Hebreo 13:5 - Tachi Ak'õre Pedea

⁵ Erreara k'ɨ̃ria p'anarãt'ɨ. Mãɨpari ara machia uru p'anɨnepa sõpia p'anat'ɨ Tachi Ak'õrepa nãɨya jarada pẽra: «Mɨa pɨ ameeiwẽma mãɨnepa pɨ tuaba bɨiwẽma».

Hebreo 13:5 Referans Kwoze

Mateo 6:25

»Mãɨpuru mɨa jararuma: mãra sãmaasã́ p'ananait'a minachia k'ɨ̃risiarãt'ɨ nek'odai k'orea, netodai k'orea ichiaba ne jɨ̃nai k'orea. ¿Tachi chok'ae bait'a chik'o k'aepẽra atepe piipará bɨwẽk'ãra? ¿Tachi k'ak'ua neet'á k'aepẽra atepe piipará bɨwẽk'ãra?

Mateo 6:34

Ne nũpema minachia k'ɨ̃risiarãt'ɨ, nũ pida Tachi Ak'õrepa mãra ak'ɨ bai pẽra. Ewaricha nepɨra minachia baipɨ.

Colosense 3:5

Mãɨpuru jõma nãɨ ĩjũanepema k'ɨ̃risia mãra sõne bɨ itu bɨt'ɨ. Awaraɨ ome k'ãirãt'ɨ, ne k'ĩra p'era oorãt'ɨ, mãra k'ak'uapa nemietá ooyá bɨ oorãt'ɨ, k'ɨ̃risia k'achia k'ɨ̃risiarãt'ɨ, mãɨnepa ne minachia uru p'ananai k'ɨ̃ria p'anarãt'ɨ. Chi ne minachia k'ɨ̃ria uru bɨt'a juapa oodada sãdo ĩjãa bɨ jĩra bɨma.

Luca 3:14

Mãɨne papaká berã arí p'anɨpa Juaná idisidama: —Taipa ¿k'ãre oodai p'anɨma? Juanpa p'anoosima: —Wap'eapidak'ari chĩara erreara ẽemarirãt'ɨ mãɨnepa seadepa chĩara k'orea k'achia pedearãt'ɨ. Sõpia p'anat'ɨ ara mãrá erreara p'aa p'anɨnepa.

2 Pedro 2:14

K'ima awaraɨ ome k'ãii k'orea p'anapatama. Nejõma nemietá oo p'anɨpa k'ĩra sẽnak'ama. Chi minachia ĩjãawẽa berã seapatama. Nejõma k'ɨ̃riapatama. Mãɨ k'orea Tachi Ak'õrepa ãchi ɨtɨaipɨ.

1 Timoteo 3:3

It'uapa piu nipawẽa bai bɨma. K'ĩruuyá baiwẽa bɨma, mãɨpari awaraɨrã ome sõpia bai bɨma. Jõmãɨrã ome ne k'ɨ̃risiawẽa bai bɨma. Erreara awaa baiwẽa bɨma.

Ep'esio 5:5

Mãrapa k'awa p'anɨma k'ima awaraɨ ome k'ãipataɨ, k'ĩra p'erapiparide nipapataɨ mãɨnepa nejõma k'ɨ̃riapataɨ chi Cristo mãɨnepa Tachi Ak'õrepa teadayade adada p'ue jitadaiwẽma. Nejõma k'ɨ̃ria bait'a, juapa oodada sãdode ĩjãa bɨ jĩra bɨma, Tachi Ak'õre k'aepẽra, chi ichia k'ɨ̃ria bɨt'a atepe ĩjãa bɨ pẽra.

2 Pedro 2:3

Erreara k'ɨ̃ria p'anɨ pẽra, mãra erreara atadai k'orea ara ãchi k'ɨ̃risiadepa sea jarateadaipɨ. Minachia tãaraaenapema Tachi Ak'õrepa ãchi nepɨra ak'ɨi k'orea bɨma, mãɨnepa tãaraawẽa bɨde ãchi piarã ɨtɨaipɨ.

Ep'esio 5:3

Mãra ẽpẽrarã Tachi Ak'õrenepemarã pẽra wẽra awaraɨ ome k'ãinaiwẽa p'anɨma, k'ĩra p'erapiparide nipadaiwẽa p'anɨma, mãɨnepa ne waapẽarãné k'ɨ̃rianaiwẽa p'anɨma. Mãɨ k'orea mi ãpia pida pedeadaiwẽa p'anɨma.

1 Corintio 5:11

Mãɨpari mɨa mãrá bɨsima parituapa ara ichi ũpẽaane aipɨra, maamina awaraɨ ome k'ãipataɨde nipaipɨra, erreara awaa baipɨra, juapa oodada sãdo k'ĩrari ɨt'aa chiidi baipɨra, seadepa waapẽarã k'orea k'achia pedea baipɨra, piu nipaipɨra, wa nechɨaparí baipɨra, makɨɨ ẽpẽra ome ará p'ananaiwẽa p'anɨ mãɨnepa ará nek'odaiwẽa p'anɨ.

Luca 8:14

Net'a tau ĩjũa ɨɨrɨ idá bɨde baedapa nãɨ jara bɨma: chi eda waapẽarã ẽpẽrarãpa Tachi Ak'õre pedea ũrinak'ari nãɨ ĩjũane sãmaasã́ pia beadai k'orea minachia k'ɨ̃risiapatama, ne ãarea uru p'anapatama, mãɨnepa arapá p'ananai k'ɨ̃risiapatama. Mãɨpuru ãchia ũrinana itu bɨdak'ari waridak'ama.

Juda 1:11

¡Miachupuri p'anɨma chi nemietaade nipapataɨrã! Caínpa ooda jĩra oopatama. Erreara k'ɨ̃ria p'anɨnepa Balaampa ooda jĩra piawẽa oo nipapatama. Corepa Moisé itu bɨda jĩra ara mãɨya Tachi Ak'õre itu bɨ p'anɨ pẽra ãchi sida ɨtɨaipɨ.

Romano 1:29

Nejõma k'achia oopatama. K'ĩra p'erai bɨ oopatama, ne minachia uru p'ananai k'ɨ̃riapatama, waapẽarã piawẽa oopatama, waapẽarãpa uru bɨ k'orea piawẽa k'ɨ̃risiapatama, mĩa peapatama, k'ĩruu pedeapatama, waapẽarã seapatama, waapẽarã k'orea k'achia k'ɨ̃risiapatama mãɨnepa waapẽarã k'orea seajarapatama.

Mateo 6:19

»Nãɨ ĩjũane nepia jɨrɨrãt'ɨ minachia uru p'ananai k'orea. Nãɨ ĩjũanepema mok'osiaparima, simiapa ãriparima ichiaba nechɨapataɨrã eda wãnak'ari nechɨapatama.

2 Corintio 4:9

Ẽpẽrarãpa tai piawẽa oo p'anɨmina Tachi Ak'õrepa itu bɨwẽa bɨma. Tai minachia jeeda baepiutamina p'ue peadaiwẽma.