Hebreo 5:9 - Tachi Ak'õre Pedea

⁹ Ne ãareaɨne arí ooda pẽra, chi ichi pedea ũriutarã ãarea k'aripaipɨ ewaricha chok'ae p'ananamẽrá.

Hebreo 5:9 Referans Kwoze

Hebreo 9:15

Mãɨyara, Cristodepa Tachi Ak'õrepa pedea chiwidi ausima. Ẽpẽerã chi naenapema pedea audade p'anapachidaɨde nemietá oopachidama. Maamina Cristo piusima mãɨnepema k'aripai k'orea. Ichiaba, Cristodepa chi ichia t'ɨ̃naɨrãpa ichia ne ãarea pia jõk'apɨ́ teai jaradat'a p'ue jitadaipɨ.

Hebreo 2:10

Tachi Ak'õrepa ne ãarea oosima. Ichidepa ne ãarea bɨma. Tachi Ak'õremá pia basima Jesú minachia mĩapiit'a. Mãɨya chi ichi ẽpẽrarã K'aripaparí arí bɨsima. Ichidepa Tachi Ak'õrepa ichi warrarã chok'ará p'anɨ jɨrɨ atasima, ichi pia bɨdepema jitadamẽrá.

Hebreo 12:2

Jesude pia k'ɨ̃risiadai p'anɨma. Ichia k'aripasima tachia naa ĩjãanamẽrá mãɨnepa k'aripaparima ewaricha ĩjãa p'ananamẽrá. K'ɨ̃risiat'ɨ sãmaasã́ ichi k'urusude minachia mĩasit'a. Mãɨ k'orea p'erai badamina p'eraé pasima. Ichia k'awasima mãɨya nak'ari minachia arapá bait'a. Idiapae Tachi Ak'õre suak'a beeparí pia bɨ juaraari suak'abari bɨma.

Hebreo 9:12

Mãma Cristo «Tachi Ak'õre pae k'ɨda jẽesa chi atepe piipará bɨde» barimama eda wãsima. Mãmá wãside chivo mãɨnepa p'ak'a warra oa Tachi Ak'õre k'ĩrari jĩp'oi k'orea ateewãé pasima. Mãɨpari ara ichi oa ateewãsima. Bari k'ak'o aba mãɨya oodapa tachi k'aripasima ewaricha nepɨrawẽa p'ananamẽrá.

Hecho 5:32

Mãɨ taipa ara jarapatama. Tachi Ak'õre Jaore pida abarik'a jaraparima. Tachi Ak'õrepa ichi Jaore chi ichide ĩjãapataɨrã́ teaparima.

1 Pedro 1:22

Chi piarã pedea oo p'anɨ pẽra mãra nemietaawẽa p'aneesidama. Mãɨpuru ũpẽarã piarã k'ɨ̃ria p'anɨma. Sõnepa piarã minachia chi k'ɨ̃ria p'anat'ɨ.

Hebreo 11:8

Tachi Ak'õrepa Abrahaná jarasima ichia teai jaradamá wãmẽrá. Abrahanpa Tachi Ak'õrene ĩjãana pẽra, sãmá wãit'a atua bɨmina ichi tua ameek'ari wãsima.

Romano 2:8

Maamina chi eda waapẽarãpa waapẽarã k'aepẽra pia p'ananai k'orea jɨrɨpatama. Mãɨpuru chi piarãpẽa pedea ĩjãanai k'ɨ̃rianak'ama mãɨnepa nemietaade p'anapatama. Mãɨ ẽpẽrarã Tachi Ak'õrepa ichi k'ĩruupidepa minachia ɨtɨaipɨ.

Romano 1:5

Jesucristodepa Tachi Ak'õrepa mɨ bɨsima ichia peeda bamẽrá. Ichidepa mãɨya bɨsima jõma tuachadepemarãpa Jesucristode ĩjãanamẽrá, ichi pedea oodamẽrá mãɨnepa ichiá pia pedeadamẽrá.

2 Corintio 10:5

Jõma k'ɨ̃risia piawẽa be mãɨnepa chi tachi k'ak'ua atepe k'ɨ̃riapataɨ Tachi Ak'õre k'orea itu k'awapidak'aɨ, taipa mãɨ seat'a k'awapipatama. Ẽpẽrarãpa ãchi nek'ĩramá eda jɨ̃a nɨbɨuta jĩra taipa chi mãɨya k'ɨ̃risia be jĩp'a k'ɨ̃risiapipatama Cristode ĩjãanamẽrá.

Romano 15:18

Maamina ara mɨchi k'orea mi ãpia pida pia pedeaiwẽma. Abapuru Cristopa mɨnepa ooda k'orea pia pedeaipɨ. Piarã mɨnepa Cristopa k'aripasima judiorãwẽpa Tachi Ak'õrene ĩjãanamẽrá. Mɨa jaratea bɨdepa, oo bɨdepa,

2 Timoteo 2:10

Mãɨ k'orea mɨa jõma choa bɨma Tachi Ak'õrepa jɨrɨ atada ẽpẽrarã k'aripai k'orea. Mãɨya Tachi Ak'õrepa ãchi sida Jesucristodepa k'aripaipɨ, ewaricha ichi pia bɨdepema uru p'ananamẽrá.

