१ यूहन्‍ना 2:13 - थुलुङ राई

¹³ ङावानी, गो गानीलाई ओराम र्‍याक्‍तोङा बेउ, हेङालोने खोत्‍ले प्रङ्‌सिमु ङादो आथामङा बाट्‌पा येशू ख्रीष्‍टलाई गानी छेनी। स्‍वालानी, गो गानीलाई ओराम र्‍याक्‍तोङा बेउ, हेङालोने शैतानडला गानी घ्‍ल्‍वान्‍निम बु। द्‌वादीबुङ चो़च्‍चो़नी, गो गानीलाई ओराम र्‍याक्‍तोङा बेउ, हेङालोने इकीमा माम्‍चु़नी पापलाई गानी छेट्‌निम बु।

१ यूहन्‍ना 2:13 Referans Kwoze

यूहन्‍ना 14:7

गानी गोलाई आच्‍छाङा छेङिनिवाम माला आमा पापलाई वो छेनिवा। आथाडा आनो गानी गुमीलाई छेनी, गानी गुमीलाई ल्‍वान्‍निम बु।”

१ यूहन्‍ना 2:14

ङावानी, गो गानीलाई ओराम र्‍याक्‍तोङा बेउ, हेङालोने खोत्‍ले प्रङ्‌सिमु ङादो आथामङा बाट्पा येशू ख्रीष्‍टलाई गानी छेनी। स्‍वालानी, गो गानीलाई ओराम र्‍याक्‍तोङा बेउ, हेङालोने गानी इनी न-गोडा सोनुङमा बुनी, मा माम्‍चु़नीकु सिजेम इनीमा नडा बु। मेम्‍मा शैतानडला गानी घ्‍ल्‍वान्‍निम बु।

१ यूहन्‍ना 4:4

आमा चो़च्‍चो़नी, गानी ने माम्‍चु़नीकाम सो़। माम्‍चु़नीलाम-जेपा लिसिक्‍पा ओर्मिम मु़चु़डला गानी घ्‍ल्‍वान्‍निम बु, हेङालोने सु़म्‍दिसेरडा बाट्‌पा पेलडाम ने गानीगोडा बुमिमिम पेल छो़म डोक्‍पु बुमी।

१ यूहन्‍ना 1:1

सु़म्‍दिमोलो आथामङा बाट्‌पा कोले, गुमीलाई गुकु ल्‍वात्तोकोम थो़त्तोकोम बु। गुकु आकी मिक्‍सीकाङा गुमीलाई ल्‍वात्तोकोम बु, मा आकी ल्‍वाकाङा गुमीलाई लु़प्‍तोकोम बु। गुमी येशू ख्रीष्‍ट, त्‍वारो़म ग्‍वाक्‍पा सिजेम।

लूका 10:22

“आमा माम्‍चु़नीका खोत्‍ले गोलाई आमा ल्‍वाडा ग्‍वाङ्‌डिमिम बु। माम्‍चु़नीकु तारापाचो़ सु़ र्‍वाक्‍साका माम्‍चु़नीडाम वाङमिम सु़का वो मेछेङिमी। माम्‍चु़नी सु़ र्‍वाक्‍साका माम्‍चु़नीकु तारापाचो़डाम सु़का मेछेडु़। माम्‍चु़नीकु तारापाचो़का गुमीलाई उहेमकाडा रेम्‍बोमु लागि छेडु़ मेराम मु़चु़डाम वाङमिम सु़का वो गुमीलाई मेछेडु़।”

यूहन्‍ना 17:3

मेसिपा त्‍वारो़म ल्‍वापा लाम्‍दी ओराम सो़: गानी कोलेङा आच्‍छाङाकाम माम्‍चु़नीलाई मेर्मिमका छेमु, मा गानी थु़र्निम येशू ख्रीष्‍टलाई वो छेमु।

