२ कोरिन्‍थी 3:6 - थुलुङ राई

⁶ गुमीका गुकुलाई लाले सो़रख्रेप्‍सीकु डु़ल्‍चो़ दु़म्‍मु चापा दु़म्‍बेत्तिकिमिम बु। ओराम लाले सो़रख्रेप्‍सी ने र्‍याक्‍मा डु़म्‍लामिम मेएँ, लावो माम्‍चु़नी-पेललाम सो़। र्‍याक्‍मा डु़म्‍लाका सिमुलाम रेडु़, लावो माम्‍चु़नी-पेलका ने त्‍वारो़म ग्‍वाक्‍सामी।

२ कोरिन्‍थी 3:6 Referans Kwoze

यूहन्‍ना 6:63

पेलका कोङङा त्‍वारो़म ग्‍वाक्‍सा। मु़चु़कु सोका हाम वो मेबु़। गानीनुङ जेङडोम सिजेम ने त्‍वारो़म ग्‍वाक्‍पा पेल सो़।

रोमी 7:6

ओम्‍लो गुइ ख्रीष्‍टनुङङा सिइडिमका डु़म्‍लालाम वाङ दु़स्‍तिम बु। आथा ने गुइ माकेम र्‍याक्‍मा डु़म्‍लाका र्‍वामिम होम्‍साका मेएँ, लावो माम्‍चु़नी-पेललाम लाले त्‍वारो़म होम्‍साका लाले-पाङके बिइ।

रोमी 8:2

हेङालोने ख्रीष्‍ट येशूलाम त्‍वारो़म ल्‍वापा, माम्‍चु़नी-पेलकु डु़म्‍लाका छु़ल नुङ सिमुलाम रेट्‍पा डु़म्‍लाडाम गोलाई सेल्‍ङिडिमिम बु।

हिब्रू 12:24

लाले सो़रख्रेप्‍साक्‍पा येशूकाडा, मा हाबिलकु सिसिडाम वो जो़पा ल्‍वा जेपा रक्‍मा सिसिकु ङादोडा गानी रोक्‍निम बु।

हिब्रू 7:22

ओराम कसमलामका ङा येशूलाई ङादोम सो़रख्रेप्‍सीडाम जो़पा सो़रख्रेप्‍सी बेप्‍सोक्‍पा दु़म्‍बेडु़मी।

२ कोरिन्‍थी 3:14

मेराम थारीका इस्राएलडाम मु़चु़मिमकाम थेसीथेट्‍पा न हुप्‍मा बाइडा। आथाल-दिका वो माम्‍चु़नीकु ङादोम सो़रख्रेप्‍सी डान्‍मिलो मेर्मिमका थेसिमेथेन्‍मी। मेर्मिमका ख्रीष्‍टडा थो़र लु़साका कोङङा उनीमा नडा हुप्‍मा ल्‍वा पार्सी मा थेसिथेन्‍मु चाम्‍मी।

१ कोरिन्थी 15:45

मेम्‍मिमका माम्‍चु़नी सिजेमडा र्‍याक्‍मा बु, “खोत्‍लेडाम ङादोम मु़चु़ आदम उ सामनुङमा दु़स्‍ता।” लावो चङडाम आदम त्‍वारो़म ग्‍वाक्‍पा पेल सो़।

रोमी 3:20

डु़म्‍ला होम्‍साका दोपा मु़चु़ सु़ वो माम्‍चु़नीकु ङादोडा जो़पा मेदु़म, हेङालोने डु़म्‍लाका ने मु़चु़का बेम्‍डिम छु़ल रेम्‍बु़।

हिब्रू 13:20

भेन्‍दा रेपा-क्रिपा डोक्‍पु इकीमा ङाचो़ येशूलाई हेल्‍लो लोवो दु़म्‍पा लाले सो़रख्रेप्‍सीकु सिसिका सिमुलाम फक्‍साका न-भ्रसी बेट्‌पा माम्‍चु़नीका