Romano 10:16

Maamina jõma judiorãpa chi pedea pia Cristo k'orea ĩjãanaé pasima. Isaía k'art'ade nãɨya bɨ bɨma: «Tai Chipari, taipa jaradada ¿k'aipa ĩjãasima?»

Romano 6:17

Naena mãra nemietá pae pari mimiapataɨrã pasima. Maamina jõma Tachi Ak'õre k'orea jarateadada sõnepa oo p'anɨ pẽra mɨa Tachi Ak'õrea sõpia bɨade aparima.

Hebreo 2:3

Ara mãɨ jĩra chi Tachi Ak'õrepa tachi minachia k'aripaidepema tachia itu bɨdaipɨra, ¿Ichia ɨtɨaidepema sãmaasã́ tachi mĩrunaima? Mãɨ pedea Tachi Chipari Jesupa naa jarateasima. Chi ũrinaanapa tachiá mãɨ piarãane asidama.

Juan 19:30

Jesupa mãɨ uvaba jɨjɨyá tok'ari jarasima: —Mɨa ooi pada ãarea oosima. Maapae ichi poro edá jaabarik'ari k'ĩrawẽasima.

Mateo 17:5

Pedro mãɨya pedeamaa bɨde jɨ̃ara ɨnaa bɨpa ãchi ãarea t'ausima. Jɨ̃ara mãɨya cheside nãɨ pedea jĩk'ua ũrisidama: «Nãɨt'a mɨ Warrapɨ. Mɨa ichi minachia k'ɨ̃ria bɨma. Mɨ ichi k'orea arapá bɨma. Ichia jara bɨ ũrit'ɨ».

Juda 1:21

Tachi Ak'õrepa tachi k'ɨ̃ria bɨdepa nipat'ɨ. Tachi Chipari Jesucristopa k'ĩra chupuria bɨdepa ewaricha chok'ae bapiit'a nɨ p'anat'ɨ.

1 Juan 5:20

Tachia k'awa p'anɨma Tachi Ak'õre Warra chesit'a mãɨnepa k'ɨ̃risia k'awa bɨ tachiá teasit'a Tachi Ak'õre piarã k'awadamẽrá. Ichi Warra Jesucristo ome p'anɨ pẽra tachi piarã Tachi Ak'õre ome p'anɨma. Ichi piarã Tachi Ak'õrepɨ. Ichia ẽpẽrarã́ ichi ome ewaricha chok'ae p'anapiparima.

Hebreo 11:40

Tachi Ak'õrepa tachi pae nepia bɨt'a uru bɨ pẽra ichia k'ɨ̃riasima ãchi tachi ome ne ãareaɨne pia p'ananait'a.

2 Tesalonicense 2:16

Tachi Ak'õrepa tachi k'ɨ̃riasima. Ichi sõpiadepa sõpiapisima ewaricha mãɨya p'ananamẽrá. Mãɨnepa k'awapisima piarã ichidepa nepia atadait'a. Taipa k'ɨ̃ria p'anɨma Tachi Chipari Jesucristopa mãɨnepa Tachi Pajãnepema Ak'õrepa mãra sõpiapidait'a mãɨnepa chaarea bɨdait'a. Mãɨya mãrapa pedea p'anɨ mãɨnepa oo p'anɨ ãarea pia baipɨ.

Hecho 3:15

Mãɨya mãrapa chi tachi Chok'ae Bapiparí peasidama. Maamina Tachi Ak'õrepa ichi piu bada chok'ae p'irabaripisima. Mãɨ chok'ae p'irabaridat'a taipa unusidama.

Luca 13:32

Mãɨne Jesupa ãchiá jarasima: —Jãɨ ẽpẽra et'erre k'oparí jĩra bɨa nãɨya jarade wãt'ɨ: “Idi, nũ pida mɨa k'ɨdade be, jaore mietá pará be sida jɨpa beepik'oaipɨ. Mɨa ooi bɨt'a, ewari ũpeaɨde jõma ook'ari uru baipɨ”.

Hecho 4:12

Abapuru Jesupa tachi p'ue k'aripaipɨ. T'ɨ̃ awara waa newẽma mãɨ t'ɨ̃neepuru nãɨ ĩjũane tachi ẽpẽerã k'aripamẽrá.

P'ilipense 2:12

Mãɨya mɨ ũpẽarã chi k'ɨ̃ria berã, mɨ mãra ome badadepa Tachi Ak'õre pedea jara bɨ jĩra oo p'anɨma. Naapae mɨ mãra ome bɨwẽmina Tachi Ak'õre minachia wap'ea p'anɨnepa mãɨ oo p'anat'ɨ ichia mãra k'aripada pẽra.

Hebreo 1:14

Mãɨyara ¿Tachi Ak'õrepa ɨt'aripa peedaɨrã k'airãma? Mãɨrã ãarea Tachi Ak'õre pae p'anɨẽra, ãchi peeparima chi ichia k'aripai bɨɨrã mãɨrã ak'ɨ p'ananamẽrá.

Hebreo 9:28

Ara mãɨ jĩra Cristopa bari k'ak'o aba ara ichi itu peapisima chok'araɨrãpa nemietá oodada ãyá bɨi k'orea. Ichi mãicha cheipɨ, maamina mãɨne cheiwẽma tachia nemietá oopataɨt'a ãyá bɨi k'orea. Mãɨpari cheipɨ ichi nɨ p'anɨrã k'aripai k'orea.