2 Corintio 1:21 - Tachi Ak'õre Pedea

²¹ Tachi Ak'õrepuru tai mãɨnepa mãra Cristo ome minachia ak'ɨ uru bɨma. Ichia tachi jɨrɨ atasima.

2 Corintio 1:21 Referans Kwoze

1 Juan 2:27

Maamina mãrapa Tachi Ak'õre Jaore Cristopa teada uru p'anɨma. Mãɨpuru jɨrɨdaiwẽa p'anɨma waapẽarãpa mãrá jarateadamẽrá. Tachi Ak'õre Jaorepa mãrá nejõma jaratea bɨma. Ichia jaratea bɨt'a seawẽma, mãɨpari piarãpɨ. Mãɨ k'orea Cristo ome ará p'anat'ɨ ichi Jaorepa mãrá jarateada jĩra.

1 Juan 2:20

Mãɨpari mãrapa Tachi Ak'õre Jaore Cristopa teada uru p'anɨma. Ichidepa jõma chi piarã pedea k'awa p'anɨma.

1 Pedro 5:10

Mãra tãaraa mĩanak'ari Tachi Ak'õrepa ne ãareaɨne pia bɨipɨ. Ichia mãra k'aripaipɨ pia ĩjãanamẽrá, jõma choadamẽrá mãɨnepa chaarea p'ananamẽrá. Tachi Ak'õrepa ichi sõpiadepa ne ãareaɨne k'aripaparima. Ichia mãra Jesucristodepa t'ɨ̃sima ichi ome ewaricha chi atepe p'ananamẽrá.

Romano 8:9

Maamina Tachi Ak'õre Jaore piarã mãra sõne bɨ pẽra, ichidepa nipapatama. Nãɨ k'ak'uapa oo k'ɨ̃ria bɨdepa nipadak'ama. Piarã chi Cristo Jaore nea bɨt'a Cristodewẽma.

2 Tesalonicense 3:3

Maamina Tachi Chiparipa ooipɨ ichia jara bɨ jĩra. Ichia mãra k'aripa baipɨ choa p'ananamẽrá mãɨnepa k'achiadepema ak'ɨ baipɨ.

Hecho 10:38

Mãɨ ewaride Tachi Ak'õrepa ichi Jaore mãɨnepa ichi jua chaarea Jesú Nazaredepemá teasima. Tachi Ak'õre ichi ome bada pẽra Jesupa nepia oo p'ɨrrɨa bapachima mãɨnepa chi ẽpẽerã tiorepa piawẽa uru beadat'a ãarea jɨpa beepipachima.

2 Tesalonicense 2:8

Maapaepuru chi ẽpẽra k'achia bɨpa unupiipɨ. Maamina Tachi Chipari Jesú k'ĩrawãrea achiterrea cherude ara pedearupa mãɨ ẽpẽra peaipɨ.

2 Corintio 5:5

Piarã Tachi Ak'õrepa tachi mãɨ k'orea oosima. Ichi Jaore tachiá teasima k'awadamẽrá jõma ichia teai jarada piarã atadait'a.

Juan 3:34

Tachi Ak'õrepa peedapa Tachi Ak'õre pedea pedeaparima, Tachi Ak'õrepa ichi Jaore wãak'awẽa teada pẽra.

Apocalipsi 3:18

Mãɨpuru mɨa mãrá nãɨya ũraaruma: nee chi ichiera t'ɨpɨde torbarida, mãɨ mɨnepa atat'ɨ. Mãɨya mãra piarã ɨbɨa padaipɨ. Mãɨnepa p'aru t'ot'oa be mɨnepa atat'ɨ jɨ̃nai k'orea. Mãɨya mãra ãk'adá p'anana k'orea k'ĩra p'eradaiwẽma. Mãɨnepa mɨnepa nẽará atat'ɨ mãra taude t'aadak'ari pia ununamẽrá.

Apocalipsi 1:6

Tachi bɨsima Tachi Ak'õre juade p'aarerã p'ananamẽrá. Mãɨya ichi Pajãnepema Ak'õrepa k'ɨ̃ria bɨt'a oo p'ananaipɨ. Mãɨa pia pedeadai p'anɨma. Pia bɨma ichit'a ewaricha jõmãɨrã Chipari bait'a. Mãɨya beese.

1 Tesalonicense 3:13

Mãɨnepa ɨt'aa chiidi p'anɨma Cristopa mãra k'aripak'ari, sõnepa minachia ĩjãanamẽrá. Mãɨya Tachi Chipari Jesú jõma ichidirã ome cherude mãra Tachi Ak'õre, tachi Pajãnepema Ak'õre taade nemietá newẽa p'ananaipɨ.

Colosense 2:7

Ichidepa chaarea p'anat'ɨ k'arra minachia jita p'anɨ jĩra mãɨnepa te pia ooda jĩra. Ichide minachia ĩjãa p'anat'ɨ ũpẽarãpa jarateadada jĩra, mãɨnepa ewaricha Tachi Ak'õrea machi sõpia p'anɨane at'ɨ.

Romano 16:25

Mɨa pedea pia Jesú k'orea jaratea baparima. Ara mãɨ pedeadepa Tachi Ak'õrepa mãra p'ue k'aripaipɨ chaarea p'ananamẽrá. Mãɨ pedea Tachi Ak'õrepa naena k'awapiwẽa basima maamina idiapae k'awapisima. Chi ichi pari pedeapataɨrãpa mãɨ k'art'ade bɨsidama. Tachi Ak'õre piuk'apa mãɨya bɨpisima tuachapemarãpa ũrinak'ari Jesucristode ĩjãanamẽrá. Tachi Ak'õrea pia pedeadai p'anɨma.

1 Corintio 1:8

Mãɨpa Tachi Ak'õrepa mãra chaarea uru baipɨ aba nãɨ ewari jõrunea. Mãɨya Tachi Chipari Jesucristo cherude mãra k'orea k'achia pedeadaiwẽa p'ananaipɨ.

Hebreo 13:9

Maamina chi eda waapẽarãpa ne wawaria piawẽa jarateapatama. Ãchirã́ itu seapirãt'ɨ. Mãrapa ne wawaria k'o p'anɨnepa wa nek'odawẽa p'anɨnepa k'aripak'ama. Chi mãɨya oo p'anɨrã pia p'anɨwẽma. Mãɨpari Tachi Ak'õrepa ichi sõpiadepa k'aripa bɨma mãrapa pia sõnepa ĩjãanamẽrá.