1 Timoteo 1:9 - Tachi Ak'õre Pedea

⁹ Nãɨt'a k'awadai p'anɨma: Tachi Ak'õrepa mãɨ Moisepa bɨda teaé pasit'a chi jĩp'a be k'orea, mãɨpari teasima chi Tachi Ak'õrepa jara bɨ jĩra oodak'aɨrã k'orea, chi k'ɨɨrɨwẽa be k'orea, chi Tachi Ak'õre nea be k'orea, chi nemietá oo be k'orea, chi Tachi Ak'õre wap'eadak'á be k'orea, chi nãɨ ĩjũanepemarã jĩra p'anapataɨrã, chi ãchi ak'õre peapataɨrã k'orea, chi nae peapataɨrã k'orea, chi mĩa peapataɨrã k'orea,

1 Timoteo 1:9 Referans Kwoze

Gálata 3:19

Mãɨyara ¿Tachi Ak'õrepa k'ãre k'orea Moisepa bɨda ichiá bɨpisima? Mãɨya oosima ẽpẽrarãpa nemietá oopataɨ k'awadamẽrá. Ẽpẽrarã mãɨ Moisepa bɨdadepa p'anasidama aba Abrahanepa unui bada cherudea, ichidepa Tachi Ak'õrepa k'aripayade ada pẽra. Tachi Ak'õrepa mãɨ Moisepa bɨda Ichia ɨt'aripa peedaɨrãnepa teasima. Mãɨ teak'ari Moisepa ẽpẽrarã́ teasima.

1 Pedro 4:18

«Chi ẽpẽra jĩp'a bɨt'a k'aripai k'orea chaarea bɨpɨra, ¿chi Tachi Ak'õre itu bɨk'ari nemietá ooparí sãmaasã́ k'aripaima?»

Romano 5:20

Tachi Ak'õrepa Moisea ichi pedea bɨpisima ẽpẽrarãpa k'awadamẽrá nemietá minachia oo p'anɨt'a. Maamina ẽpẽrarãpa nemietá minachia oosidaɨde Tachi Ak'õrepa ichi sõpiadepa pia k'ĩra chupuriasima.

Gálata 5:23

waapẽarã k'aepẽra pia berã k'ɨ̃risiadak'aɨ mãɨnepa tachi k'ak'ua jĩp'a uru p'anapataɨ. Mãɨ bɨda newẽma chi mãɨ ãarea eda jara bɨt'a «nemietaade» a bɨt'a.

Tito 3:3

Piarã naena tachi sida k'ɨ̃risia piawẽa p'anasidama, Tachi Ak'õrene ĩjãanawẽa p'anasidama mãɨnepa piawẽa k'ɨ̃risia p'anasidama. Tachia nemietá oo k'ɨ̃ria berã mãɨnepa arapá oo k'ɨ̃ria berã, chipari pae pari mimiaparí jĩra jõma oopachidama. Paritua k'achiade nipapachidama, chĩarapa uru bɨ k'orea sõpiawẽa p'anapachidama, chĩarapa tachi unuemaapachidama, mãɨnepa tachia chĩara unuemaapachidama.

Romano 6:14

Tachi Ak'õrepa ichi sõpiadepa mãra k'aripada pẽra mãɨnepa Moisepa bɨdadepa p'anɨwẽ pẽra, nemietá waa mãra chipari paiwẽma.

Romano 1:30

Waapẽarã k'orea k'achia pedeapatama, Tachi Ak'õre unuemaapatama mãɨnepa waapẽarã k'ĩrari piawẽa pedeapatama. Waapẽarã k'aepẽra atepe p'anɨane a k'ɨ̃risiapatama mãɨnepa mãɨya jarapatama. Waapẽarã piawẽa oodai k'orea jɨrɨpatama. Ãchi ak'õre mãɨnepa nae pedea ũrinak'ama.

Apocalipsi 22:15

Maamina chi nemietá oopataɨrã, chi ẽpẽra nɨɨpataɨrã, chi k'ĩranejasia oopataɨrã, chi mĩa peapataɨrã, chi juapa oodada sãdode ĩjãapataɨrã, mãɨnepa seajarapataɨrã ãarea awara tuaneenaipɨ.

Apocalipsi 21:8

Maamina chi mɨ ome wãnai k'orea wap'eapataɨrã, chi mɨne ĩjãanak'apɨɨrã, chi mɨa k'ɨ̃riak'at'a oopataɨrã, chi mĩa peapataɨrã, chi k'ĩranejasia oopataɨrã, chi ẽpẽra nɨɨpataɨrã, chi juapa oodada sãdode ĩjãapataɨrã mãɨnepa chi seajarapataɨrã azup're t'ɨpɨ urua nɨbɨde minachia mĩa p'ananaipɨ. Mãɨ chi bari k'ak'o ume piusiade apatama».

Tito 1:16

Ãchia jarapatama Tachi Ak'õre k'awa p'anɨt'a, maamina ãchia oo p'anɨnepa unupipatama ichi itu bɨ p'anɨt'a. Ãchi k'ɨɨrɨwẽa be mãɨnepa nepia oodai k'orea p'ananak'ama. Ãchia oopataɨ Tachi Ak'õrepa k'ɨ̃riak'ama.

1 Pedro 3:20

Mãɨrã jaorepa Noé ewaride Tachi Ak'õre pedea ĩjãanaé pasima. Mãɨne Noepa p'ãp'orro nepalá oo bɨmisa Tachi Ak'õrepa jõma choa bɨdepa nɨ basima ãchia ĩjãanamẽrá. Maamina ẽpẽra chok'araawẽa to minachia cheside k'aripasima. Pia jaradaipɨra, ocho k'aripasima.

