Zefaniah 2:15 - Tedim Bible

¹⁵ A vangliatna a kisaktheihpih, lungmuang takin a om khuapi, tu-a bangin piang ding hi. Leitungah amau’ khuapi a lian penin ngaihsun uh hi. Tua hinapi-in gamlak suakin, gamsate’ omna suak ta hi. A mu mi khempeuh in lamdang sa-in kigaih ding uh hi.

Tedim Bible Revision 2017

¹⁵ A vangliatna a kisaktheih pih, lungmuang takin a om khuapi, tu-a bangin piang ding hi. Leitungah amauʼ khuapi a lian penin ngaihsun uh hi. Tua hi napi-in gamlak suakin, gamsateʼ omna suakta hi. A mu mi khempeuh in lamdang sa-in kigaih ding uh hi.

Zefaniah 2:15 Referans Kwoze

Ezekiel 28:2

“Mihing ahi Ezekiel aw, Taia khuapi a ukpa kiangah Topa Pasian ahi keimah in ka gennop thu, ama tungah hih bangin gen in: “Kisaktheihna lungsim lianpi nangmah in na nei a, kei, pasian khat ka hi hi, na ci hi. Nang pen pasian bangin pil na kisak hangin mihing na hi lel bek hi.

Nahum 3:19

Na liammate, a dam theih nading om lo a, na meimate a dam thei lo pawl ahi hi. Na thuakna thu a za mi khempeuh in lungdamin a khut uh beeng ding uh hi. Bang hang hiam cih leh na gitlohna a thuak kha lo kuamah om lo hi.

Ezekiel 28:9

Nang a hong that ding a hong kuan ciangun, kei pasian bang hi ing, na ci lailai diam? Nang hong thatte na tuah ciangin mihing na hih lelna hong kilang ding hi.

Kah la 2:15

Tua khuapi a siatna a mu mi peuhmah in awi-in a khut a betsan uh hi. A kisia Jerusalem khuapi a muh uh ciangin awi-in a lu uh pei-in a nuihsan uh hi. “Khuapi it-huai i cih hih maw, leitung bup in a kisaktheihpih hih khua maw,” ci-in a nui uh hi.

Kah la 1:1

Khatvei lai-in mi a dimtakin a tenna Jerusalem khuapi bangzah takin gamdai ahi hiam? Leitung bup in a zahtak khuapi tu-in meigong tawh a kibang ta hi. Leitung a om khuapi khempeuhte’ lak panin a thupi pen khuapi tu-in salin a kiman khinzo hi.

Jeremiah 19:8

Hih khuapi a mulkimhuai le a simmawhhuai ka suaksak ding a, a kantan mi khempeuh in khuapi siatna hangin lamdangsa-in zahpihin a phitsan ding uh hi.

Mattiu 27:39

Tua ciangin amah a va mukha mi peuhmah in a lu uh peisanin,

Ezekiel 29:3

Topa Pasian in hih bangin gen hi, ci-in Egypt kumpipa kiangah gen in: “Gun sungah a om awle lianpi ahi, nang Egypt kumpipa aw, kei pen nangma lang ka hi hi. Nail Gunpi, nangma a’ in na gen a, nangma bawlsa-in na ngaihsun hi.

Ezekiel 27:36

Tu-in nang a maimang paisuak na hita a, nangma tuah bang a tuahkhak ding uh leitungah a om sumbuk dang khempeuh lau-in ling uh hi,” a hong ci hi.

Kah la 2:1

Topa in a heh manin Jerusalem khuapi a mialcipsak hi. A vantung minthanna teng uh kisiatna a suaksak hi. Amah in a heh ni-in a Biakinnpi nangawn a susia hi.

Isaiah 32:9

Nuamtakin a om hithiat numeite aw, tho unla, ka aw za un. Nomau’ tumtakin a lungkim tanute aw, ka thugenna na ngai un.

JOB (Job) 27:23

Amaute a tai laitakun huih in nawk gawpin, a susiagawp dingin mutkhiagawp ding hi.

JOB (Job) 16:4

Note le keimah a kikhek thei hi lehang, note’ gen khempeuh kei zong ka gen thei ding hi. Note ka lu hong peisanin thu tampi tak mah ka hong gen thei ding hi.

Isaiah 32:11

Nuamtakin a om hithiat numeite aw, ling un. Nomau tumtakin a lungkimte aw, linglawng un. Na puan uh hawkkhia-in na tangguakun om unla na kawng uhah puanhampi teng un.

Isaiah 32:14

Kumpi innte kinusia-in, mi tampi a omna kumpi khuapi kilawi ding hi. Mual le tausangte zong kisiagawp ding a, late le tuuhonte in gamtatna munin nei ding uh hi.

Jeremiah 18:16

Amaute’ gam pen a mulkimhuai le simmawhna tawh a kiphitsan den ding gam a suaksak uh hi. Tua gam a kantan khempeuh mulkim mahmah uh a, lamdangsa-in a lu uh a pei uh hi.

Isaiah 47:10

Na gitlohna-ah nang na lungmuang a, “Kuamah in kei hong mu kei hi,” na ci hi. Na pilna le na theihnate in lam hong pialsak a, na lungsim sungah, “Keimah hi’ng, kei simloh midang om kei,” na ci hi.

Jeremiah 50:13

Topa’ hehna hangin kuamah teng lo ding a, gamlakpi a suak ding hi. Babylon khua a kantan mi khempeuh in lamdangsa-in khuapi siatna hangin zahko-in a phitsan ding uh hi.

Daniel 4:27

Tua ahih ciangin kumpipa aw, kong thuhilhna hong mang in. Mawhna bawl nawn kei inla, diktakin gamta in. Mizawngte hehpih leteh, tua in a sia-a na gamtatnasate hong puahsak ding a, na nuamsa toto ding hi, a ci hi.

Habakkuk 1:7

Amaute lauhuai-in, kihtakhuai mahmah uh a, a gen khempeuh uh nial theih hi lo hi.