1 Timoteo 6:12 - Tachi Ak'õre Pedea

¹² Ne ãareaɨne Cristode ĩjãa base pia papaká bɨ k'ĩruupari jĩra. Mãɨya pɨ ewaricha Tachi Ak'õre ome baipɨ. Chok'ará p'anɨ k'ĩrari, pɨa Cristode ĩjãa bɨade a jaraside, Tachi Ak'õrepa pɨ t'ɨ̃sima mãɨya chok'ae bamẽrá.

1 Timoteo 6:12 Referans Kwoze

1 Pedro 5:10

Mãra tãaraa mĩanak'ari Tachi Ak'õrepa ne ãareaɨne pia bɨipɨ. Ichia mãra k'aripaipɨ pia ĩjãanamẽrá, jõma choadamẽrá mãɨnepa chaarea p'ananamẽrá. Tachi Ak'õrepa ichi sõpiadepa ne ãareaɨne k'aripaparima. Ichia mãra Jesucristodepa t'ɨ̃sima ichi ome ewaricha chi atepe p'ananamẽrá.

1 Timoteo 1:18

Mɨ warra Timoteo, mɨa Tachi Ak'õrepa naena jara peeda pɨ k'orea k'ɨ̃risiarude, pɨa ooi bɨt'a jara peeruma. Mãɨne Cristode ĩjãa bɨdepa mãɨnepa k'ɨ̃risia jĩp'a bɨdepa chi pedea piarã uru base waapẽarã t'ãena, papaká bɨ k'ĩruupari jĩra. Waapẽarãpa k'ɨ̃risia pia uru p'anana itu bɨdak'ari ãchia Cristode ĩjãa p'anɨ itu bɨsidama.

2 Timoteo 4:7

Mɨa Tachi Ak'õre pae ooi bada jõma oosima pia chõona jĩra. Mɨa Cristo itu bɨwẽa bɨma. Jõma jĩp'a oosima p'iraparí jĩra.

Apocalipsi 3:3

Chi piarãpẽa pedea mãrapa ũrinana k'ɨ̃risia p'anat'ɨ. Mãɨne pia ĩjãat'ɨ. Nemietá itu bɨdak'ari Tachi Ak'õremá chet'ɨ. Mãra taujĩra p'ananaepɨra mɨ cheipɨ mãra ɨtɨai k'orea chi nechɨaparí atua nɨbɨde chepari jĩra.

1 Timoteo 6:13

Ãarea chok'ae berã Tachi Ak'õrenepa chok'ae p'anɨma. Ara mãɨ Tachi Ak'õre k'ĩrari mɨa jararuma pɨa oo bamẽrá. Jesucristo k'ĩrari pida abarik'a jararuma ichia piarã pedea Poncio Pilato k'ĩrari jarada jĩra. Mɨa nãɨ jararuma: mɨa jaratea bɨ k'ĩra jĩp'a oo base waapẽarãpa pɨ k'orea k'achia pedeadaemaapa, aba Tachi Chipari Jesucristo cherudea.

1 Juan 2:25

Mãɨya ará p'anɨpɨra, Cristopa tachiá piarãpẽa jarasima ewaricha Tachi Ak'õre ome chok'ae p'ananait'a.

Hebreo 6:18

Tachi Ak'õrepa sea jarak'a pẽra ichia teai jarada piarã teaipɨ mãɨnepa ichi t'ɨ̃nepa jarada k'ĩra awara ooiwẽma. Mãɨ ne ume p'anɨnepa, taipa Tachi Ak'õre jɨrɨpatama tai k'aripamẽrá mãɨnepa k'ɨ̃riamẽrá. Ichia jarada piarã ooit'a k'awa p'anɨẽra tachia p'ue p'erawẽa ĩjãa p'ananaipɨ. Mãɨpa chi Jesudepa jitadai k'orea nɨ p'anɨt'a itu bɨdaiwẽma.

2 Timoteo 1:9

Tachi Ak'õrepa tachi k'aripasima mãɨnepa t'ɨ̃sima ichi pae pia p'ananamẽrá. Tachia pia oo p'anɨnepa mãɨya ooé pasima, mãɨpari ichi sõpiadepa ooi k'ɨ̃risia bada pẽra mãɨya oosima. Piarã nãɨ ĩjũa bai naena Tachi Ak'õrepa ichi sõpiadepa k'ɨ̃risiasima Jesucristodepa tachi k'aripait'a.

