१ यूहन्‍ना 5:20 - थुलुङ राई

²⁰ माम्‍चु़नीकु तारापाचो़ योम्‍डिम बुमी, मा आच्‍छाङाकाम माम्‍चु़नीलाई गुइ छेडिनु़ र्‍वाक्‍साका गुमीका गुइलाई न ग्‍वाक्‍साड्‌डामिम बु र्‍वाक्‍पा गुइ चडिम बु। गुइ माम्‍चु़नीडा बुइ हेङालोने उनीमा तारापाचो़ येशू ख्रीष्‍टडा गुइ बुइमिम बु। गुमी कोङङा आच्‍छाङाकाम माम्‍चु़नी मा हेल्‍लो वो मेसिपा त्‍वारो़म गुमीङा।

१ यूहन्‍ना 5:20 Referans Kwoze

यूहन्‍ना 17:3

मेसिपा त्‍वारो़म ल्‍वापा लाम्‍दी ओराम सो़: गानी कोलेङा आच्‍छाङाकाम माम्‍चु़नीलाई मेर्मिमका छेमु, मा गानी थु़र्निम येशू ख्रीष्‍टलाई वो छेमु।

लूका 24:45

मेकोतिमा गुमीका माम्‍चु़नीकु सिजेमडाम ल्‍वा थेसिथेट्‌पा नेप्‍ची मेर्मिमलाई ग्‍वाम्‍डी।

यूहन्‍ना 14:9

येशूका र्‍वाम्‍डी, “फिलिप, आकोम थारीसम्‍म गानीनुङ बाङ्‌डो मा वो गाना गोलाई मेछेङिमिम? उहेमका गोलाई ल्‍वाङ्‌डिम बु, मेरामका पापलाई ल्‍वास्‍तु़म बु। हेसाका गाना ‘गुकुलाई पाप रेम्‍बेट्‌किनी’ र्‍वामु चाम्‍ना?

१ तिमोथी 3:16

सो़रलोले बेपा मिरो़म-त्‍वारो़मकु थक्‍मा ल्‍वा ने हाङको डोक्‍पु बु: ख्रीष्‍ट उनी त्‍वापङा मिरो़मडा ल्‍वाला सो़म्‍सिम्‍डी, माम्‍चु़नी-पेलका गुमीलाई माम्‍चु़नीकु ङादोडा जो़पा दु़म्‍मिडिम रेम्‍बेम्‍डी, पाह्रीचो़मिमलाम ल्‍वाला सो़म्‍सिम्‍डी, मिनी सामामिमका उनीमा दुथाम थो़म्‍डी, सु़म्‍दिसेरडा मु़चु़मिमका गुमीडा थो़र बेम्‍डी, यु़म-झ्‍वाक्‍सीडा गुमी गेले कोम्‍सिम्‍डी।

१ यूहन्‍ना 5:1

उहेम मु़चु़का येशूङा ख्रीष्‍ट र्‍वाक्‍पा थो़र बु़, मेराम मु़चु़ माम्‍चु़नीकु चो़च्‍चो़ सो़। मेम्‍मा उहेम मु़चु़का पापलाई रिखाम बु़ उनीमा चो़मिमलाई वो मेरामका रिखाम बु़।

यूहन्‍ना 20:28

थोमाका गुमीलाई र्‍वाक्‍ता, “आमा ङाचो़, आमा माम्‍चु़नी।”

रेम्‍बेट्‌मिडिम ल्‍वा 3:7

“फिलाडेल्‍फिया मण्‍डलीडाम पाह्रीचो़लाई ओराम ल्‍वा र्‍याका: सेपा नुङ आच्‍छाङाकाम, उहेमका दाऊदकु चाबी जेन्‍थामी, गुमीका आरे र्‍वामी, गुमीका हाम होल्‍मी मेराम सु़का वो ख्‍लु़न्‍मु मेचाप्‍सु़ मा गुमीका हाम ख्‍लु़न्‍मी मेराम सु़का वो होल्‍मु मेचाप्‍सु़।

१ यूहन्‍ना 4:16

माम्‍चु़नीका हाङको छो़म रिखाम बेसाड्‌डामी, मेराम गुइ च, मा गुमीडा थो़र लु़इ। माम्‍चु़नीका खोत्‍ले मु़चु़लाई खोत्‍लेडा रिखाम बोमी, मा उहेम मु़चु़ रिखामडा बु मेराम मु़चु़ माम्‍चु़नीडा बु मा माम्‍चु़नी मेरामकाडा बुमी।

