगै हैं पर इनमै भक्‍ति कन्‍नै को दिखाबो, झूँटी दीनता और सरीर कै कसट दैनै को रिबाज है। जे सबई बात सरीर की बुरी इच्‍छाऔं कै ना रोक सकै हैं।

2 कुरन्‍थियों 11:13

इसताँई ऐंसे भेजे भए चेला ढौंगी हैं और धोको दैनै बारे हैं। जो मसी की अच्‍छी खबर कै सुनानै को ढौंग करै हैं।

चेलौ के काम 15:1

तबई कुछ लोग यहूदिया परदेस सै अन्‍ताकिया मै आकै बिसवासी लोगौ कै सिकाल लगे कै, “अगर तुमरो खतना मूसा के नियम के तरीका सै ना भओ है तौ तुमकै मुक्‍ति ना मिल सकै है।”

गलातिऔ 2:3

पर तीतुस कै बी जो मेरे संग हो और जो यूनानी हो, तौबी बाकै जा बात के ताँई किसी नै मजबूर ना करो कै तू अपनो खतना करा।

लूका 16:15

इस बात मै बानै उनसै कैई, “तुम तौ बौ हौ जो लोगौं कै जौ जतानो चाँहौ हौ कै तुम भौत सच्‍चे हौ पर परमेसर तुमरे मनौ कै जानै है। कैसेकै जो चीज आदमिऔ की नजरौ मै महान है, बौ परमेसर की नजरौ मै तुच्‍छ है।

फिलिप्‍पीऔ 3:18

और जैसो मैं तुम लोगौ सै कई दफै कैह चुको हौं और रोते भए अब्बी कैबौ हौं कै भौस्से लोगौ को चाल-चलन ऐंसो है जो मसी के कुरूस के दुसमन हैं।

फिलिप्‍पीऔ 2:4

हर एक आदमी अपनेई फाएदा के ताँई ना सोचै, पर दूसरौं के फाएदा के ताँई बी सोचै।

फिलिप्‍पीऔ 1:15

कुछ तौ जरन और दुसमनी के बजै सै मसी को परचार करै हैं, और कुछ भली इच्‍छा सै।

गलातिऔ 6:13

कैसेकै जिन लोगौ नै खतना कर खाओ है, बे खुदई नियम मै ना चलै हैं, पर बे तुमरो खतना इसताँई कन्‍नो चाँहै हैं कै बे तुमरे जा काम के दुआरा घमंड कर सकैं।

गलातिऔ 2:14

पर जब मैंनै जौ देखो कै अच्‍छी खबर की सच्‍चाई के हिसाब सै उनको चाल-चलन ना हो, तौ तबई मैंनै सबई के सामने पतरस सै कैई कै, “तुम यहूदी होते भए बी गैर यहूदी की तरै जीवौ हौ, तौ तुम गैर यहूदी लोगौ कै यहूदी रीती रिबाज माननै के ताँई काए मजबूर कर रए हौ?”

2 कुरन्‍थियों 10:12

कैसेकै हम्मै इत्‍ती हिम्मत ना है कै हम खुद कै उनके संग गिनै या उनकी बराबरी करैं जो अपनी बड़ाई खुद करै हैं। बे खुद कै एक दूसरे सै नापै हैं और अपनी बराबरी एक दूसरे के संग करै हैं, ऐंसे लोग बेबकूफ हैं।

चेलौ के काम 15:5

तबई जो फरीसी समू के बिसवासी लोग हे उनमै सै कुछ लोगौ नै खड़े होकै कैई कै, “गैर यहूदी लोगौ कै बी खतना कन्‍नो चँईऐ और उनकै मूसा के नियम कै माननै को बी हुकम दैनो चँईऐ।”

यहून्‍ना 7:18

जो अपनी ओर सै बोलै है बौ अपनी बड़ाई चाँहबै है, पर जो अपने भेजनै बारे की बड़ाई चाँहबै है बौई सच्‍चो है, और बामै कोई खोट ना है।

लूका 20:47

बे राँड़ौ कै फसाकै उनको घर लूट लेबै हैं, और दिखानै के ताँई बड़ी लम्बी-लम्बी और देर तक पिराथना करते रैहबैं हैं: परभु इनकै भौत डन्ड देगो।”

मत्‍ती 23:28

ऐंसेई तुम बाहार सै तौ धरमात्‍मा दिखाई देवौ हौ, पर भीतर सै छल-कपट और बुराई सै भरे भए हौ।

मत्‍ती 23:5

बे सैरे काम इसताँई करै हैं कै लोग उनकै देखैं। बे अपने ताबीजौ और लत्‍तौ की झालरौं कै इसताँई बड़े सै बड़ी करते रैहबैं हैं जिस्सै लोग उनकै धरमात्‍मा समजैं।

मत्‍ती 6:16

“जब तुम बरत रक्‍खौ तौ, ढौंगिऔ के हाँई तुमरे मौह लटके भए ना दिखाई दैं, बे अपनो मौह इसताँई सुस्त रक्‍खै हैं कै बे लोगौ कै दिखाऐ कै बे बरत रख रए हैं, मैं तुमसै सच कैरओ हौं, कै बे अपनो ईनाम पा चुके हैं।

मत्‍ती 6:2

“इसताँई जब तुम दान करौ तौ इसको ढिंडोरा ना पिटबाऔ जैसे सभाऔं और गलिऔं मै पाखंडी लोग करैं हैं, जिस्सै लोग उनकी बड़ाई करैं। मैं तुमसै सच कैरओ हौं बे अपनो ईनाम पा चुके हैं।

मत्‍ती 6:5

“और जब तू पिराथना करै, तौ ढौंगिऔ के जैसे ना हो कैसेकै लोगौ कै दिखानै के ताँई सभाऔं मै और सड़कौं के मोड़ौ मै खड़े होकै पिराथना कन्‍नो उनकै अच्‍छो लगै है, मैं तुमसै सच कैरओ हौं, कै बे अपनो ईनाम पा चुके हैं।

मत्‍ती 5:10

धन्‍न हैं बे, जो धरमी होनै के बजै सै सताए जावै हैं, कैसेकै सुरग को राज उनई को है।

मत्‍ती 23:27

“अरे कपटी सास्तरिऔं और फरीसिऔं! धिक्‍कार तुम लोगौ मै, तुम चूना सै लिपि-पुति भई समादी हौ, जो बाहार सै तौ अच्‍छी दिखै है, पर भीतर सै मुरदौं की हड्‍डिऔं और हर तरै की गन्‍दगी सै भरी पड़ी है।