लूका 22:20

ग्रुला पेम्‍डिमा येशूका अङ्‍गूरकु बिलामनुङमा कोङमी कान्‍चु़रे कोम्‍डिमा उनी सीसिपामिमनुङ र्‍वाम्‍डी, “ओराम कान्‍चु़रे आमा सिसिका माम्‍चु़नीनुङ उनी मु़चु़मिमकाम लाले सो़रख्रेप्‍मा सो़, मेराम इनीमा लागि सासेसाका हासी सो़।

१ कोरिन्थी 11:25

मेम्‍साकाङा पेम्‍डिमा गुमीका कान्‍चु़रे झेट्‌मिडी, मा र्‍वाम्‍डी, “ओराम कान्‍चु़रे आमा सिसिडाम लाले सो़रख्रेप्‍मा सो़। गानी हाम्‍सी ओराम डुनी, गोलाई मिम्‍मु आरे बेनी।”

मत्ती 13:52

मेकोतिमा गुमीका मेर्मिमलाई र्‍वाम्‍डी, “पाह्री-किब्‍दीकु दुथाम सीसिपा डु़म्‍ला सीपा खोत्‍ले मु़चु़ कोले नेमहप होप्‍मामङा सो़, उहेमका उ छेदेनेमलामका माकेम नुङ हापा थिकाम लाले सोजाम ख्‍लुकु़मी।”

१ पत्रुस 3:18

इकीमा छु़लमिमकाम लागि ख्रीष्‍ट सिम्‍डी। कोखेप गुमी सिम्‍डिम बाइडा, आथा ने सिमु मेबासी। गुमीका हेल्‍लो वो छु़ल मेबेमिवा लावो गानीलाई माम्‍चु़नीकाडा रेन्‍मु छु़लचो़मिमकाम लागि गुमी सिम्‍डी। मिरो़मडा सिसाका गुमीका दु़खा ल्‍वाम्‍डी, लावो पेलडा गुमी नु़साका बम्‍गेम्‍डी।

१ तिमोथी 4:6

थो़र लु़पामिमलाई ओर्मिम ल्‍वा सीनामी माला गाना ख्रीष्‍ट येशूकु कोले जो़पा डु़ल्‍चो़ दु़म्‍ना। मेम्‍मा गाना लाम्‍दित्तोङा बोनामिम इकीमा थो़रकु दुथाममिम सीसिडा नुङ जो़पा सीसिडा गाना बर्नाम रेम्‍बोना।

एफिसी 3:7

माम्‍चु़नीकु डोक्‍पु दिदाम नुङ यु़मलामका माम्‍चु़नीका गोलाई राप्‍लावा ग्‍वाक्‍साका जो़पा-सेला थो़बेट्‌पा उनीमा डु़ल्‍चो़ दु़म्‍बेट्‌ङिडिमी।

गलाती 3:21

मेम माला हाम डु़म्‍ला ने माम्‍चु़नीका याचे जेम्‍डिम ल्‍वाकु कोर्थो़लाम मा? मेएँ, डु़म्‍लाका मु़चु़मिमलाई त्‍वारो़म ग्‍वामु चाप्‍सु़वाम माला ने गुइ डु़म्‍ला होम्‍साका दोसाकाङा माम्‍चु़नीकु ङादोडा जो़पा न-गोकाम दु़म्‍सिवा।

२ कोरिन्‍थी 3:7

लुङकु र्‍याखोपडा डु़म्‍ला र्‍याम्‍डिमा ग्‍वाम्‍डिम थारीका माम्‍चु़नीकु यु़म झ्‍वाक्‍सी रेम्‍बेसिड्‍डा। मेराम यु़म झ्‍वाक्‍सीका मोशाकु कल झ्‍वाक्‍ताम बाइडा। मेप्‍माम झ्‍वाक्‍पामा वाखाताम दाम्‍तो लक्‍पा ल्‍वा लोवो इस्राएलीमिमका मोशाकु कल रेम्‍मुङा मेचाप्‍मिवा। सिमुलाम रेट्‍पा डु़म्‍ला रेड्‍डु़लो ने मेप्‍माम यु़म-झ्‍वाक्‍सी बाइडा माला,

