Zekhariah 10:8 - Tedim Bible

⁸ Amaute samin ka kaikhawm ding a, amaute honkhia-in a nidang zahin mi tampi ka phasak ding hi.

Tedim Bible Revision 2017

⁸ Amaute samin ka kaikhawm dinga, amaute hon khia-in a nidang zahin mi tampi ka phasak ding hi.

Zekhariah 10:8 Referans Kwoze

Isaiah 5:26

Amah in a gamlapi-a om minam khat a sapna-in lim khat lak a, leimong panin hong pai nadingin a sam hi. Manlang takin tua mite hong pai pah hi.

Isaiah 7:18

“Tua ni ciangin Egypt luite’ nakah a om Egypt mite, thopi hon bangin hong pai nading le Assiria mite, a gam panun khuaipi hon bangin hong pai nadingun Topa in sam ding hi.

Jeremiah 33:22

Vana aksite kisim zo loin, tuipi a sehnelte a kiteh zawh loh bangin keimah in ka nasempa David’ suanlekhakte ahi a, siampi Levi minamte ahi zongin ka pungsak den ding hi,” hong ci hi.

Hosea 1:10

Ahi zongin, tehzawh loh, simzawh loh zah dongin tuipi sehnel bangin Israel mite tampi pha ding uh a, tua hunin, “Note ka mi hi lo,” a kicih hangin ni khat ni ciangin, “A nungta Pasian’ tate,” kici ding hi.

Mangmuhna 22:17

Kha Siangtho le Mothak in Jesuh kiangah, “Hong pai in,” a ci uh hi. Hih thu a za mi khempeuh in zong Jesuh aw, “Hong pai in,” ci ta uh hen. A dangtak mi khempeuh hong pai uh hen la, a deih khempeuh in nuntakna tui a khongin hong la ta uh hen.

Mattiu 11:28

“Na semin vangik pua-in a gim mite khempeuh aw, ka kiangah hong pai ta un. Note tungah lungsim tawldamna ka hong pia ding hi.

Zekhariah 9:11

Sisan tawh a kikipsak, note tawh ka thuciamna hangin na salsuahna uh keugaw gam panin note ka hong suaktasak ding hi.

Isaiah 51:11

Topa’ mi a kithehthangte hong ciahkik ding a, lasakna tawh Zion-ah hong pai ding uh hi. A tawntungin amaute lungdam ding uh a, amaute in lungdamna le kipakna ngahin, dahna le khuisatna nei nawn lo ding uh hi.

Isaiah 44:22

Na thupalsatnate meiipi bangin na khialhnate meiilum bangin ka phiatkhia khinzo hi. Hong honkhia khin ka hih manin kei kiangah hong ciahkik in.

1 KUMPI MASATE 4:20

Judah mi le Israel mi tuipi gei-a sehnel bangin tam uh a, amaute in anne tuidawnin lungdam uh hi.

Paikhiatna 1:7

Ahih hangin Israel’ suanlekhakte pungin nakpitakin khang uh hi. Amaute tampi pha-in nakpitakin khang uh ahih manin Egypt gamah dim uh hi.

Mangmuhna 7:9

Tua khit ciangin ka khuadak leh mi namkim, pau namkim panin kuama sim zawh loh dingin a tam mahmah mihonpite, tokhom mai le Tuuno mai-ah ding uh a, puanpak silhin a khut uhah nisuh hiang a tawi uh ka mu hi.

Isaiah 7:19

Tuate khempeuh hong pai-in, keenhawmte sung, suangpi heengte sung, lingkung kawmte, le ganhing tatna mun khempeuhah dim ding uh hi.

Isaiah 48:20

Babylon panin paikhia-in Khaldea gam panin tai inla, lungdamna tawh hih thu genin taangko inla, leimong dongin puak in. “Topa in ama nasem Jakob honkhia khinzo!” ci-in gen kawikawi in.

Micah 2:12

Ahi zongin no Israel mi a omlaite khempeuh pel hetloin kong kaikhawm kik ding hi. Tuubuk sunga tuu khum bangin, gankhawk sungah tuuhon kaihkhop bangin note kong kaikhawm kik ding a, na gam sung uh, mi tampite’ husa tawh kidimkik ding hi, ci hi.