Biblia Todo Logo
Bib sou entènèt

- Piblisite -




यूहन्‍ना 17:6 - थुलुङ राई

6 “सु़म्‍दिसेरलामका गानी गोलाई ग्‍वाङ्‌डिनिम मु़चु़मिमकाडा गो गानीलाई छेबेट्‌निनिम बु। मेर्मिम मु़चु़ इनीमाङा बाम्‍डी, मा मेर्मिम गोलाई ग्‍वाङ्‌डिनी। मेर्मिमका इनीमा सिजेम होम्‍साका दोम्‍डिम बु।

Gade chapit la Kopi




यूहन्‍ना 17:6
48 Referans Kwoze  

गोलाई बेङ्‌डिनिम इनीमा रिखाम मेर्मिमकाडा दु़म्‍नु़, मा गो आ त्‍वाप मेर्मिमकाडा दु़म्‍ङुनु़ र्‍वाक्‍साका गो गानीलाई थो़रलु़पामिमकाडा छेबेट्‌निनिम बु मा छेबेनिनिमिम बुङु।”


माम्‍चु़नीकु तारापाचो़ योम्‍डिम बुमी, मा आच्‍छाङाकाम माम्‍चु़नीलाई गुइ छेडिनु़ र्‍वाक्‍साका गुमीका गुइलाई न ग्‍वाक्‍साड्‌डामिम बु र्‍वाक्‍पा गुइ चडिम बु। गुइ माम्‍चु़नीडा बुइ हेङालोने उनीमा तारापाचो़ येशू ख्रीष्‍टडा गुइ बुइमिम बु। गुमी कोङङा आच्‍छाङाकाम माम्‍चु़नी मा हेल्‍लो वो मेसिपा त्‍वारो़म गुमीङा।


पापका ग्‍वाङ्‌डिमिम खोत्‍ले मु़चु़ आमाडा रोमी, मा आमाडा रोक्‍पामिमलाई गो हेल्‍लो वो मेकोलुमी।


“पाआ, गानी गोलाई ग्‍वाङ्‌डिनिम मु़चु़मिम बान्‍ते गो बुङु, मेसिन्‍डा गोनुङ दु़म्‍मिनु़ र्‍वाक्‍पा आमा न बु। सु़म्‍दिमो ङादोङा गानी गोलाई रिखाम बेङ्‌डिनिमका ग्‍वाङ्‌डिनिम यु़म-झ्‍वाक्‍सी मेर्मिमका रेम्‍मिनु़ र्‍वाक्‍पा वो न बेउ।


हेङालोने गानी गुलाई ग्‍वाक्‍निम खोत्‍ले मु़चु़लाई मेसिपा त्‍वारो़म ग्‍वाक्‍नु़मी र्‍वाक्‍साका खोत्‍ले मु़चु़डला गुलाई साखाम ग्‍वाक्‍निम बु।


“तुकुम्‍चिमलाम ओल झ्‍वानु़” र्‍वाक्‍पा माम्‍चु़नी ङा आकीमा नडा उनीमा ओल झ्वाबेसाका माम्‍चु़नीकु यु़म-झ्‍वाक्‍सीकाम नेप्ची गुकुलाई थेसिथेन्‍बेत्तिकी। आच्छाङा ओराम ओल येशू ख्रीष्‍टकु ङालीडा झ्‍वा।


गानी सु़म्‍दिसेरकु मु़चु़ दु़म्‍निवाम माला मेर्मिमका गानीलाई त्‍वाकु मु़चु़ मिम्‍निवामा रिखाम बेनिवा। लावो गानी ने सु़म्‍दिसेरकु मु़चु़ मेएँ। गानीलाई सु़म्‍दिसेरलामका गो छेट्‌निनी मेम्‍मिमका गानीलाई सु़म्‍दिसेरडाम मु़चु़मिमका मेद्‌वानिमी।


