1 Corintio 4:6 - Tachi Ak'õre Pedea

⁶ Ũpẽarã, mɨ k'orea mãɨnepa Apolo k'orea bɨsima mãra k'aripai k'orea. Tai k'orea k'awadai p'anɨma Tachi Ak'õre pedeade bɨ bɨ awara k'ɨ̃risiapidaemaapa. Mãɨya mãrapa abaɨ waapẽarã k'aepẽra atepe pia bɨ k'ɨ̃risiadaiwẽma.

1 Corintio 4:6 Referans Kwoze

2 Corintio 11:4

Tai awaraɨ chedapa Jesú k'orea taipa jarateadada awara jaratearude, wa chi Tachi Ak'õre Jaore mãrapa jitadada k'orea awara jaratearude mãrapa minachia ĩjãapatama. Ichiaba chi pedea pia mãrapa ĩjãanana awara jaratearude minachia ĩjãapatama.

2 Corintio 12:19

¿Mãramá taipa mãɨya jara p'anɨk'ãra tai k'orea piawẽa k'ɨ̃risiapidaemaapa? Mãɨyawẽma. Ũpẽarã, tai Cristoderã pẽra Tachi Ak'õre k'ĩrari jõma mãɨ jara p'anɨma mãrapa pia ĩjãanamẽrá.

2 Corintio 12:6

Piarã ara mɨchi k'orea pia pedea k'ɨ̃ria bɨpara mɨ k'ɨ̃risia newẽa bɨ jĩra pedeaé pasima, chi piarã pedea pedeai pasi pẽra. Maamina mɨa mãɨya pedeawẽma mi ãpia pida mɨ pia bɨt'a k'ɨ̃risiapidaemaapa. Mãɨpari mɨa k'ɨ̃ria bɨma mãrapa mɨ k'orea arí k'ɨ̃risiadait'a mɨa oo bɨt'a unu p'anɨ pẽra mãɨnepa mɨa jaratea bɨt'a ũri p'anɨ pẽra.

Colosense 2:18

Mãɨ k'orea abaɨ pida mãrapa nepia pajãne atadaiwẽane adaipɨra, ĩjãarãt'ɨ. Chi mãɨya pedeapataɨrã sea nipapatama waapẽarã k'aepẽra k'aepe be jĩra. Ãchia Tachi Ak'õrepa ɨt'aripa peedaɨrã minachia k'ɨ̃riapatama. K'ãmok'araa jĩra ununana minachia jarateapatama. Tachi k'ak'uapa ne piawẽa ooyá bɨdepa ẽpẽra minachia k'awa bɨ jĩra paritua k'ɨ̃risiapatama.

1 Tesalonicense 1:5

Taipa chi pedea pia Cristo k'orea mãrá jarateasidaɨde taipa pedeadeepuru pedeadaé pasima. Mãɨpari mãɨ pedea piarã arí k'awa p'anɨ pẽra Tachi Ak'õre Jaore jua chaareadepa pedeasidama. Mãrapa k'awa p'anɨma tai sãmaasã́ mãra paara p'anapachit'a, mãra pia p'ananamẽrá.

Romano 12:3

Tachi Ak'õrepa ichi sõpiadepa mɨ bɨsima ichi pae ne oo bamẽrá. Mãɨpuru mɨa mãrá nãɨ jararuma: mi ãpia pida k'ɨ̃risiaiwẽa bɨma ara ichi chi atepe bɨt'a. Mãrapa Cristode ĩjãanana pẽra Tachi Ak'õrepa machicha ne awara awará teasima ne oodamẽrá. Mãɨpuru ichia teada jĩra machia oo p'anɨ k'orea pia k'ɨ̃risiat'ɨ.

2 Corintio 10:7

Mãrapa chi ɨ̃rɨpema ak'ɨ p'anɨma. Abaɨpa piarã Cristodé k'ɨ̃risia bɨpɨra, k'awa bai bɨma tai sida Cristoderã.

2 Corintio 4:15

Tai mãɨ ãarea minachia mĩa p'anɨma mãra pia p'ananamẽrá. Mãɨne Tachi Ak'õrepa ichi sõpiadepa ẽpẽrarã chok'ará k'ariparuma. Mãɨya chok'araɨrãpa ichiá pia bɨade adaipɨ mãɨnepa ichi k'orea pia jaradaipɨ.

1 Corintio 8:1

Naapae mɨa jararuma chi juapa oodada sãdorã́ ne k'iuru paa teada k'orea. Mãrapa jarapatama ara mãɨnepa k'ɨ̃risia k'awa p'anɨane apatama. Maamina chi k'ɨ̃risia k'awapa tachi waapẽarã k'aepẽra atepe p'anɨ jĩra k'ɨ̃risiapiparima. Tachia waapẽarã k'ɨ̃ria p'anɨnepa, ãchi k'aripapatama.

1 Corintio 5:6

Ara machi waapẽarã k'aepẽra pia beade adaiwẽa p'anɨma. ¿Mãrapa atua p'anɨk'ãra p'ana ooropiparí ãpia bɨpa harina jõma ẽesãapipari? Ara mãɨ jĩra chi nemietá ãpia oorupa chi waapẽarã ũpẽarã ãarea mietaade bɨpiparima.

