2 कुरन्‍थियों 8:9 - बुक्सा

⁹ कैसेकै तुम हमरे परभु ईसु मसी की किरपा कै जानौ हौ और जौ बी जानौ हौ कै सेट होते भए बी बौ तुमरे ताँई गरीब बनो जिस्सै कै बाके गरीब होनै सै तुम सेट हो जाऔ।

2 कुरन्‍थियों 8:9 Referans Kwoze

रोमियो 8:32

बौ जिसनै अपने लौंड़ा तक की परवा ना करी, पर उसकै हम सबके ताँई दे दओ, तौ बौ उसके संग हमकै सब कुछ मुफत मै काए ना देगो?

मत्‍ती 20:28

कैसेकै आदमी को लौंड़ा बी अपनी सेवा करानै ना पर सेवा कन्‍नै और भौतौं की मुक्‍ति के ताँई अपने पिरान दैनै आओ है।”

रोमियो 5:8

पर परमेसर नै हमरे ऊपर अपनो पियार दिखाओ। जबकि हम तौ पापी हे, तब्बी मसी नै हमरे ताँई अपनी जान दे दई।

2 कुरन्‍थियों 6:10

हम दुखी लोगौ के हाँई दिखाई देवै हैं, पर हम हमेसा खुस रैहबै हैं। हम गरीब लोगौ के हाँई दिखाई देवै हैं, पर दूसरौं कै सेट बना देवै हैं। लोग समजै हैं कै हमरे धौंरे कुछ ना है तौबी हमरे धौंरे सब कुछ है।

इफिसिऔ 2:7

कै बौ हमरे ऊपर अपनी बा दया सै जो ईसु मसी मै है, आनै बारे बखत मै अपने किरपा के धन कै दिखाऐ।

यहून्‍ना 1:14

और बचन आदमी बनकै हमरे बीच मै रैहओ, और बौ किरपा और सच्‍चाई सै भरो भओ हो और हमनै उसकी ऐंसी महिमा देखी जैसी अब्बा के इकलौते लौंड़ा की महिमा।

याकूब 2:5

हे मेरे पियारे भईयौ सुनौ; का परमेसर नै जा दुनिया के गरीब लोगौ कै ना चुनो कै बे बिसवास मै पक्‍के और मसी के राज के अधकारी हौं, जिसको बादो बानै अपने पियार कन्‍नै बारौ से करो है?

इफिसिऔ 3:8

मैं परमेसर के सबई पबित्‍तर लोगौ मै छोटे सै बी छोटो हौं, तब्बी मैंकै जौ बरदान मिलो कै मैं गैर यहूदी लोगौ कै कबी खतम ना होनै बारे मसी की बरकत की अच्‍छी खबर सुनाऔ।

1 तीमुथियुस 6:18

जाऔ उनकै हुकम दो कै बे भलाई करैं और भलाई के काम मै सेट बनै, और दान दैनै बारे और सायता कन्‍नै मै अग्गे आँय।

2 कुरन्‍थियों 13:14

परभु ईसु मसी की किरपा और परमेसर को पियार और पबित्‍तर आत्‍मा को सात तुम सबई जनी के संग बनो रैह।

लूका 16:11

अगर तुम दुनियादारी की धन-दौलत समारने मै ईमानदार ना रैहए तौ परमेसर तुमकै उस सच्‍चे धन कै कैसे सौंपैगो?

इबरानिओ 1:2

पर अब इन आखरी दिनौ मै बानै अपने लौंड़ा के दुआरा हम सै बात करीं जिसकै परमेसर नै सिगरी चीजौ को हकदार ठैरार खाओ है और बाईके दुआरा बानै सिगरी दुनिया बनाई।

लूका 9:58

ईसु नै बासै कैई, “लौमड़िऔं के भिट्‍टे और आसमान के पंछिऔ के बसेरा होवै हैं, पर आदमी के लौंड़ा के ताँई खोपड़ी छुपानै की बी जघै ना है।”

परकासन 3:18

इसताँई मैं तेकै सला देरओ हौं कै आग मै सुद्‍द करो भओ सौनो मैंसै मोल लेकै तू सेट हो जाय और सपेद लत्‍ता मोल ले ले जिसकै पैहरकै तेरे नंगेपन की सरम ढक जाय और अपनी आँख मै लगानै के ताँई सुरमा मोल ले ले, कै तू देखल लगै।

इफिसिऔ 3:19

और तुम मसी के बा पियार कै बी समज सकौगे जो हमरे गियान सै परे है, तब तुम परमेसर के पूरे सौभाब सै पूरी तरै भर जाऔगे।