रोमी 9:5

मेर्मिम छो़म नङ दोपा बेप-पापकु चो़-चु़सु़मिम सो़, ख्रीष्‍ट उनी त्‍वाप वो ओराम सामागोडा गम्‍डी। गुमी ने खोत्‍लेडला साखाम थो़पा मा हेल्‍लो लोवो नङ कोसिक्‍पा माम्‍चु़नी बुमी। आमेन।

यूहन्‍ना 10:30

गो नुङ पाप कोलेङा।”

१ यूहन्‍ना 4:2

आरेसाका माम्‍चु़नी-पेललाई गानी छेमु चाम्‍नी: मु़चु़ होङङा येशू ख्रीष्‍ट ओराम सु़म्‍दिसेरडा योम्‍डी र्‍वाक्‍साका उहेम मु़चु़का र्‍वा मेराम मु़चु़काडा बाट्‌पा माम्‍चु़नी-पेल सो़।

१ यूहन्‍ना 2:6

उहेमका गुमीडा बुङु र्‍वा गु येशू बाम्‍डिम-दोम्‍डिम होम्‍साका बुमु-दोमु बासी।

हिब्रू 1:8

लावो तारापाचो़कु दुथाम आरेसाका र्‍याक्‍मा बु, “ए माम्‍चु़नी, गानी हेल्‍लो लोवो साखाम थो़नी, मा गानी साखाम थो़निलो जो़होमका निया बोनी।

तीतस 2:13

मेम्‍मा घ्‍ल्‍वापा इकीमा माम्‍चु़नी नुङ गुइलाई सेल्‍पा येशू ख्रीष्‍टकु यु़म-झ्‍वाक्‍सी रेम्‍बेसिलो ल्‍वापा न बिमिम गेर्सी द्‌वाक्‍पा थारीकाम लागि लडिमिम बुइ।

थु़र्मा 20:28

गानी इनीमा त्‍वाप नुङ खोत्‍ले थो़रलु़पामिमकाम लागि चङचङया बानी वो! माम्‍चु़नी-पेलका गानीलाई मे थो़रलु़पामिम रेपा खुन्‍चु़म खुबेट्‌निमिम बु। मेम्‍मिमका गुमीका उनीमा त्‍वाकु तारापाचो़ येशूकु सिसिका भ्रेम्‍डिम माम्‍चु़नीकु मण्‍डलीलाई न-गो सोक्‍निमा जो़होमका रेप्‍नी।

यूहन्‍ना 17:14

गो मेर्मिमलाई इनीमा सिजेम ग्‍वाक्‍तोमी, मा सु़म्‍दिसेरडाम मु़चु़मिमका मेर्मिमलाई मेद्‌वाक्‍मिवा, हेङालोने गो सु़म्‍दिसेरकाम मेएँ, मेप्‍माङा मेर्मिम वो सु़म्‍दिसेरकाम मेएँ।

रेम्‍बेट्‌मिडिम ल्‍वा 19:11

मेम्‍मा पाह्री ह्‌वासिट्‌पा गो ल्‍वाउतो मा मेसिन्‍डा आमा ङादोडा कोले बुबुयाम घोडा बाइडा, मे घोडाडला हुपाकु नङ “थो़रलु़इमिम” नुङ “आच्‍छाङा” बाइडा। गुमीका जो़पा निया नुङ क्‍वाल्‍बा बोमी।

रेम्‍बेट्‌मिडिम ल्‍वा 15:3

मेम्‍मा मेर्मिमका माम्‍चु़नीकु खारी बेपा मोशाकु काम्‍सो नुङ भेन्‍दाचो़कु काम्‍सो आरे र्‍वाक्‍तो बेत्तोङा बेम्‍डी: “मिप्रङमा माम्‍चु़नी खोत्‍लेडलाम यु़मनुङमा, इनीमा खारीमिम डोक्‍पु नुङ ङाङायाम बुमी। सु़म्‍दिसेरडाम खोत्‍ले मु़चु़मिमकु हप, इनीमा खारीमिम जो़पा नुङ आच्‍छाङाकाम बुमी।

रेम्‍बेट्‌मिडिम ल्‍वा 6:10

मेर्मिमका आरे र्‍वाम्‍डिमा डोक्‍पु लो़लामका येम्‍डी, “खोत्‍लेडलाम यु़मनुङमा, सेपा नुङ आच्‍छाङाम ङाचो़, ओ सुबुडा बाट्‌पा मु़चु़मिमकाम हाम्‍सिसम्‍म निया मेबोनी, मा गुकुलाई सेत्तिकिमकु छोक्‍चो मेहानिमिम?”