1 Corintio 3:19

Tachi Ak'õremá, chi nãɨ ĩjũanepema k'ɨ̃risiat'a piawẽa bɨma. Tachi Ak'õre pedeade nãɨya bɨ bɨma: «Tachi Ak'õrepa chi nãɨ ĩjũane ne k'awa berã ara ãchi k'ɨ̃risiadepa k'awapiparima ne k'awa p'anɨwẽt'a».

2 Timoteo 2:10

Mãɨ k'orea mɨa jõma choa bɨma Tachi Ak'õrepa jɨrɨ atada ẽpẽrarã k'aripai k'orea. Mãɨya Tachi Ak'õrepa ãchi sida Jesucristodepa k'aripaipɨ, ewaricha ichi pia bɨdepema uru p'ananamẽrá.

2 Corintio 10:15

Waapẽarãpa oodada k'orea ara tai k'orea pia pedeadak'ama ara taipa oodada jĩra. Mãɨpari taipa k'ɨ̃ria p'anɨma mãrapa Cristode pia ĩjãanait'a. Mãɨya taipa mãra tuade p'ue pia jarateadaipɨ ara Tachi Ak'õrepa oopi bɨ jĩra.

2 Corintio 10:12

Maamina ¿sãmaasã́ tachi k'ɨ̃ría chi waapẽarã ãchit'u chi piipará beade apataɨrã jĩra k'ɨ̃risiadaima? Ara ãchit'u chaapatama, mãɨnepa ara ãchi waapẽarã paara ak'ɨpatama, k'ai piipará bɨ k'awadai k'orea. Mãɨya oodadepa, k'ɨ̃risia nea p'anɨt'a unupipatama.

1 Corintio 13:4

Chi waapẽarã k'ɨ̃ria uru bɨpa jõma choa bɨma, waapẽarã k'ĩra chupuriaparima, abaɨpa uru bɨt'a uru bai k'ɨ̃riak'ama, waapẽarã k'aepẽra atepe pia bɨade ak'ama mãɨnepa mãɨya bɨ jĩra k'ɨ̃risiak'ama.

1 Corintio 9:23

Mɨa jõma mãɨ jĩra ooparima chi pedea pia Cristo k'orea k'awapii k'orea. Mãɨya mɨa pida Tachi Ak'õrenepa nepia jitaipɨ.

1 Corintio 5:2

Maamina ¡mãrapa wapida k'ɨ̃risia p'anɨma waapẽarã k'aepẽra piipará berãpɨ! ¿Mãɨ ẽpẽrapa nemietá ooda k'orea minachia sõp'ua p'aneenaiwẽk'ãra? ¿Mãɨ mãranepema ãyá bɨdai p'anasidawẽk'ãra?

1 Corintio 3:21

Ũpẽarã ak'ɨparí chi waapẽarã k'aepẽra chi piipará bɨ jĩra waa k'ɨ̃risiarãt'ɨ. Tachi Ak'õrenepa mãrapa nejõma uru p'anɨma pia p'ananai k'orea.

1 Corintio 1:31

Mãɨpuru Tachi Ak'õre pedeade nãɨya bɨ bɨ jĩra tachia oodai p'anɨma: «Abaɨpa ara ichi k'orea pia pedeaipɨra, Tachi Chipari k'orea pia pedeai bɨma».

1 Corintio 1:19

Tachi Ak'õre pedeade nãɨya bɨ bɨma: «Chi ãarea k'ɨ̃risia k'awa berã k'ɨ̃risiat'a mɨa piawẽa bɨ unupiipɨ. Chi k'ɨ̃risia k'awa berãpa oo k'ɨ̃ria p'anɨt'a itu oopiiwẽma».

1 Corintio 1:12

Pia jaraideepara, waapẽarã mãranepemarãpa jarapatama: «Mɨ Pablodé». Waapẽarãpa jarapatama: «Mɨ Apolodé». Waapẽarãpa jarapatama: «Mɨ Pedrodé». Mãɨnepa waapẽarãpa jarapatama: «Mɨ Cristodé».

Hecho 18:24

Mãɨmisa judio Apolo apataɨ Ép'eso p'uurude chesima. Mãɨ Apolo Alejandría p'uurudepema pasima. Ichia nepia pedeapachima mãɨnepa Tachi Ak'õre k'art'a sida minachia k'awa basima.

Hecho 19:1

Apolo Corinto p'uurude bɨmisa Pablo ĩjũa eya idá bɨde p'asa wãk'ari Ép'eso p'uurude chesima. Mãma chi eda waapẽarã Jesude ĩjãapataɨrã unusima.

2 Corintio 12:20

Mɨa wap'ea bɨma mãramá wãk'ari mãra unuiwẽma mɨa k'ɨ̃ria bɨ jĩra. ¡Mãɨnepa mãrapa mɨ ununaiwẽma mãrapa k'ɨ̃ria p'anɨ jĩra, mãra ɨtɨai bɨdeepuru! Piarã mɨa wap'ea bɨma mãramá wãrune, unuipɨ mãra k'ĩruu pedea p'anɨt'a, waapẽarãpa ne uru be k'orea piawẽa p'anɨt'a, k'ĩruu p'anɨt'a, ara machi pia p'ananai k'orea jɨrɨ p'anɨt'a, waapẽarã k'orea k'achia pedea p'anɨt'a, waapẽarã k'orea sea jara p'anɨt'a, chi atepe bɨ jĩra k'ɨ̃risia p'anɨt'a mãɨnepa k'ĩruupik'a para p'anɨt'a.