1 कुरन्‍थियों 1:4

ईसु मसी की ओर सै जो किरपा तुमकै मिली भई है। बाके ताँई मैं तुमरी ओर सै परमेसर को हमेसा धन्‍नबाद करौं हौं।

लूका 2:7

और उसनै अपने पैलौठे लौंड़ा कै जलम दओ, और लत्‍ता मै लपेट कै खुलड़ी मै रख दओ कैसेकै सराय के भीतर उनके ताँई कोई जघै ना मिली ही।

यहून्‍ना 16:15

जो कुछ अब्बा को है बौ सब मेरो है, इसताँई मैंनै कैई, बौ मेरी बातौं कै सुनकै तुमकै बतागो।

यहून्‍ना 1:17

कैसेकै नियम मूसा दुआरा देए गए, पर किरपा और सच्‍चाई तौ ईसु मसी के दुआरा मिली है।

यहून्‍ना 1:10

बौ दुनिया मै हो और दुनिया बाके दुआरा बनाई गई और दुनिया नै बौ ना पैचानो।

मत्‍ती 8:20

ईसु नै उस्सै कैई, “लौमड़िऔं के भिट्‍टे और आसमान के पंछिऔ के बसेरा होवै हैं, पर आदमी के लौंड़ा के ताँई खोपड़ी छुपानै की बी अपनी जघै ना है।”

परकासन 21:7

जो जीतैगो, बो उन सब चीजौ को मालिक बनैगो। मैं उसको परमेसर हौंगो और बौ मेरो लौंड़ा होगो।

1 कुरन्‍थियों 15:47

पैलो आदमी धरती की मट्‍टी सै बनाओ पर दूसरो आदमी मसी सुरग सै आओ।

रोमियो 11:12

और अगर उनके गलत कदम सै, सिगरी दुनिया सेट हो गई, और उसके कामियाब ना होनै सै गैर यहूदी लोग सेट हो गए, तौ सिगरे यहूदी लोगौ के बापस आनै सै कितनो जादा फाएदा होगो।

यहून्‍ना 17:19

और उनके ताँई मैं अपने आपकै पबित्‍तर करौं हौं, कै बे बी सच के दुआरा पबित्‍तर करे जांऐ।

यहून्‍ना 12:30

ईसु नै जबाब देते भए कैई, “जौ आकासवानी मेरे ताँई ना पर तुमरे ताँई भई है।

मरकुस 6:3

का जौ बौई बढ़ई ना है जो मरियम को लौंड़ा है, और का जौ याकूब, योसेस, यहूदा और समौन को भईया ना है? का जाकी बहन हमरे बीच ना रैहबैं हैं?” जिस्सै उनकै ईसु मै बिसवास कन्‍नै मै मुसकल भई।

मत्‍ती 17:27

फिर बी हम उन लोगौ कै गलत उदाहरन ना दैं, इसताँई तुम झील के किनार जाकै काँटो डारौ, जो मच्‍छी पैले फसैगी, बाकै पकड़ लेईओ, और बाको मौह खोलौगे तौ तुमकै एक सिक्‍का मिलैगो, उसई कै लेकै मेरे और अपने बदले उनकै दे देईओ।”

कुलुसिऔं 1:24

इस बखत तुमरे ताँई मैं जो बी मुसीबत उठा रओ हौं, बाके बजै सै मैं खुस हौं। मसी को सरीर मतलब बिसवासिऔ की मंडली के ताँई मसी के दुख उठानै की जो बी कसर मेरी रैह गई है, बौ मैं अपने सरीर मै लेकै पूरी करौ हौं।

लूका 8:3

और हेरोदेस को इन्‍तजाम कन्‍नै बारो भन्डारी खोजा की बईयर योअन्‍ना, संग मै सुसन्‍ना और भौस्सी बईयरैं बी हीं, जे बईयरैं अपनेई पैसौ सै ईसु और बाके चेलौ की सेवा करै हीं।

रोमियो 15:3

कैसेकै मसी नै बी अपने सुक को धियान ना रक्‍खो। जैसो कै पबित्‍तर सास्तर मै लिखो है, “जो बेजती उनौनै तेरी करी बौ मेरे ऊपर आ पड़ी।”

परकासन 2:9

“मैं तेरे कलेस और गरीबी कै जानौ हौं फिर बी तू सेट है, और जो लोग अपने आपकै यहूदी कैबै हैं पर हैं ना, पर सैतान की सभा हैं, उनौनै तुमरी बुराई बतकाई, मैं बाकै बी जानौ हौं।