१ कोरिन्थी 5:11 - थुलुङ राई

¹¹ लावो उहेमका उ त्‍वाप ख्रीष्‍टडा थो़रलु़पा र्‍वा मा वो नाम्‍सु़रु़ बु़, रारी बु़, ङाटा सेव साडु़, वाङमिमलाई डक्‍साका जे, छो़म डु़सेवा बु मा वाङमिमलाई रोडु़मी, मेप्‍माम मु़चु़नुङ कोदेप मेबानी र्‍वाक्‍साका र्‍याक्‍तोम बाइडा। पोमु-डुमुङा वो मेप्‍माम मु़चु़नुङ मेपेनी।

१ कोरिन्थी 5:11 Referans Kwoze

रोमी 16:17

द्‍वादीबुङ वा-ल्‍वाकनी, गानीगोडा गो-फ दु़म्‍पा मा रिबुसी किन्‍बेट्‍पा मु़चु़मिमडाम चङचङया बानी र्‍वाक्‍साका गो गानीलाई छो़म र्‍वाङु। मेर्मिमका इनीमा सीसिकु कोर्थो़लाम जेमी। मेप्‍माम मु़चु़मिमडाम वाङ बानी।

२ थेसलोनिकी 3:14

ओराम सेलाखाजेमडा र्‍याक्‍तोकोम सिजेम कोङनिमका मेथो़सु़ माला मेराम मु़चु़लाई जो़होमका छेन्‍जो़ल्‍नी, मा मेरामलाई उ क्रो़म लु़नु़ र्‍वाक्‍साका मेरामडाम वाङ बानी।

२ थेसलोनिकी 3:6

वा-ल्‍वाकनी येशू ख्रीष्‍टकु नङडा गानीलाई र्‍वाकु, गुकु सीत्तोकोम सीसि होम्‍साका मेदोसाका भ्रेपा खोत्‍ले वा-ल्‍वाकमिमडाम वाङ बानी।

मत्ती 18:17

गुका इनीमा वो ल्‍वा मेबिसावा माला मण्‍डलीनुङ सो़या। मण्‍डलीका र्‍वामिम वो मेरामका थो़मु मेबिसावा माला मेरामलाई माम्‍चु़नीडा थो़रमेलु़पा वाङसामा होङङा लोवो कर फक्‍पा मेजो़पा छु़लचो़ होङङा लोवो बेनी।

१ कोरिन्थी 5:13

मण्‍डलीडाम वाङमी मु़चु़मिमकु निया माम्‍चु़नीका बोमी। माम्चु़नीकु सिजेमका र्‍वा, “गानीगोलामका रु़चो़ मु़चु़लाई ख्‍लुन्‍सोट्‌नी।”

२ यूहन्‍ना 1:10

कोङनिम मु़चु़ इनीमा घ्रो़म्‍दीडा रो मा ओराम सीसि मेरेडु़वा माला मेराम मु़चु़लाई नेमडा मेयेट्‌नी। सेव मेसाट्‌नी।

रेम्‍बेट्‌मिडिम ल्‍वा 22:15

मे शहरकु पाखानो ने ख्‍लेबामिम, मुनाङका थो़पा सो़र्मुनुङमामिम, मु़चु़ सेट्‌पामिम, ङाटा सेव साट्‌पामिम, नुङ लिमा थेन्‍मु द्‌वाक्‍पामिम मा मेमङा बेपाम बाट्‌पामिम दु़म्‍मी।

रेम्‍बेट्‌मिडिम ल्‍वा 21:8

लावो ङिजो़ल्‍पा, थो़र मेलु़पा, घ्रामलु़पा खारी बेपा, मु़चु़ सेट्‌पा, वाङमिम मेसेमनुङ अम्‍पा, मुनाङका थो़पा सो़र्मुनुङमा, ङाटा सेव साट्‌पा नुङ खोत्‍ले लिमाचो़मिम ने गन्‍धक वाक्‍तोङा बेपा ङिमलु़पा मुकु भुल्‍मु गोडा दु़म्‍मी। ओराम ननोम सिसि सो़।”

१ तिमोथी 3:3

डु़का मेसेट्‌पा, छोक्‍चो मेबेपा, याक्‍के दु़म्‍पा, क्‍वाल्‍बा मेबेपा, मा खाप्‍चीकु रारी मेबेपा,

