Hebreo 11:1 - Tachi Ak'õre Pedea

¹ Tachia Tachi Ak'õrene ĩjãa p'anɨ pẽra k'awa p'anɨma chi tachia ne nɨ p'anɨt'a piarã jitadaipɨ mãɨnepa chi tachia ne ununawẽa p'anɨt'a mãɨrã piarãpɨ.

Hebreo 11:1 Referans Kwoze

2 Corintio 5:7

Tachi taupa unu p'anɨnepa nipadak'ama, mãɨpari Tachi Ak'õrene ĩjãa p'anɨnepa nipapatama.

2 Corintio 4:18

Mãɨ k'orea taupa unupataɨ taipa k'ɨ̃risia p'anɨwẽma, mãɨpari taupa ununak'aɨ k'ɨ̃risia p'anɨma. Tachi taupa unupataɨ isapea jõparima, maamina taupa ununak'aɨ jõk'ama.

Hebreo 11:7

Tachi Ak'õrepa Noea jarasima ne waidi unuk'á bet'a mãɨ ununait'a. Mãɨ Noepa ĩjãana pẽra, Tachi Ak'õre wap'ea bada pẽra p'ãp'orro minachia bɨt'a oosima, ichi ẽpẽerã k'aripai k'orea. Mãɨya chi nãɨ ĩjũane bea ãchi nemietá k'awapisima. Noepa ĩjãana pẽra Tachi Ak'õrepa ichi jĩp'a unusima.

Hebreo 10:22

Cristopa tachi k'ɨ̃risia nemietá bada jĩp'a bɨsima tachi sõ ichi oapa ne jĩp'oru jĩra. Tachi Ak'õre k'ĩrari pia bɨsima tachi k'ak'ua pania p'ap'ãrá bɨpa sɨɨda jĩra. Mãɨpuru k'ɨ̃risia aba p'anɨnepa mãɨnepa piarã ĩjãa p'anɨnepa Tachi Ak'õre k'ait'a wãnai p'anɨma.

Hebreo 11:27

Moisepa Tachi Ak'õrene ĩjãa bada pẽra p'araón k'ĩruui bɨt'a wap'eawẽa Egitodepa wãsima. Chi Tachi Ak'õre tachia ununak'apɨɨt'a unu bɨ jĩra ichia ĩjãa bɨt'a itu bɨé pasima.

Hebreo 6:12

Taipa k'ɨ̃rianawẽma mãra k'oa p'ananait'a, mãɨyawẽapuru k'ɨ̃ria p'anɨma chi mãra waapẽarã ũpẽarã jĩra p'ananait'a. Ãchia Cristode ĩjãa p'anɨẽra mãɨnepa ãarea choa p'anɨẽra, Tachi Ak'õrepa teai jarada ãarea jitadaipɨ.

Hebreo 10:39

Chi eda waapẽarãpa Tachi Ak'õrene ĩjãa p'anɨ itu bɨdak'ari ãchi atuadaipɨ. Maamina tachi mãɨ ẽpẽerã jĩra p'anɨwẽma, mãɨpari Tachi Ak'õrene ĩjãa p'anɨnepa ewaricha chok'ae p'ananaipɨ.

1 Corintio 13:13

Nãɨ ũpea p'anɨ jõk'ama: nejõma pia ĩjãa bai, jõma pia pamẽrá nɨ bai mãɨnepa waapẽarã k'ɨ̃ria bai. Mãɨ ũpeadepema waapẽarã k'ɨ̃ria bai chi atepe piipará bɨma.

Hebreo 11:13

Mãɨrã ãarea Tachi Ak'õrene ĩjãa p'anɨ piusidama. Maamina Tachi Ak'õrepa teai jarada ãchia nãɨ ĩjũane jitadaé pasima. Maamina k'awasidama k'aadeapema ewaride ichia ãarea teait'a. Mãɨ k'orea arapaasidama mãɨnepa waapẽarã́ pia pedeasidama nãɨ ĩjũane ãchi tua awaraɨdepemarãt'a mãɨnepa tua awaraɨde p'ɨrrɨa bet'a.

Hebreo 3:14

Tachia naa ĩjãanaananepa aba piuutadea Cristode ĩjãa p'ananaipɨra, ichi ome p'ananaipɨ.

Gálata 5:6

K'ak'ua tauchaa bɨdepa wa k'ak'ua tauchaawẽa bɨdepa tachi Jesucristo ome ará bak'ama. Mãɨpari chi ichide ĩjãa bɨdepa ichi ome ará baparima mãɨnepa waapẽarã k'ɨ̃ria baparima.

2 Corintio 5:17

Piarã abaɨ Cristo ome bɨpɨra, ichi naena bada jĩra bɨwẽma mãɨpari ichi ẽpẽra chiwidi jĩra bɨma.

2 Pedro 1:1

Mɨ Simón Pedropɨ, Jesucristo pae pari mimiaparipɨ mãɨnepa ichia peedapɨ. Mɨa nãɨ k'art'a bɨruma chi Tachi Ak'õrene mãɨnepa Tachi K'aripaparí Jesucristode ĩjãapataɨrã pae. Ichi jĩp'a bɨ pẽra, mãra tai ome abarik'a pia ĩjãa p'anɨma.

Hecho 20:21

Judiorã́ mãɨnepa judiorãwẽa mɨa jarasima nemietá oopataɨ itu bɨdak'ari Tachi Ak'õremá chedamẽrá mãɨnepa tachi Chipari Jesucristode ĩjãanamẽrá.

Tito 1:1

Mɨ Pablopɨ, Tachi Ak'õre pae pari mimiaparí mãɨnepa Jesucristopa peedapɨ. Mɨ peesima Tachi Ak'õrepa jɨrɨ atadaɨrãpa ichide ĩjãanamẽrá mãɨnepa chi piarã pedea k'awadak'ari Tachi Ak'õrepa k'ɨ̃ria bɨ jĩra p'ananamẽrá.

Hebreo 2:3

Ara mãɨ jĩra chi Tachi Ak'õrepa tachi minachia k'aripaidepema tachia itu bɨdaipɨra, ¿Ichia ɨtɨaidepema sãmaasã́ tachi mĩrunaima? Mãɨ pedea Tachi Chipari Jesupa naa jarateasima. Chi ũrinaanapa tachiá mãɨ piarãane asidama.

2 Corintio 11:17

Ara mɨ k'orea pia pedea bɨde Tachi Chiparipa mãɨya pedeapiwẽa bɨma, mãɨpari mɨ k'ɨ̃risia newẽa bɨ jĩra pedea bɨma.

2 Corintio 9:4

Mãɨya oodaepɨra, chi wãuta Macedonianepemarã ũpẽarã mɨ ome mãramá wãutade, mãrapa erreara jɨrɨp'edawẽa p'anɨt'a ununai pasima. Mãɨyara tai k'ĩra p'eradai pasima, k'ɨ̃risia p'anɨ pẽra mãrapa piarã jɨrɨp'edai padat'a. Mãɨnepa mãra sida minachia k'ĩra p'eradai pasima.

Hebreo 3:6

Maamina Tachi Ak'õre warra Cristo ichi ẽpẽrarã chiparipɨ. Ãchi ome jõma arí oo bɨma. Tachia Cristode ĩjãa p'ananaipɨra mãɨnepa ichidepa ne jitadai k'orea arapá nɨ p'ananaipɨra, Tachi Ak'õreneerãpɨ.