Zekhariah 2:9 - Tedim Bible

⁹ Topa mahmah in note hong su ding a, nidanga note’ na hong sepsak mite in tu-in note’ nate hong lehsuh kik ding uh hi, hong cisak hi. Hih bangin thu hong pian’ ciangin Vanglian Topa in kei hong sawl ahih lamtak na thei ding uh hi.

Tedim Bible Revision 2017

⁹ Topa mahmah in note hong su dinga, nidang a noteʼ na hong sepsak mite in tu-in noteʼ nate hong leh suhkik ding uh hi, hong cisak hi. Hih bangin thu hong pian ciangin Vanglian Topa in kei hong sawl ahih lamtak na thei ding uh hi.

Zekhariah 2:9 Referans Kwoze

Isaiah 19:16

Tua ni ciangin Egypt mite, numei bang ding uh a, Vanglian Topa in amaute a khut a sinsanna hangin lau-in ling ding uh hi.

Zekhariah 6:15

Gamlapi-a a teng mite hong pai-in Topa’ innlam nasep hong huh ding uh hi. Tua biakinn a kilamkik ciangin Vanglian Topa in note kiangah kei a hong sawl ahihna thu na thei ding uh hi. Topa na Pasian uh’ thupiaknate cingtakin na zuih nak-uhleh tu-a ka gen bangin a hong piang ding ahi hi.

Zekhariah 4:9

Amah in, “Zerubbabel in biakinn bulpi phut khin a, biakinn lam zong a zo ding hi. Tua ciangin ka mite in, amaute kiangah nang kong sawlna thu hong thei ding uh hi.

Ezekiel 39:10

Amaute in mei cih dingin a kinusia galhiamte nei uh ahih manin gamlakah sing tom kullo ding a, tulakah sing phuk ding zong kisam lo ding hi. Amaute in amau’ na a sutte’ na sutin, a suksiatsakte’ na suksiatsak ding uh hi. Topa Pasian in hih thu ka gen khin hi,” hong ci hi.

Isaiah 14:2

Israel mite in amaute manin amau’ gamah ciahpih ding uh a, Topa’ gam sungah amaute pen sila numei sila pasal dingin nei ding uh hi. Amaute a man ngei mite pen tu-in amaute in lehmat ding uh a, amaute a nengniam ngei mite tungah tu-in ukna nei ding uh hi.

Isaiah 11:15

Topa in ama huihsa nungsakin Nail gunpi le Eufratis gunpi tuite kangsak ding a, mi khempeuh in nuamtakin a kantan zawh ding lui neu sagih bek sitlai ding hi.

Johan 16:4

Hih bangin a hong gamtat hun uh hong tun ciangin ka hong gen thute na phawk theih nadingun a hong genkhol ka hi hi. “Note tawh hong omkhawm ngawn ka hih manin a kipattung lamin hih thute ka hong gen kei hi.

Johan 13:19

Hih thu hong tun taktak ciangin, ‘Kei kua ka hihna,’ na hong theih nadingun a hun ma-in a hong ma gen ka hi hi.

Zekhariah 2:8

Hih bangin maang ka muh khit ciangin, ama mite’ na a sutgawp minam dangte kiangah thu a gen dingin Vanglian Topa in kei hong sawl a, Topa’ mite a su mi peuhpeuh in a mit nauta bangin a manphapen khat a su ahi hi.

Zefaniah 2:9

Kei pen a nungta Israel Pasian ka hih mah bangin, Moab mite, Sodom mite bangin kisusia-in, Ammon mite, Gomorrah mite bangin kisusia-in, a gam sung uhah lingkung bek pozo-in, a gam uh cikhuk tawh kidimin a sia tawntung suakin, a suaktalai ka mite in a neihsa uh sutin, a gam uh a laksak tak kei leh, ci-in ka kiciam hi,” a ci hi.

Habakkuk 2:17

Note in Lebanon gam singkungte phuk na hih manun note zong hong kiphuk ding a, a ganhingte zong that na hih manun tu-in ganhingte in note hong lausak ding uh hi. Gam sung khempeuhah mi thatin na bawlsiatna hang uh le khuapite le a sunga tengte na suksiatna hangun note tungah hih bangin a hong piang ding ahi hi.

Habakkuk 2:8

Note in minam dang tampite’ na na sut uh a, tu-in a omlai mite in note’ na hong sut ding uh hi. Bang hang hiam cih leh note in mi thatin, khuapite le a sunga teng mite na bawlsia uh hi.

Jeremiah 28:9

Ahi zongin, nopna hong tung ding hi, ci-in a gen kamsangpa pen Topa’ hong sawl kamsangpa hi taktak hiam, cih kamsangpa’ gen bang hong tun ciangin a kithei pan ding ahi hi,” ka ci hi.

