इफिसिऔ 5:25 - बुक्सा

²⁵ ओ लोगौ अपनी अपनी बईयरौं सै बैसेई पियार करौ जैसो मसी नै बिसवासिऔ की मंडली सै करो और खुद कै बाके ताँई अपनी जान बी दे दई।

इफिसिऔ 5:25 Referans Kwoze

1 पतरस 3:7

बैसेई हे लोगौ, तुम बी अपनी समज सै अपनी बईयरौं के संग अच्‍छी जिन्‍दगी बिताऔ, और बईयरौं कै कमजोर समजकै उनकी इज्‍जत करौ; जौ समजकै कै हम दौनौ संगई किरपा की जिन्‍दगी के हकदार हैं जिस्सै कै तुमरी पिराथना ना रुकै।

कुलुसिऔं 3:19

ओ लोगौ अपनी अपनी बईयरौं सै पियार करौ और उनके संग सक्‍त बरताब ना करौ।

इफिसिऔ 5:28

ऐंसेई लोग के ताँई जौ सई है कै बौ अपनी बईयर सै बैसेई पियार करै जैसो अपने सरीर सै करै है। जो अपनी बईयर सै पियार करै है बौ खुद सै बी पियार करै है।

इफिसिऔ 5:33

पर तुम्मै सै हर एक कै अपनी बईयर सै पियार कन्‍नो चँईऐ जैसो तुम खुद अपने आप सै करौ हौ, और बईयर कै बी अपने लोग को डर मानते भए बाकी इज्‍जत कन्‍नी चँईऐ।

इफिसिऔ 5:2

पियार के संग जिऔ, ठीक बैसेई जिस तरै सै मसी नै तुमसै पियार करो और हमरे पापौं के ताँई एक अच्‍छी खसबोई बारी भेंट बनकै परमेसर के सामने खुद कै बलि के ताँई दे दओ।

गलातिऔ 1:4

ईसु मसी नै हमरे पापौं के ताँई अपनी जान तक दे दई जिस्सै कै हम जा बुरे युग मै रैह रए हैं, बासै छुटकारो पा सकैं और हमरे पिता परमेसर की इच्‍छा जौई है।

परकासन 1:5

ईसु मसी की ओर सै जो बिसवासजोग गभाई, मरे भएऔं मै सै पैलो जी उठनै बारो और धरती के राजाऔं को राजा है, तुमकै किरपा और सान्‍ति मिलती रैह। बौ जो हम सै पियार रक्‍खै है, और बानै अपने खून के दुआरा हमरे पापौं सै हमकै छुड़ाओ है।

परकासन 5:9

बे जौ नओ गीत गाल लगे, “तू इस किताब कै लैनै और इसकी मौहर खोलनै के लायक है, कैसेकै तैनै बलि होकै अपने खून सै हर एक गोत और भासा और लोग और जाति मै सै परमेसर के ताँई लोग मोल लए हैं।

मत्‍ती 20:28

कैसेकै आदमी को लौंड़ा बी अपनी सेवा करानै ना पर सेवा कन्‍नै और भौतौं की मुक्‍ति के ताँई अपने पिरान दैनै आओ है।”

चेलौ के काम 20:28

इसताँई तुम अपनी और अपने लोगौ की देखभाल करौ, जिसके ताँई तुमकै पबित्‍तर आत्‍मा नै चुनो है, कैसेकै तुम बिसवासिऔ की मंडली के लोगौ के ताँई ऐंसे हौ जैसे गड़रिया भेड़ौ के झुन्ड के ताँई है। जिसकै परमेसर नै अपने लौंड़ा को खून देकै मोल लओ है।

यहून्‍ना 6:51

बौ जिन्‍दगी की रोटी मैं हौं, जो सुरग सै आवै है। अगर कोई जा रोटी मै सै खाऐ तौ बौ हमेसा जिन्‍दो रैहगो, और जो रोटी मैं दुनिया कै जिन्‍दगी के ताँई दंगो बौ मेरो मांस है।”

1 तीमुथियुस 2:6

बानै सबई लोगौ के बदले खुद कै दे दओ कै सिगरे लोग बच सकैं, जिस्सै कै बाकी गभाई सई बखत मै दई जाय।

इफिसिऔ 5:24

जिस तरै सै बिसवासिऔ की मंडली मसी के आधीन है, बैसेई बईयर बी हर एक बातौं मै अपने लोग के आधीन है।