2 पतरस 3:16 - बुक्सा

¹⁶ जैसो बानै अपनी सिगरी चिट्‌ठिऔ मै इन बातौं के बारे मै बताओ है, जिनमै सै कुछ बातौं कै समजनो मुसकल है; नासमज और एक बात के ऊपर ना टिके रैहनै बारे लोग उन बातौं कै बी और पबित्‍तर सास्तर के बचनौ कै बी तोड़ मड़ोड़ कै गलत मतलब लिकारकै खुदई अपने नास की बजै बनै हैं।

2 पतरस 3:16 Referans Kwoze

मत्‍ती 15:6

तौ बौ अपने अब्बा को आदर ना करै, इस तरै तुमनै अपने रीति-रिबाजौ के नाम मै परमेसर को आदेस ना मानो है।

इबरानिओ 5:11

जाके बारे मै कैनै के ताँई मेरे धौंरे भौत कुछ है, पर जिनकै समजानो मुसकल है, कैसेकै तुमरी बुद्‍धि कमजोर हो गई है।

2 पतरस 2:14

उनकी आँख बैबिचार सै भरी भई हैं और उनके भीतर हमेसा पाप की इच्‍छा बनी रैहबै है; जिनके मन जल्दी बहक जावै हैं उनकै बे बहला और फुसला लेबै हैं, उनको मन लालच मै भौत तेज है, और बे सरापित औलाद हैं।

याकूब 1:8

कैसेकै ऐंसो आदमी दो सोच बारो है, और बौ सिगरी बातौं मै डामाडोल रैहबै है।

फिलिप्‍पीऔ 3:19

उनको अन्‍त नास है, और उनको पेटई उनको परमेसर है, और बे अपनी बेजती की बातौं मै घमंड करै हैं, और दुनिया की चीजौ मै मन लगाए रैहबैं हैं।

1 पतरस 2:8

और जौ बौई पत्‍थर है जिस्सै लोगौ कै ठोकर लगैगी और जौ एक चट्‍टान है जिस्सै लोग गिर जावै हैं; कैसेकै बे तौ बचन कै ना माननै की बजै सै ठोकर खावै हैं और उनकै इसई के ताँई बनाओ बी गओ है।

मत्‍ती 22:29

ईसु नै उनकै जबाब दओ, “तुम लोग ना तौ पबित्‍तर सास्तर जानौ हौ और नाई परमेसर की सकति कै, इसताँई भरम मै पड़े भए हौ।

यहूदा 1:4

कैसेकै हमरे बीच मै कुछ बुरे लोग चोरी सै घुसे हैं, और बे परमेसर की किरपा को फाएदा गलत कामौ कै कन्‍नै के ताँई कर रए हैं, और जो हमरो एकई मालिक और परभु ईसु मसी है, बाकै ना मानै हैं। पबित्‍तर सास्तर मै पैलेई ऐंसे लोगौ के ताँई सजा के बारे मै लिखो भओ है।

2 पतरस 2:1

और जैसे उनके बीच मै झूँटे भबिसबानी कन्‍नै बारे हे, बैसेई तुमरे बीच मै झूँटे सिकानै बारे बी हौंगे, जो चुपके चुपके नास कन्‍नै बारी झूँटी सिक्‍छा कै सिकाबै हैं, और बे बा मालिक को इनकार करै हैं जिसनै उनकै मोल लओ हो, ऐंसो करकै बे अपने ऊपर नास कै जल्दी बुलाबै हैं।

मत्‍ती 15:3

ईसु नै जबाब दओ कै, “तुम बी अपने रीति-रिबाजौ के नाम मै परमेसर के नियम काए तोड़ौ हौ?

1 पतरस 1:1

पतरस जो ईसु मसी को भेजो भओ चेला हो बाकी ओर सै, परमेसर के उन चुने भएऔं के नाम जो परदेसी होकै, पुन्‍तुस, गलातिया, कपदुकिया, एसिया और बिथुनिया इलाके मै सबई इतै-उतै रैहबै हैं।

2 पतरस 3:2

तुम उन बातौं कै जो पबित्‍तर नबिऔ नै पैलेई सै कैंई हीं; उनकै याद करौ और परभु और मुक्‍ति दैनै बारे की आगियाँ कै, जो भेजे भए चेलौ के दुआरा तुमकै दई हैं याद करौ।

2 पतरस 3:14

इसताँई पियारे दोस्तौ, जब तुम इन बातौं की आस रक्‍खौ हौ तौ ऐंसी कोसिस करे करौ कै तुम लोग परभु की नजरौ मै बिना कलंक के और बिना गलती के बाके संग मेल-जोल रखे करौ।