Hebreo 11:31

Israel ĩjũanepemarã ume p'anɨpa Jericó p'uuru sãmaasã́ bɨ k'awadai k'orea ak'ɨde wãsidaɨde, wẽra k'achia bɨ Rahapa Tachi Ak'õrene ĩjãa bada pẽra ãchiá pia pedeasima. Mãɨ k'orea israel ĩjũanepemarãpa chi Tachi Ak'õrene ĩjãanak'apɨɨrã ãarea k'enasidaɨde ichi peadaé pasima.

2 Tesalonicense 2:8

Maapaepuru chi ẽpẽra k'achia bɨpa unupiipɨ. Maamina Tachi Chipari Jesú k'ĩrawãrea achiterrea cherude ara pedearupa mãɨ ẽpẽra peaipɨ.

Romano 4:13

Tachi Ak'õrepa Abrahaná mãɨnepa ichidepa chedai pada ẽpẽrarã́ nãɨ ĩjũa teayade asima. Maamina mãɨya jaraé pasima Abrahanpa Moisepa bɨda uru bɨda pẽra. Mãɨpari mãɨya jarasima Abrahán nepɨra newẽa bɨade a jarada pẽra. Mãɨya nepɨra newẽa bɨade a jarasima Abrahanpa ichide ĩjãana pẽra.

Mateo 10:21

»Abaɨpa ara ichi ũpẽa peapiipɨ mɨne ĩjãa bɨ k'orea. Chi ak'õrepa ichi warra peapiipɨ mãɨnepa chi warrarãpa ãchi ak'õrerã k'ĩruunak'ari peapidaipɨ.

1 Pedro 2:7

Mãra chi Cristode ĩjãapataɨrãmá, ichi minachia pia bɨma. Maamina chi ichi ĩjãanak'apɨɨrã k'orea Tachi Ak'õre pedeade nãɨya bɨ bɨma: «Chi te oopataɨrãpa mawara amaanana pada, mãɨ mawara chi atepe piipará beesima».

Hebreo 12:16

Jĩrak'aua p'anat'ɨ mi ãpia pida wẽra awaraɨ ome k'ãipataɨ mãɨnepa chi Esaú jĩra Tachi Ak'õrene piawẽa k'ɨ̃risiapataɨ mãra paara p'anapidaemaapa. Esaú Jacó warra ĩwini pẽra chi ak'õrepa uru bɨdepema neet'á minachia jitai basima. Maamina ichi ũpẽapa barimama chik'o k'opida k'orea, ichia ichi ak'õre neet'á jitai badat'a ãarea chi ũpẽá teasima.

Gálata 5:21

waapẽarãpa uru p'anɨ k'orea piawẽa k'ɨ̃risiapataɨ, mĩa peapataɨ, piu nipapataɨ, arapaapataɨ ewari oo p'anɨne minachia nemietá oopataɨ mãɨnepa nejõma nemietá mãɨ jĩra be sida. Mɨa mãrá naena jarada jĩra mãicha jararuma: mãɨ nemietá oo be Tachi Ak'õre juade p'ananaiwẽma, ichidirã paara.

Gálata 5:18

Maamina Tachi Ak'õre Jaorepa mãra uru nipaipɨra, Moisepa bɨdade p'anɨwẽma.

1 Timoteo 4:7

Chõarãenapema nepɨrɨpataɨ piawẽa be itu bɨse. Tachi Ak'õrepa k'ɨ̃ria bɨ jĩra oo nipase.

1 Timoteo 6:20

Timoteo, jõma Tachi Ak'õrepa jara peeda minachia ak'ɨse. Chi Tachi Ak'õremá piawẽa bɨ k'orea pedeapataɨ itu bɨse. Mãɨnepa jõma k'ɨ̃risia Tachi Ak'õre pedea ome k'ĩra awara be itu bɨse. Waapẽarãmá mãɨ k'ɨ̃risia pia bɨma. Maamina pia bɨwẽma.

2 Timoteo 2:16

Tachi Ak'õre k'ĩrari chi piawẽa berãpa k'achia pedeapataɨ itu bɨse. Chi mãɨya berã Tachi Ak'õrenepema t'ɨmɨa wãpatama.

2 Timoteo 3:2

Ẽpẽrarãpa ne ãarea ara ãchi pae k'ɨ̃rianaipɨ, erreara awaa p'ananaipɨ, ãchi pia beade adaipɨ, chi atepe bɨ jĩra k'ɨ̃risiadaipɨ, chĩara k'orea k'achia pedeadaipɨ, ãchi ak'õre mãɨnepa nae pedea ĩjãanak'á p'ananaipɨ, ãchi k'ariparu ẽpẽrá sõpia bɨade adak'á p'ananaipɨ, mãɨnepa Tachi Ak'õre wap'eadak'á p'ananaipɨ.

Tito 1:6

Ĩjãapataɨrã ak'ɨparí chõa nepɨra pará bɨade adaiwẽa bai bɨma. K'ima abapuru uru bai bɨma. Ichi warrarãpa Cristode ĩjãa p'ananai p'anɨma mãɨnepa jĩp'a nipadai p'anɨma. Mãɨya ẽpẽrarãpa jaradaiwẽma nemietá oo p'anɨ wa k'ɨɨrɨwẽa p'anɨ.

Tito 1:10

Mɨa mãɨya jara bɨma k'ɨɨrɨwẽa berã, tachi k'aripak'á pedea jarateapataɨrã mãɨnepa chĩara seapataɨrã sida pará pẽra. Mãɨrã tachi ɨmɨk'ĩra k'ak'ua tauchaadai p'anɨane apataɨrãpɨ.