इमा खारीमिम गो चक्‍पु। रेप्‍डा, इमा लागि गो लाम्‍चोको होल्‍साट्‌निम बु, मेराम सु़का वो ख्‍लु़न्‍मु मेचाम्‍मी। गानानुङ कि-कि यु़म बु मेम मावो आमा सिजेम होङङा गाना लाम्‍दिन्‍नाम बु मा गाना थो़रलु़इमिम दु़म्‍नाम बु।


लावो येशू ने माम्‍चु़नीकु नेमडाम मु़चु़मिमलाई रेपा थो़रलु़इमिम उनीमा तारापाचो़ सो़। गुइ मेङिसाका हाम हुम लथाडी माला माम्‍चु़नीकु मु़चु़मिम दु़म्‍सी सो़।


गानी गोगोडा दु़म्‍निमा आमा सिजेम गानीगोडा बु माला हाम न बोनी, मेराम बिनी, मा गानी ल्‍वानी।


गानी बान्‍ते बुनी गो चक्‍पु, शैतानका साखाम थो़डु़मिम खोमडा गानी बुनी। मेम्‍मा वो गानी गोडला थो़रलु़इमिम बुनी। एन्‍टिपासडला हाम दु़स्‍ता र्‍वाक्‍पा वो गो चक्‍पु। गु आमा दुथाममिम ल्‍वा मु़चु़मिमलाई थो़बेन्‍मुडा थो़रलु़इमिम बाइडा। शैतानकु मेराम शहरडा गुलाई सेट्‌मिडी लोवो गोडला बेन्‍निम इनीमा थो़रलामका गानी मेख्‍लोन्‍सिट्‌निवा।


गुमीका र्‍वामी, “गो वा-ल्‍वाकमिमलाई इनीमा नङ थो़बेट्‍पुमी मा खोत्‍ले थो़रलु़पामिमनुङ इनीमा नङ कोक्‍पा काम्‍सो बेउ।”


गोलामका गाना थो़न्‍नाम आच्‍छाङाकाम सीसिडा जो़होमका लाम्‍दियाम बाया मा मेराम सीसि बोथाडा-थार्थाडा। मेम्‍मा ख्रीष्‍ट येशूडा बाट्‌पा इमा थो़र नुङ वाङमिमडला बोनामिम इमा रिखामडा गाना मेराम रेम्‍बेपा दु़म्‍सा।


ख्रीष्‍टकु सिजेम हाङकोलो लोवो इनीमा न-गोडा जु़ल्साका नु़निम बानी। सीबोनिलो नुङ मुलु़ ग्‍वाबोनिलो नेप्‍चीनुङमाका बेनी। माम्‍चु़नीकु सिजेमगोडाम काम्‍सो, उनीमा नङ कोमु काम्‍सो नुङ उनीमा दुथाममिम वाङमिम काम्‍सोमिम बेत्तो माम्‍चु़नीलाई न-गोलामका आलासो़ ग्‍वाक्‍नी।


माम्‍चु़नीका ङादो आथामङा छेट्‌मिडिम उनीमा त्‍वाकु मु़चु़मिमलाई ङेट्‌मिडिम मिबु। हाम एलियाकु दुथाम माम्‍चु़नीकु सिजेमडा र्‍याक्‍मा ल्‍वा चनिम मिबु? इस्राएलीमिमकु कोर्थो़लाम एलियाका आरेसाका र्‍वाक्‍ताम बु,


वाङसामामिमका ओराम ल्‍वा थो़म्‍डिमा छो़म गेर्सिम्‍डी, मा माम्‍चु़नीकु सिजेमकाम लागि आलासो़ ग्‍वाम्‍डी। मेकोतिमा हेल्‍लो वो मेसिपा त्‍वारो़म ल्‍वामु र्‍वाक्‍साका छेट्‌मिडिम खोत्‍ले मु़चु़का थो़र लु़म्‍डी।


“गानी गोलाई ग्‍वाङडिनिमगोडाम कोलेलाई वो गो मेदाम्‍पुमिवा” र्‍वाक्‍साका येशूका र्‍वाम्‍डिम ल्‍वा रोम्‍थिमु लागि आरे दु़स्‍ताम।