Colosense 3:15

Tachi Ak'õrepa mãra t'ɨ̃sima k'ak'ua aba bɨ jĩra p'ananamẽrá. Cristopa nek'ĩramariwẽa p'anapi bɨma, mãra sõne. Mãɨpa k'awapiipɨ k'ãre oodai p'anɨ. Mãɨya p'anat'ɨ. Mãɨnepa Tachi Ak'õrea sõpia p'anɨane at'ɨ.

1 Timoteo 6:19

Mãɨya pia oo p'anɨnepa ne yaamaa p'anɨma chi mãɨ ewari cherude pia p'ananai k'orea. Mãɨne ãchi piarã chok'ae p'ananaipɨ.

Hebreo 3:14

Tachia naa ĩjãanaananepa aba piuutadea Cristode ĩjãa p'ananaipɨra, ichi ome p'ananaipɨ.

1 Tesalonicense 2:12

Taipa minachia ũraasidama mãra Tachi Ak'õrepa k'ɨ̃ria bɨ jĩra nipadamẽrá. Ichia mãra t'ɨ̃sima ichi juade ua bai k'orea mãɨnepa ichi pia bɨdepema uru p'ananamẽrá.

1 Pedro 3:9

Abaɨ pida mãra piawẽa oosira ara mãɨya oorãt'ɨ. K'achia pedeasira ara mãɨya k'achia pedearãt'ɨ. Mãɨpari ɨt'aa chiidit'ɨ Tachi Ak'õrepa ichi k'aripamẽrá. K'awa p'anɨma Tachi Ak'õrepa mãra atasit'a, mãɨya p'ananamẽrá. Mãɨya p'ananaipɨra, Tachi Ak'õrepa mãra sida k'aripaipɨ.

2 Tesalonicense 2:14

Taipa chi pedea pia jaratea p'anɨnepa Tachi Ak'õrepa mãra t'ɨ̃sima Tachi Chipari Jesucristo pia bɨdepema atadamẽrá.

2 Corintio 9:13

Mãrapa k'aripa p'anɨnepa unupi p'anɨma chi pedea pia Cristo k'orea piarã ĩjãa p'anɨt'a. Sõpiadepa chi ũpẽarã́ tea p'anɨma mãɨnepa jõmãɨrã k'aripa p'anɨma. Mãɨ k'orea Tachi Ak'õrea pia pedeadaipɨ.

Hebreo 13:23

K'awat'ɨ tachi ũpẽa Timoteo eda jɨ̃a nɨbada awara wãsit'a. Ichi isapea mɨmá cheipɨra, mãra ak'ɨde wãrune mɨa ichi ateewãipɨ.

P'ilipense 1:30

Mãrapa unusidama mɨ minachia mĩa bɨde choa badat'a, mãɨnepa idiapae pida ũri p'anɨma mɨ wapida choa bɨt'a. Ara mãɨ jĩra mãra sida minachia choa p'anɨma.

1 Timoteo 4:14

Tachi Ak'õrepa pɨá oopi bɨ teada k'ɨ̃risia atuarãse. Ũpẽarã ak'ɨpataɨrãpa ãchi jua pɨ ɨ̃rɨ bɨsidaɨde Tachi Ak'õrenepa jarasidama ichia mãɨ tearut'a.

2 Timoteo 2:2

Mɨa ẽpẽrarã chok'ará k'ĩrari jaratea badat'a pɨa ũrisima. Ara mãɨ jaratea bada pɨa pida waapẽarã ũpẽarã juade bɨese. Waapẽarãpa ãchidepuru ĩjãanai p'anɨma mãɨnepa p'ue pia jarateadai p'anɨma waapẽarã́ jarateadamẽrá.

Juda 1:3

Ũpẽarã, mɨa nãɨ k'art'ade Tachi Ak'õrepa tachi k'aripada k'orea bɨ k'ɨ̃ria basima. Maamina ara nãɨena bɨruma mãra jĩrak'aua p'ananamẽrá. Ara machia ĩjãa p'anɨ k'orea wawá choa p'anat'ɨ. Tachi Ak'õrepa chi piarãpẽa pedea ichi ẽpẽrarã́ barimama teasima. Mãɨ ewariaba pida k'ĩra awara teaiwẽma.