Jeremiah 27:7

Ama gam a kisiat hun a tun mateng gam khempeuh in amah a kipan a tapa le a tupa’ na a sepsak ding uh hi. Tua khit ciangin gam tampi le kumpi liante in amah salin a lehneih kik ding uh hi.

Isaiah 33:23

Gal teembaw khaute kol a, ama omna ding mun sanah gunkuang puan khuam lenkip zo lo a, gunkuang puan kizal thei lo hi. Tua ciangin galte’ neihsate kihawmkeek ding a, khebaite nangawn in van ngah ding uh hi.

Isaiah 33:1

Hong kisusia nai lo, mi a susiapa aw, tu-in gimna a ngah ding na hita hi. Kuamah in hong khem nai loh, mi khem pa aw, tu-in gimna a ngah ding na hita hi. Na suksiat nawn loh ciangin nang hong kisusia ding a, na khem nawn loh ciangin nang hong kikhem ding hi.

Isaiah 13:2

Mualkolh tungah lim khat lakto unla, galkapte tungah nakpitakin kiko un. Miliante’ kongpi-ah amaute va pai-in a sim nadingun amaute khut vaan un.

Isaiah 10:32

Tuni mahmahin Nob khua-ah galte tungin khawl uh a, Zion Mual ahi Jerusalem khuapi a khuttum uh sinsan uh hi.

Isaiah 48:16

Kei kiangah hong nai unla, hih thu hong za un. A kipat cil a kipanin a simthamin thu ka gen ngei kei a, tua thu a pian a kipanin kei ka om hi. (Tu-in Topa Pasian in kei tungah a vangliatna hong pia a, kei hong sawl hi.)

Zekhariah 2:11

Tua hun ciangin Topa kiangah minam tampi hong pai ding uh a, ama mite a suak ding uh hi. Topa in note hong ompih ding a, tua ciangin note kiangah kei a hong sawl ahihna thu na thei ding uh hi.

Isaiah 4:5

Tua ciangin Zion Mual tung, tua lai-a kikhawm mi khempeuh tungah, sunin meii sungah, zanin meikuang khu tawh Topa hong kilang ding a, Topa’ minthanna vang in khuapi hu ding hi.

Isaiah 12:6

Zion-a teng mite aw, nomau’ lakah Israel-te’ Siangtho Pa lianin om ahih manin lungdamin awng unla, lungdamin la sa un,” a cih hun uh hong tung ding hi.

Isaiah 26:1

Tua ni ciangin Judah gam sungah hih la kisa ding hi: Khuapi muanhuai khat i nei a, Topa mahmah in i kulhte le i panmun kipte hong hutsak hi.

Isaiah 33:21

Tua khua sungah Topa in ama minthanna vang hong langsak ding a, a zai gunte le a zai lui geite-ah i teng ding hi. Tua tuite tungah ei hong do ding gal gunkuang hong kihot nawn lo ding a, gal teembaw zong hong pai nawn lo ding hi.

Isaiah 60:18

Na gam sungah ngongtatna thu kiza nawn lo ding a, na gam sungah siatmaina le suksiatna om nawn lo ding hi. Nangmah in na kulhte pen Hotkhiatna, na kulhkongpite pen Phatna, na ci ding hi.

Isaiah 60:19

Sun hunin ni pen nangma khuavak hi lo ding a, zan hunin kha pen na khuavak hi nawn lo ding hi. Topa pen a tawntung nangma khuavak hi ding a, na Pasian pen na minthanna hi ding hi.

Jeremiah 8:19

Ngai un, gam sung mun khempeuhah ka mite’ tanute kap uh a, “Zion khua-ah Topa om nawn lo ahi hiam? A kumpipa uh om nawn lo ahi hiam?” a ci uh hi. Topa in dawngkik a, “Bang hangin milim bawltawmte le a gamdang milimte uh tawh kei hong hehsak ahi uh hiam?” a ci hi.

Joel 2:27

Tua ciangin no Israel mite lakah kei ka omna thu, keimah Topa pen note’ Pasian ka hihna thu, kei simloh kuamah dang a om lohna na thei ding uh hi. Ka mite hong kisimmawh nawn lo ding hi.

Zefaniah 3:15

Topa in na galte hong phiatkhiatsak khin a, hong langpang khempeuh hong hawlkhiatsak khin hi. Topa ahi Israel kumpipa nang tawh hong om a, na launa ding bangmah om nawn lo hi.

Zekhariah 9:15

Vanglian Topa in ama mite hu ding a, ama mite in a galte uh susia ding hi. Galdona sungah zukham bangin awng gawp ding uh a, a galte uh’ sisan luangsakgawp ding uh hi. Biakna site, biakna tau tungah hai a sun tawh kibangin a luangsak ding uh hi.