रेम्‍बेट्‌मिडिम ल्‍वा 3:14

“लाउडिकिया मण्‍डलीडाम पाह्रीचो़लाई ओराम ल्‍वा र्‍याका: ओराम सिजेम आमेन र्‍वाक्‍पा, थो़रलु़इमिम, माम्‍चु़नीकु आच्‍छाङाकाम ल्‍वा सो़पा, मा उहेमलामका माम्‍चु़नीका खोत्‍ले प्रङ्‌मिडी, मेरामका आरे र्‍वामी।

१ यूहन्‍ना 4:14

गुकु ल्‍वात्तोकोम बु मा मेराम सो़कु, सु़म्‍दिसेरलाई सेल्‍मु लागि पापका उनीमा तारापाचो़ थु़र्मिडी।

फिलिप्‍पी 3:9

गो माम्‍चु़नीडा जो़पा दु़म्‍मु ने डु़म्‍ला होम्‍साका दोसाका मेएँ, लावो ख्रीष्‍टडलाम थो़रका जो़पा दु़म्‍ङु। माम्‍चु़नीडा जो़पा दु़म्‍सी ने गुमीलामका रो मा ओराम खारी थो़रलामका दु़म।

२ कोरिन्‍थी 4:6

“तुकुम्‍चिमलाम ओल झ्‍वानु़” र्‍वाक्‍पा माम्‍चु़नी ङा आकीमा नडा उनीमा ओल झ्वाबेसाका माम्‍चु़नीकु यु़म-झ्‍वाक्‍सीकाम नेप्ची गुकुलाई थेसिथेन्‍बेत्तिकी। आच्छाङा ओराम ओल येशू ख्रीष्‍टकु ङालीडा झ्‍वा।

यूहन्‍ना 15:4

आमा गोगोडा दु़म्‍नी, मा गो गुमीडा दु़म्‍ङु। अङ्‍गूरकु ग्रेममिम उ रो़लडा मेदु़प्‍सावा माला मा सिन्‍मु मेचाप्‍सु़। मेम्‍साकाङा आमाडा मेदु़म्‍निवा माला गानी वो मा सिन्‍बेन्‍मु मेचाम्‍नी।

यूहन्‍ना 14:23

येशूका मेरामलाई सिख्‍लोम्‍डिमा र्‍वाम्‍डी, “उहेमका गोलाई रिखाम बोङि, मेरामका आमा सीसि थो़सु़। आमा पापका मेरामलाई रिखाम बोमी, मा आमा पाप नुङ गुचुकु मेरामकाडा रोचुकुमा मेरामकाडा बुचुकु।

यूहन्‍ना 14:20

मेनेम गो आमा पापगोडा बुङु, मा गानी आमाडा बुनी, मा गो गानीगोडा बुङु र्‍वाक्‍पा थेसिथेनी।

यूहन्‍ना 14:6

येशूका र्‍वाम्‍डी, “लाम्‍दी, आच्‍छाङा नुङ त्‍वारो़म गोङा सो़। गोडाम वाङमिम सु़लामका वो पापकाडा रोमु मेचाम्‍मी।

यूहन्‍ना 1:18

सु़का वो माम्‍चु़नीलाई हेल्‍लो वो ल्‍वास्‍तु़म मिबु। पापनुङ बाट्‌पा माम्‍चु़नी होप्‍मामङा तारापाचो़का माम्‍चु़नीलाई रेम्‍बेसाड्‌डामिम बु।

लूका 21:15

हेङालोने मेकोतिलोङा गो गानीलाई नेप्‍ची ग्‍वानिनी। इनी कोर्थो़लाम बक्‍पा मु़चु़मिमका मेराम ल्‍वाकाम सि ख्‍लोमु मेचाम्‍मी मा इनी कोर्थो़लाम जेमु मेचाम्‍मी।

