Mateo 27:27 - Tachi Ak'õre Pedea

²⁷ Ara mãɨne Pilato papaká berãpa Jesú ãchi te choma Pretorio apataɨdea ateesidama. Mãma waapẽarã papaká berã t'ɨ̃nak'ari ichimá jũranak'ari orrobarisidama.

Mateo 27:27 Referans Kwoze

Juan 18:33

Maapae Pilato mãicha tede eda wãsima. Jesú eda ateewãpik'ari idisima: —¿Pɨ piarã judiorã poro jũra jɨ̃parí jɨ̃ bɨk'ãra?

Juan 18:28

Maapae tap'ededa Jesú Caip'á tedepa romanepema chi poro chaarea bɨ chi te minachia bɨdea ateewãsidama. Chi Jesú ateewãnana judiorã mãɨ te Pretorio apataɨde eda wãnaé pasima ãchi eda wãsidara Tachi Ak'õre k'ĩrari piawẽa p'aneenai pẽra. Ichi k'ĩrari pia p'anana k'ɨ̃ria p'anasidama Egitodepa wãnana k'ɨ̃risiapataɨ ewari chik'o k'odai k'orea.

Hecho 10:1

Cesarea p'uurude ẽpẽra Cornelio apataɨ basima. Ichi Italia tuadepema papaká berã chi mãɨrã chaarea pasima.

Hecho 27:1

Mãɨ ewaride chi poro chaarea bɨpa tai Italia tuadea wãnai p'anɨane a jarak'ari, Pablo mãɨnepa chi eda waapẽarã jɨ̃a nɨp'anana, mãɨrã Julio juade bɨsima. Mãɨ Julio papaká berã chi Augusto apataɨdepema chi mãɨrã chaarea pasima.

Juan 18:3

Mãɨpuru Judapa chok'ará romanepema papaká berã mãɨnepa chi Tachi Ak'õre te ot'eapataɨrã mãɨ ne uu ĩjũanea ateewãsima. Ãchi chi p'aarerã chi mãɨrã chaarearãpa mãɨnepa p'ariseorã pida Juda ome peesidama. Ãchia ĩpira, laap'ara mãɨnepa jiorro uru p'anasidama.

Mateo 26:3

Mãɨmisa judiorã chaarearã, Moisepa bɨda jarateapataɨrã mãɨnepa p'aarerã chi mãɨrã chaarearã Caip'á te chomane ãarea ará jere nɨbeesima. Mãɨ Caip'á p'aare minachia k'awa bɨ basima.