१ कोरिन्थी 12:28

माम्‍चु़नीका मण्‍डलीडा आरेसाका जु़ल्‍मिडिम बु, ङादोमडा थु़र्मामिम, मेरामकु चङडा माम्‍चु़नीलाम जेपामिम, मेकोतिमा सीपा मु़चु़मिम। मेम्‍मा हेल्‍लो वो मेल्‍वाम्‍मा खारी बेपामिम, मा नो़पामिमलाई सबेट्‌पा राप्‍लावा ल्‍वापामिम, वाङमिमलाई ख्‍लो़पामिम, मण्‍डली रेपा बेपा मु़चु़मिम, वाङ सामा ल्‍वा जेमु राप्‍लावा ल्‍वापामिम।

१ कोरिन्थी 3:5

अपोल्‍लोस सु़ मा? मा पावल सु़ मा? गुचुकु ने माम्‍चु़नीकु डु़ल्‍चो़ कोङङा, उहेमलामका गानी थो़र लु़नी। ङाचो़का बेबेच्‍चिकिमिम आची खारी गुचुकु बेच्‍चोकोम सो़।

रोमी 4:15

डु़म्‍लाका र्‍वामिम मेथो़पामिमडला माम्‍चु़नीका छोक्‍चो हान्‍मी, मा डु़म्‍ला मेबायावाम माला ने छु़ल वो मेगक्‍सावा।

यूहन्‍ना 5:21

पापका सिपा मु़चु़मिमलाई फमिमा मेर्मिमलाई मेसिपा त्‍वारो़म ग्‍वामी। मेम्‍साकाङा तारापाचो़का उहेमलाई उ ग्‍वाग्‍वाद्‌वा मेरामलाई मेसिपा त्‍वारो़म ग्‍वाकु़।

मर्कूस 14:24

मेकोतिमा गुमीका मेर्मिमलाई र्‍वाम्‍डी, “ओराम हापा मु़चु़मिमकाम लागि हाट्‌मा सो़रख्रेपा आमा सिसि सो़।

मत्ती 26:28

हेङालोने ओराम माम्‍चु़नीनुङ उनीमा मु़चु़मिमकाम लाले सो़रख्रेप्‍सीकु आमा सिसि सो़। हापा मु़चु़मिमकाम छु़लमिम हेम्‍मु लागि सासेसाका ओराम हासी।

२ कोरिन्‍थी 3:9

मु़चु़लाई मुमा बेट्‌पा डु़म्‍लाकु खारी ने यु़म झ्‍वाक्‍पा बाइडा माला, मु़चु़मिमलाई माम्‍चु़नीकु ङादोडा जो़पा दु़म्‍बेट्‌पा खारी ने मेरामडाम वो हापा यु़म-झ्‍वाक्‍पा दु़म।

रोमी 4:17

माम्‍चु़नीकु सिजेमडा आरेसाका र्‍याक्‍मा बु, “गो गानालाई हापा सामामिमकु पाप दु़म्‍बेट्‌निम बु।” सिपामिमका त्‍वारो़म ल्‍वापा मा मेबाट्‍पा थोकलामका वो बाट्‍पा दु़म्‍बेन्‍मु लागि येट्‍पा माम्‍चु़नीडा अब्राहामका थो़र बु़डु़म बाइडा।