गो सु़म्‍दिसेरकाम मेएँ, मेप्‍माङा मेर्मिम वो सु़म्‍दिसेरकाम मेएँ।


गो मेर्मिमलाई इनीमा सिजेम ग्‍वाक्‍तोमी, मा सु़म्‍दिसेरडाम मु़चु़मिमका मेर्मिमलाई मेद्‌वाक्‍मिवा, हेङालोने गो सु़म्‍दिसेरकाम मेएँ, मेप्‍माङा मेर्मिम वो सु़म्‍दिसेरकाम मेएँ।


गो गानीलाई र्‍वाङ्‌डोम सिजेमका गानी बासीङा सेपा दु़म्‍मु दु़म्‍निम बु।


ए पाआ, गानी हाङकोम यु़म-झ्‍वासिक्‍पा बुनी र्‍वाक्‍पा रेम्‍बेनी।” मेकोतिमा पाह्रीलामका कोले लो़लामका र्‍वाक्‍ता, “गो ओराम यु़म-झ्‍वाक्‍तोम बु, मा आथावो ओराम यु़म-झ्‍वाक्‍पु।”


गोलाई थु़र्पा माम्‍चु़नीकु न आरेप्‍माम बु, गुमीका गोलाई ग्‍वाङ्‌डिमिम मु़चु़मिमगोडाम कोलेलाई वो मेदाम्‍पुनु़, लावो हुक्‍पा थारीनेम नु़बेट्‌पुमिनु़।


सु़का वो माम्‍चु़नीलाई हेल्‍लो वो ल्‍वास्‍तु़म मिबु। पापनुङ बाट्‌पा माम्‍चु़नी होप्‍मामङा तारापाचो़का माम्‍चु़नीलाई रेम्‍बेसाड्‌डामिम बु।


येशू ख्रीष्‍टकु थु़र्मा पत्रुसका, पोन्‍टस, गलातिया, कापाडोकिया, एशिया नुङ बिथिनिया क्षेत्रडा फोन्‍सिक्‍साका वाङथो़लाम रोक्‍पामिम होङङा बाट्‌पा माम्‍चु़नीका छेट्‌मिडिम मु़चु़मिमलाई ओराम सेलाखाजेम र्‍याक्‍तोङा लेट्‌पु।


आच्‍छाङा गो गानीलाई र्‍वाङु, कोङनिम मु़चु़ आमा सिजेम होम्‍साका दोस्‍ता माला मेराम मु़चु़ हेल्‍लो वो मेसि।”


यहूदीमिमका गुमीलाई र्‍वाम्‍डी, “गानालाई मुनाङका हुप्‍नामङा बु र्‍वाक्‍साका गुकु चक्‍तोको। अब्राहाम सिडा, मा माम्‍चु़नीलाम-जेपामिम वो सिम्‍डी, लावो गाना र्‍वाना, कोङनिम मु़चु़ आमा सिजेम होम्‍साका दोस्‍ता माला मेराम हेल्‍लो वो मेसि।


गानी गोलाई ग्‍वाङ्‌डिनिम खोत्‍ले ल्‍वा गानीलामका रोक्‍ताम र्‍वाक्‍साका मेर्मिमका चम्डिम बु।


गो आसिन्‍डा बाङडोम थारीका गानी ग्‍वाङ्‌डिनिम नङकु यु़मका मेर्मिमलाई बोत्तोमी-थार्तोमी, मा इनीमा सिजेम होङङा मेर्मिमगोडाम कोले कोङङा पुयु़लुस्‍ता।


गो र्‍वाङ्‌डोम होङङा गाना इम्‍सिक्‍साका बेन्‍ना। मेम्‍मिमका रोमु खापा दु़खा थारीडाम गो गानालाई बोनी-थार्नी। मेराम दु़खा ने सु़म्‍दिसेरडा बाट्‌पामिम खोत्‍लेडला रो।


Swiv nou:

Piblisite


Piblisite