मत्ती 23:25

“गानी डु़म्‍ला सीपा पातु़म्‍रीमिम नुङ फरिसीमिम ने हाउरेमा, मिनी मिक्‍सीलामडा जो़पा लिसिक्‍पा गानी, कान्‍चु़रे नुङ थालकु डलामका ने क्‍लो़नी, लावो इनी गोलामका रारी नुङ त्‍वाकाम नकु कोकोक्‍सीका देम्‍पा दु़म।

रेम्‍बेट्‌मिडिम ल्‍वा 2:20

मेमङा लोवो, इमा दुथाम गो मेद्‌वाक्‍पुमिम ओराम ल्‍वा बु: इजेबेल मेसेम, उहेमका गु उ त्‍वापलाई माम्‍चु़नीलाम-जेपानिम र्‍वा, गुलाई गानी उमा लिमा सीसि सीमु ग्‍वानी। गुका आमा डु़ल्‍चो़मिमलाई नाम्‍सु़रु़ बेबेसाका नुङ ङाटाडला सासेट्‌मा पोमु-डुमु पेबेसाका ताङताहेरथो़ ल।

एफिसी 5:5

गानी ओराम ल्‍वा चमुङा बासी: नाम्‍सु़रु़चो़, मेसेपा मु़चु़ नुङ रारीचो़, माम्‍चु़नी नुङ ख्रीष्‍टकु किब्‍दीगोनो हुमु मेल्‍वासु़। रारी बोमु ने ङाटा सेव साट्‍पा छु़ल होप्‍माम सो़।

लूका 21:34

“गानी चङचङया बानी, भ्रपा-भ्रपा पेत्तो नुङ डु़का सेसाका मा इनी मिरो़मकाम लागि मिम्‍ताम-सो़र्ताम बेपा मेदु़म्‍नी। मेम बेन्‍नी माला ने हादीबारामिम पेरडा हुमिमिम होङङा निया दु़म्‍पा थारी कोचोत्ति गानीडला रो।

१ कोरिन्थी 6:10

खुचु़वामिम, रारी बेपामिम, डु़सेवामिम डक्‍साका जेपामिम वाङमिमलाई रोट्‌पामिमका माम्‍चु़नीकु किब्‍दी मेल्‍वामी।

कलस्‍सी 3:5

मेम्‍मिमका ङादो सु़म्‍दिसेरडाम मु़चु़मिम बान्‍निलो बेन्‍निम मेजो़पा इनी न सेट्‍नी। मेर्मिम ने, नाम्‍सु़रु़ बेसी, घ्राम्‍लु़पा खारी बेसी, वाङमिम मेसेमनुङ छो़म अमअम द्‌वाक्‍पा न, मेजो़पा खारी बेपा न, रारी बेसी। रारी बोमु ने ङाटा सेव सान्‍मु होप्‍मामङा सो़।

१ कोरिन्थी 8:11

मेम्‍मा याक्‍के नेप्‍चीनुङ थो़रलु़पा मु़चु़, उहेमकाम लागि ख्रीष्‍ट सिम्‍डी, मेरामलाई इनीमा नेप्‍चीका पुयु़लुक्‍तु़म बु।

१ कोरिन्थी 6:6

लावो मेम मेबेसाका थो़रलु़पा कोले ल्‍वाक थो़रलु़पा कोङमी ल्‍वाककु कोर्थो़लाम बक्‍साका मे थो़रमेलु़पामिमकाडा निया बेला सो़सिप्‍डा लक्‍पा?

रोमी 13:13

मेम्‍मिमका ओलडा बोमु घ्रेट्‍पा बेसाका खारी बिइ, एलेङगी बेपा, डु़सेवा, मेजो़पा न-गोका दोपा, नाम्‍सु़रु़, क्‍वाल्‍बा, नाचु़र बेसी मेनु़।

रेम्‍बेट्‌मिडिम ल्‍वा 2:14

मेम्‍मा वो इनीमा दुथाम गो मेद्‌वाक्‍पुमिम ल्‍वा किचो़ बु: गानीगोडा बालामकु सीसि होङङा बेपा मु़चु़मिम बुमी। मे बालामका इस्राएलीमिमलाई छु़ल बेबेन्‍मु लागि ङाटाडला सासेट्‌मा पोमु-डुमु मेर्मिमलाई पेबेन्‍मु नुङ नाम्‍सु़रु़ बेबेन्‍मु बालाकलाई सीड्‌डु़म बाइडा।

१ तिमोथी 6:5

आरेप्‍माम मु़चु़मिमका हेल्‍लो लोवो रिबुसी कमिम बुमी। मेर्मिमकु न मेजो़पा बु मा आच्‍छाङाकाम ल्‍वा दाम्‍सोमु दु़म्‍मिडिम बु। मेर्मिमका माम्‍चु़नीकु सो़रलोले बोमु ने खउलुङ डु़पा लाम्‍दी र्‍वाक्‍पा मिम्‍मी।