१ यूहन्‍ना 5:18

उहेम मु़चु़ माम्‍चु़नीलाम गस्‍ताम बु मेरामका हेल्‍लो लोवो छु़ल बु़होम मेबु। माम्‍चु़नीकु तारापाचो़का मेराम मु़चु़लाई बोमी-थार्मी मा शैतानका मेराम मु़चु़लाई लु़म्‍मु मेचाप्‍सु़ र्‍वाक्‍पा गुइ च।

१ यूहन्‍ना 3:12

कयिन होप्‍माम मेदु़म्‍नी, गु शैतानकाम बाइडा, मा उमा ल्‍वाक सेड्‌डु़। गुका हेङा उमा ल्‍वाक सेड्‌डु़? हेङालोने कयिनका हाम बु़डु़ मेराम रु़चो़काम बाइडा मा उमा ल्‍वाकका बु़डु़म ने जो़पा न-गोनुङमाकाम बाइडा।

मत्ती 11:27

“आमा पापका खोत्‍ले ल्‍वा आमा ल्‍वाड्‌डा ग्‍वाङ्‌डिमिम बु। पापका कोङङा तारापाचो़लाई छेमी। तारापाचो़का कोङङा पापलाई छेडु़, मा तारापाचो़का सु़-सु़नुङ पापलाई छेबेपा न बु़, मेर्मिमका वो पापलाई छेमी।

१ यूहन्‍ना 5:20

माम्‍चु़नीकु तारापाचो़ योम्‍डिम बुमी, मा आच्‍छाङाकाम माम्‍चु़नीलाई गुइ छेडिनु़ र्‍वाक्‍साका गुमीका गुइलाई न ग्‍वाक्‍साड्‌डामिम बु र्‍वाक्‍पा गुइ चडिम बु। गुइ माम्‍चु़नीडा बुइ हेङालोने उनीमा तारापाचो़ येशू ख्रीष्‍टडा गुइ बुइमिम बु। गुमी कोङङा आच्‍छाङाकाम माम्‍चु़नी मा हेल्‍लो वो मेसिपा त्‍वारो़म गुमीङा।

१ यूहन्‍ना 2:12

द्‌वादीबुङ चो़च्‍चो़नी, गो गानीलाई ओराम र्‍याक्‍तोङा बेउ, हेङालोने ख्रीष्‍टकु नङका माम्‍चु़नीका इनीमा छु़ल हेम्‍साट्‌निम बु।

१ यूहन्‍ना 2:1

आमा याक्‍के चो़च्‍चो़नी, गानी छु़ल मेबेनी र्‍वाक्‍साका गो ओराम सेलाखाजेम र्‍याक्‍तोङा बेउ। लावो कोङनिमका छु़ल बु़ माला इकीमालाम पापनुङ जेप्‍साक्‍पा कोले येशू ख्रीष्‍ट बुमी। गुमीका माम्‍चु़नीलाई गेर्सिबेन्‍मी।

तीतस 2:6

मेम्‍साकाङा स्‍वाला मु़चु़मिम वो त्‍वापलाई जो़होमका जु़ल्‍पा दु़म्‍मु लागि उनी सो हन्‍बेसाडामी।

२ कोरिन्‍थी 4:6

“तुकुम्‍चिमलाम ओल झ्‍वानु़” र्‍वाक्‍पा माम्‍चु़नी ङा आकीमा नडा उनीमा ओल झ्वाबेसाका माम्‍चु़नीकु यु़म-झ्‍वाक्‍सीकाम नेप्ची गुकुलाई थेसिथेन्‍बेत्तिकी। आच्छाङा ओराम ओल येशू ख्रीष्‍टकु ङालीडा झ्‍वा।

यूहन्‍ना 16:3

मेर्मिमका आरेप्‍माम खारी बोमी, हेङालोने मेर्मिमका पापलाई वो छेट्‌मिडिम मिबु, मा गोलाई वो छेट्‌ङिडिमिम मिबु।

यूहन्‍ना 14:9

येशूका र्‍वाम्‍डी, “फिलिप, आकोम थारीसम्‍म गानीनुङ बाङ्‌डो मा वो गाना गोलाई मेछेङिमिम? उहेमका गोलाई ल्‍वाङ्‌डिम बु, मेरामका पापलाई ल्‍वास्‍तु़म बु। हेसाका गाना ‘गुकुलाई पाप रेम्‍बेट्‌किनी’ र्‍वामु चाम्‍ना?