मत्ती 13:11

गुमीका मेर्मिमलाई र्‍वाम्‍डी, “माम्‍चु़नीकु किब्‍दी हाम र्‍वाक्‍साका आच्‍छाङा छेपा सामा गानीलाई ने ग्‍वाक्‍मा बु, लावो वाङमिमलाई ने ग्‍वाक्‍मा मिबु।

१ यूहन्‍ना 2:24

ङादो गानी हाम सीन्‍सिट्‌निम मेरामडा गानी थो़र लु़इमिम दु़म्‍मुम बुमु बासी। गानी मेम बेन्‍नी माला इनीमा हेमकेम माम्‍चु़नी पाप नुङ उनीमा तारापाचो़नुङ दु़महोम बु।

एफिसी 3:18

मा गानी नुङ माम्‍चु़नीकु खोत्‍ले सेपा मु़चु़मिमका ख्रीष्‍टकु रिखाम हाङको भापा, हाङको धु़पा, हाङको येपा, हाङको घ्‍लु़म्‍पा मिम्मु मेझापा डोक्‍पु बु र्‍वाक्‍पा थेसिथेन्‍मु चाम्‍निनु़ र्‍वाक्‍साका गो सो़म्‍दी बेउ।

२ कोरिन्‍थी 5:17

मेम्‍मिमका कोङनिम मु़चु़ ख्रीष्‍टडा बु माला मेराम लाले दु़स्‍ताम मु़चु़ सो़। मेम्‍मा ङादोम त्‍वारो़म दाम्‍स्‍ताम बु, रेप्‍नी, लाले त्‍वारो़म चो़म्‍सिड्‍डाम बु।

१ कोरिन्थी 1:30

माम्‍चु़नीका गानीलाई येशू ख्रीष्‍टनुङ दु़म्‍बेट्‌निम बु। ख्रीष्‍ट ङा इकीमा लागि माम्‍चु़नीलाममिम नेप्‍ची, लोवो गुइलाई माम्‍चु़नीकु ङादोडा जो़पा मिम्‍पा, गुइलाई उनीमा सेपा मु़चु़ दु़म्‍बेट्‍पा, मा गुइलाई छु़ललामका वाङ बेपा दु़म्‍मिडिम बु।

यूहन्‍ना 17:25

“जो़पा खारी बेपा पाप, सु़म्‍दिसेरडाम मु़चु़मिमका गानीलाई मेछेनी, लावो गो गानीलाई छेनिनी। मेम्‍मा गानी गोलाई थु़र्ङिडिनिम र्‍वाक्‍पा मेर्मिमका चमी।

यूहन्‍ना 8:42

येशूका मेर्मिमलाई र्‍वाम्‍डी, “माम्‍चु़नी इनीमा पाप बामिवाम माला ने गानी गोलाई रिखाम बेङिनिवा, हेङालोने माम्‍चु़नीलामका गो इनीमाडा रोङ्‌डो। गो आमा त्‍वाकु नका रोङ्‌डोम मेएँ, लावो गुमीका गोलाई थु़र्ङिडिमिम।

१ यूहन्‍ना 2:23

सु़का येशूलाई माम्‍चु़नीकु तारापाचो़ मेर्‍वा गु माम्‍चु़नीनुङ मेलाम्‍दी। लावो सु़का येशूलाई माम्‍चु़नीकु तारापाचो़ र्‍वा गु माम्‍चु़नीनुङ लाम्‍दी।

१ यूहन्‍ना 5:5

सु़म्‍दिसेरडला घ्‍ल्‍वापा मु़चु़ सु़? मेरामङा मु़चु़ उहेमका येशू माम्‍चु़नीकु तारापाचो़ र्‍वाक्‍साका थो़र लु़।

१ यूहन्‍ना 5:15

गुइ गुमीनुङ बिइलो गुमीका थो़मी र्‍वाक्‍पा गुइ च माला गुइ हाम बिइ मेराम गुमीका ग्‍वाक्‍सामी र्‍वाक्‍पा ल्‍वाडा आच्‍छाङा लु़मु बासी।

१ यूहन्‍ना 5:18

उहेम मु़चु़ माम्‍चु़नीलाम गस्‍ताम बु मेरामका हेल्‍लो लोवो छु़ल बु़होम मेबु। माम्‍चु़नीकु तारापाचो़का मेराम मु़चु़लाई बोमी-थार्मी मा शैतानका मेराम मु़चु़लाई लु़म्‍मु मेचाप्‍सु़ र्‍वाक्‍पा गुइ च।