रोमी 13:12 - थुलुङ राई

¹² तुकुम्‍चिम हुक्‍तामा ओल रोमु खाप्‍डु़म बु। मेम्‍मिमका तुकुम्‍चिमगोडा बाट्‍पा मु़चु़मिमकाम होप्‍माम खारी बोमु डिसाका मेरामनुङ क्‍वाल्‍बा बोमु लागि ओलकु सेनामिम होङङा झो़म्‍सिडी।

रोमी 13:12 Referans Kwoze

एफिसी 5:11

हाम वो जो़पा मेदु़म्‍पा तुकुम्‍चिमकु खारी बेपा मु़चु़मिमनुङ मेलाम्‍दिनी, लावो मेराम खारी ने मेजो़पा र्‍वाक्‍साका मु़चु़मिमलाई रेम्‍बेपा दु़म्‍नी।

२ कोरिन्‍थी 6:7

आच्‍छाङाकाम सिजेम नुङ माम्‍चु़नीकु यु़मका उनीमा खारी बेपा मु़चु़ र्‍वाक्‍साका रेम्‍बोकु। गुइलाई बोपा-थार्पा मा क्‍वाल्‍बा बेपा इकीमा गिजो-वाजो र्‍वाक्‍मा ने माम्‍चु़नीकु ङादोडा जो़पा दु़म्‍साका खारी बोमु सो़।

याकूब 1:21

मेम्‍मिमका खोत्‍ले घ्रामलु़पा ल्‍वामिम नुङ मेजो़पा ल्‍वामिम पार्नी, मा इनीमा गोगोडा ख्‍लिम्‍थाट्‌मा माम्‍चु़नीकु सिजेम याक्‍के दु़म्‍साका रनी। मेरामका गानीलाई सेल्‍मु चाम्‍नी।

एफिसी 4:22

मेम्‍मिमका लु-फेले बेसाका मेजो़पा दु़स्‍ताम ङादोम इनीमा बासी-दोसी नुङ इनी लाम्‍दीसी छा पार्नी।

रोमी 13:14

मेम बोमु डिसाका जो़पा ये फम्‍सिक्‍मा होम्‍साका येशू ख्रीष्‍टकु जो़पा बासीदोसीडा लाम्‍दीइ। त्‍वाकु छु़लनुङमा मिरो़मडाम नसीहोमका मेदोसी।

रेम्‍बेट्‌मिडिम ल्‍वा 22:10

मेम्‍मा गुका आरे बेङ्‌डी, “ओराम खाजेमडा बाट्‌पा माम्‍चु़नीलाम जेम्‍मा सिजेममिमडला छाप मेओप्‍डा, हेङालोने थारी रोक्‍फाड्‌डाम बु।

१ पत्रुस 2:1

मेम्‍मिमका खोत्‍ले मेजो़पा ल्‍वा, लिमा जेसी, मिनी मिक्‍सीलामडा जो़पा बेपा लिसिसी, नाचु़र नुङ डक्‍साका जेपा जेसीमिम पार्नी।

रेम्‍बेट्‌मिडिम ल्‍वा 1:3

ओम्‍लो नुङ दिफु दु़म्‍पा ल्‍वाकु दुथाम जेम्‍मा ओराम सिजेम उहेम मु़चु़का डाडु़ मेरामलाई माम्‍चु़नीका जि-वा ग्‍वामी। मेम्‍मा ओराम सिजेम सु़का थो़सु़ मा ओराम सिजेमका र्‍वामिम होङङा बु़, मेरामलाई गुमीका जि-वा ग्‍वामी, हेङालोने ओर्मिम खोत्‍ले दु़म्‍पा थारी रोम्‍फामु खाप्‍डु़म बु।

१ कोरिन्थी 7:29

वा-ल्‍वाकनी, गो गानीलाई र्‍वामु मालुमिम ल्‍वा ओरामङा सो़, ङाचो़ दालाङा योमी। आथाडा आनो नाइमे बाट्‌पामिमका नाइमे मेबाट्‍पा होप्‍मामङा दु़म्‍साका बुमिनु़।