रोमी 1:5

इकीमा ङाचो़ येशू ख्रीष्‍टलामका माम्‍चु़नीका गोलाई दिदाम ग्‍वाक्‍साका उनीमा थु़र्मा दु़म्‍बेट्‌ङिडिमी। खोत्‍ले सामाडाम मु़चु़मिमका थो़रलु़मिनु़ मा गुमीका र्‍वामिमिम ल्‍वा थो़मिनु़ र्‍वाक्‍साका उनीमा नङडा खारी बेप्‍डा गोलाई थु़र्ङिडिमी।

१ यूहन्‍ना 1:1

सु़म्‍दिमोलो आथामङा बाट्‌पा कोले, गुमीलाई गुकु ल्‍वात्तोकोम थो़त्तोकोम बु। गुकु आकी मिक्‍सीकाङा गुमीलाई ल्‍वात्तोकोम बु, मा आकी ल्‍वाकाङा गुमीलाई लु़प्‍तोकोम बु। गुमी येशू ख्रीष्‍ट, त्‍वारो़म ग्‍वाक्‍पा सिजेम।

२ तिमोथी 1:11

ओराम जो़पा-सेलाकाम लागि जो़पा-सेला थो़बेट्‌पा, थु़र्मा नुङ सीपा कोङ मु़चु़ माम्‍चु़नीका गोलाई थुट्‌ङिडिमिम बु।

एफिसी 2:5

गुइ छु़ल बिइडिमका सिप्‍ल्‍याक्‍पा बाइडी लोवो माम्‍चु़नीका ख्रीष्‍टलाई सिमुलाम फम्‍डिलो गुमीनुङङा गुइलाई वो नु़बेसाड्‌डामी। आरेसाका गुमीका न-थो़म रेम्‍बेम्‍डिमा गानी सेल्‍सिट्‌निम बु।

१ कोरिन्थी 3:10

माम्‍चु़नीका गोलाई दिदाम ग्‍वाङडिमिमका नेम बनेबेसी थेट्‌पा मु़चु़ होम्‍साका फार गत्तो मा कोङनिमका मेरामडला नेम बनेबु़। लावो मेरामडला बनेबेत्तो लक्‍पाका हेसाका बनेबोमु बासिक्‍पा मेराम ल्वाडा चङचङया बुमु बासी।

एफिसी 2:1

इनीमा छु़लका नुङ माम्‍चु़नीकु कोर्थो़लाम खारी बेन्‍निमका ङादोम थारीबिलि गानी सिप्‍ल्‍याक्‍पा बान्‍नी।

२ कोरिन्‍थी 3:3

आच्‍छाङा गानी ने ख्रीष्‍टका र्‍याम्‍डिम सेलाखाजेम सो़, मा मेराम सेलाखाजेम रेट्‍पा गुकु ङा। ओराम सेलाखाजेम गेलोङका र्‍याक्‍मा मेएँ, लावो नु़पा माम्‍चु़नीकु पेललामका र्‍याक्‍मा सो़। लुङकु र्‍याखोपडा मेएँ, लावो न-गोडा र्‍याक्‍मा सो़।

२ कोरिन्‍थी 11:23

हाम मेर्मिम ख्रीष्‍टकु डु़ल्‍चो़मिम? गो नेप्‍ची मान्‍थिम होङङा जेत्तोङा लेट्‌पु। गो मेर्मिमडाम हापा जो़पा डु़ल्‍चो़। गो हापा ब्राम्‍दु़ल्‍वा बेउतो। हापा खेप चसिङडोमा बाङडो। हापा इम्‍मु मेचापा बेसाका कोक्‍तेकु रिबाका याल्‍ला सो़सिङडो। हापा खेपङा र्‍वाप्‍डा सिङडो।

हिब्रू 8:13

ओराम सो़रख्रेप्‍सीलाई लाले सो़रख्रेप्‍सी र्‍वाम्‍डी मा ङादोम सो़रख्रेप्‍सीलाई मेमोकिमिम बनेबेम्‍डी। ओराम ने मेमोकिमिम दु़म्‍तो ल मा दालाङा दाम्‍ल्‍या।