यूहन्‍ना 8:19

मेम्‍मा मेर्मिमका गुमीलाई हिलाबेम्‍डी, “इमा पाप बान्‍ते बुमी?” येशूका मेर्मिमलाई र्‍वाम्‍डी, “गानी गोलाई छेङिनी ना आमा पापलाई छेनी। गानी गोलाई छेङ्‌निवा माला आमा पापलाई वो छेनिवा।”

मत्ती 13:38

मे येका सु़म्‍दिसेरलाई रेम्‍बु़। जो़पा भ्रलका उनी त्‍वापलाई माम्‍चु़नीकु साखामगोडा जु़ल्‍पामिमलाई रेम्‍बु़। मालिन्‍दोका माम्‍चु़नीकु स्‍वाक्‍चिमो शैतानकु चो़मिमलाई रेम्‍बु़।

मत्ती 13:19

लाम्‍दीडा झुक्‍पा भ्रल मेरामङा सो़, उहेमका माम्‍चु़नीकु किब्‍दीकु दुथाम सिजेम थो़सु़, लावो थेसिमेथेडु़। मेम्‍मा शैतान रोमा भ्रल फोट्‌मा होङङा जु़ल्‍मा मेरामकु नड्‌डाम सिजेम रोडु़मा ल।

१ तिमोथी 5:1

ङावा मु़चु़लाई मेभुरा, लावो गुलाई पाप होङ्‍ङा मिम्‍डामा उमा सो हन्‍बेसाडा। त्‍वापडाम याक्‍के मु़चु़मिमलाई त्‍वाकु वोस्‍चो़ ल्‍वाक होङ्‍ङा बेमी।

यूहन्‍ना 17:21

मेम्‍साका मेर्मिम खोत्‍ले कोङसो़ दु़म्‍मिनु़, पाआ, हेसाका गानी गोगोडा बुनी, मा गो गानीडा बुङु। मेर्मिम इकीमाडा दु़म्‍मिनु़, मेम्‍साका गानी गोलाई थु़र्ङिडिनिम र्‍वाक्‍पा सु़म्‍दिसेरका थो़र बु़नु़।

मत्ती 5:37

आच्‍छाङा माला आच्‍छाङा र्‍वाक्‍नी। मेएँ माला मेएँ कोङङा र्‍वाक्‍नी। ओरामडाम हापा ल्‍वा ने मुनाङकु डोक्‍पुलामका रो।

यूहन्‍ना 16:33

आमाडा गानी दु़म्‍साका इनीमा न-गो भ्रसिनु़ र्‍वाक्‍साका गो गानीलाई ओराम ल्‍वा र्‍वाङडोम। ओराम सु़म्‍दिसेरडा गानीलाई दु़खा दु़म, लावो रुखु फिन्‍नी, सु़म्‍दिसेरडला गो घ्‍ल्‍वाङडोम बु।”

रेम्‍बेट्‌मिडिम ल्‍वा 2:7

उहेमकाम नोफ्‍ला बु, माम्‍चु़नी-पेलका मण्‍डलीलाई हाम र्‍वामी, मेरामका थो़सु़नु़। उहेम मु़चु़ मेजो़पा डला घ्‍ल्‍वा, मेरामलाई पाह्रीलाम माम्‍चु़नी बाखोपला बर्पा नु़बेट्‌पा धक्‍साकु मा पोमु साखाम ग्‍वाक्‍पु।

रेम्‍बेट्‌मिडिम ल्‍वा 12:11

भेन्‍दाचो़कु सिसिका नुङ मेर्मिमका सो़म्‍डिम सिजेमका मेराम मुनाङडला घ्‍ल्‍वाम्‍डिम बु। मेर्मिम सिमुङा बासिक्‍पा लोवो सिमु मेङिपा बाम्‍डी।