१ कोरिन्थी 10:11

मेर्मिम मु़चु़डला हा-हाम दु़स्‍ताम मेर्मिम खोत्ले चङचङया बाबेट्‍पा ल्‍वामिम सो़। मेर्मिम ल्‍वालामका गुइलाई चङचङया बाबेन्‍मु लागि र्‍याक्‍मा बाइडा, हेङालोने गुइ सु़म्‍दिसेरकु हुक्‍पा थारीडा रोम्‍थिमु खाप्‍डिम बु,

२ कोरिन्‍थी 10:4

गुइ क्‍वाल्‍बा बिइमिम गिजो-वाजो ने सु़म्‍दिसेरडाम मु़चु़मिमका मोक्‍पा गिजो-वाजो मेएँ। गुइ मोक्‍थालिमिम माम्‍चु़नीकु यु़मनुङमा गिजो-वाजोका ने खिर्मा खोम वो छो़रो़प बु़। ओराम गिजो-वाजोका हाम ना हामकु रिबुसी ल्‍वा दाम्‍बेडु़।

एफिसी 5:8

ङादो गानी तुकुम्‍चिमगोडा बान्‍नी, लावो आथा ने ङाचो़ येशूलाममिम ओलडा रोक्‍निम बु। मेम्मिमका आथाडा आनो गानी ओलचो़ होम्‍साका बानी दोनी।

हिब्रू 10:25

कोङनिमका थो़रलु़पामिमकाम घ्रो़म्‍दीडा मेलक्‍पा बादु़खाम दु़म्मिम होङङा घ्रो़म्‍दीडा लमु मेडिडी। लावो ङाचो़ येशू योमु खाप्‍मिमिम गानी खोत्‍लेका ल्‍वानिमिमका कोलेका कोङमीलाई आथावो छो़म सो हन्‍बेबिइ।

हिब्रू 12:1

उनी थो़र रेम्‍बेपा आरेप्‍माम सेर्पा मु़चु़ इकीमा होनोलाम-आथो़लाम बुमी। मेम्‍मिमका गुइलाई भोपा खोत्‍ले ल्‍वा नुङ हाम वो लु़मेलेसाकाङा आम्‍पा छु़ल पार्तो गुइलाई रेम्‍बेट्‌मा ओन्‍सीथो़ हाम वो मेर्‍वाक्‍साका इम्‍तो ओन्‍डी।

याकूब 5:8

मेम्‍साकाङा गानी वो इम्‍सिक्‍साका बानी मा इनी न-गो बन्‍थाट्‌नी। हेङालोने येशू योमु खाप्‍मिमिम बु।

१ पत्रुस 4:7

सु़म्‍दिसेरकु हुक्‍पा थारी रोक्‍फाड्‌डाम बु। मेम्‍मिमका चङचङया बानी मा इनी त्‍वापलाई जो़होमका जु़ल्‍नी, मेम्‍मा गानी सो़म्‍दी बोमु चापा दु़म्‍नी।

२ पत्रुस 3:9

ङाचो़का याचे जेम्‍डिमडा गुमी छु़मी र्‍वाक्‍पा याङ-याङकु थेसिथेसी होङङा ङाचो़ मेछु़मी। सु़ वो पुयु़मेलुमिनु़, लावो खोत्‍लेका मेजो़पा खारी बोमु डिन्‍मिनु़मा गुमीडा ख्‍लोम्‍सिमिनु़ र्‍वाक्‍साका गुमीका गानीलाई इम्‍साका लम्‍थामी।

२ पत्रुस 3:11

खोत्‍ले आरेसाकाङा पुयु़लुमी। मेम्‍मिमका गानी हेप्‍माम मु़चु़ दु़म्‍मु बासी? गानी सेपा दु़म्‍साका माम्‍चु़नीकु लाम्‍दीडा लाम्‍दिमु बासी।

१ यूहन्‍ना 2:18

आमा चो़च्‍चो़मिम होप्‍माम मु़चु़नी, हुक्‍पा थारी ओरामङा सो़। ख्रीष्‍टकु कोर्थो़लाम बक्‍पा मु़चु़ रोक्‍तोङा लेडु़ र्‍वाक्‍पा गानी थो़न्‍निम होङङा ओम्‍लो वो ख्रीष्‍टकु कोर्थो़लाम बक्‍पा हापा मु़चु़मिम रोम्‍डिम बु। मेम्‍मिमका ओराम थारी हुक्‍पा थारी र्‍वाक्‍पा गुइ च।