एफिसी 5:18

डु़का सेट्‍पा मेदु़म्‍नी, हेङालोने मेरामका इनी त्‍वापलाई पुयु़ लुबेनी, लावो हेल्‍लो लोवो माम्‍चु़नी-पेलका लु़न्‍सिट्‌पा दु़म्‍नी।

गलाती 2:12

याकूबका थु़र्स्‍तु़मिम मु़चु़मिम रोमु ङादो गुका वाङसामामिमनुङ कोदेपङा पु़थाल्‍लु़। लावो मेर्मिम मु़चु़मिम रोम्‍डिम चङडा गु वाङसामामिमडाम वाङ दु़म्‍साका बाइडा, हेङालोने वाङसामामिम वो कोक्‍ते खिरिरि क्रिम्मु बासी र्‍वाक्‍पामिमडाम ङिम्‍डिम बाइडा।

१ कोरिन्थी 11:21

हेङालोने ग्रुला पोनिलो सु़लाई वो मेलसाका गानी इनी त्‍वाका रेनिमिम त्‍वा-त्‍वाहोम पोमुथोक पोनी, मेम्‍मा मेबाट्‍पामिम ने मान्‍जाङा दु़म्‍मी, मा याङ डु़का सेडु़मी।

१ कोरिन्थी 10:14

मेम्‍मिमका आमा द्‌वादीबुङ वा-ल्‍वाकनी, ङाटा सेव सान्‍मुडाम वाङ बानी।

१ कोरिन्थी 7:15

लावो थो़रमेलु़पाका फ्वासिमु न बु़ माला फ्‍वासी लोवो फ्‍वासिनु़। मेराम थारीका थो़रलु़पा मे रिचो़ लोवो वोस्‍चो़ लोवो बादे-बादे मेदु़म। हेङालोने माम्‍चु़नीका गुइलाई न-गो भ्रसिक्‍तो बुमु येसाड्‌डामिम सो़।

१ कोरिन्थी 7:12

वाङमिमलाई गो र्‍वाङु, ओराम ङाचो़का र्‍वाम्‍डिम मेएँ, लावो गो र्‍वाङडोम सो़, कोङनिम वा-ल्‍वाककाम नाइमे येशूडा थो़रमेलु़पा बु, मा गुका उ वोचु़नुङ बुमु न बु़ माला गुका उ नाइमे मेङेट्‌नु़।

थु़र्मा 9:17

मेकोतिमा हननिया लस्‍तामा शाऊल बाट्‌पा नेमगोनो हुङडा। हननियाका उ ल्‍वा शाऊलडला जु़ल्‍तो र्‍वाक्‍ता, “ल्‍वाक शाऊल, गाना इमा मिक्‍सीका ल्‍वानानु़, मा माम्‍चु़नी-पेलका लु़न्‍सिनानु़ र्‍वाक्‍साका गानानुङ मे लाम्‍दीडा रेम्‍बेसिक्‍पा येशूका गोलाई थु़र्ङिडिमिम बु।”

लूका 18:11

मे फरिसी येम्‍स्‍तामा आरे र्‍वाक्‍तो सो़म्‍दी बु़डु़, ‘माम्‍चु़नी, गो गानीलाई आलासो़ र्‍वाङु, हेङालोने गो वाङमिम मु़चु़मिम होप्‍माम खुचु़वा मेबुङु, मु़चु़मिमलाई मेजो़पा मेबेउमी, मा नाम्‍सु़रु़ मेबेउ। मेम्‍मा ओराम कर फक्‍पा मु़चु़ होप्‍माम वो गो मेबुङु।

थु़र्मा 1:15

मेकोतिमा पत्रुस को सङ न धु़म (१२०) थो़रलु़पामिमकु थेतेडा येम्‍स्‍तामा र्‍वाक्‍ता,

१ कोरिन्थी 6:9

रु़चो़मिमका माम्‍चु़नीकु किब्‍दी मेल्‍वामी र्‍वाक्‍पा हाम गानी मेचनी? नेप्‍ची मान्‍थिम मेदु़म्‍नी। सु़नुङ लोवो अम्‍बाल्‍पामिम दु़म्‍नु़का, ङाटा सेव साट्‌पामिम, नाम्‍सु़रु़ बेपामिम, छो़लो़सापमिम, वोस्‍चो़का वोस्‍चो़नुङ अम्‍पामिम,