Titu 2:11 - Tedim Bible

¹¹ Bang hang hiam cih leh mi khempeuh in hotkhiatna a ngahtheih nadingun Pasian in ama hehpihna hong lak khinzo hi.

Tedim Bible Revision 2017

¹¹ Bang hang hiam cih leh mi khempeuh in hotkhiatna a ngah theih nadingun Pasian in ama hehpihna hong lak khinzo hi.

Titu 2:11 Referans Kwoze

1 TIMOTI MASA 2:4

Mi khempeuh in hotkhiatna ngahin, thuman a theihkim ding Pasian in deih hi.

Efesa 2:8

Note’ upna hangin Pasian’ hong hehpihna tawh hotkhiatna a ngah na hi uh hi. Note’ thalawhna hangin a ngah hi loin Pasian’ hong piakkhong ahi hi.

Isaiah 45:22

“Leitung mi khempeuhte aw, kei lamah hong kihei unla hotkhiatna ngah un! Bang hang hiam cih leh kei pen Pasian ka hi a, kuamah dang om lo hi.

Hebru 2:9

Ahi zongin Pasian’ hehpihna hangin mi khempeuh a dingin Jesuh a sih theih nadingin tawlkhat sung vantung mite sangin a neuzaw-in a kibawlna i mu a, sihna a thuakna hangin minthanna le pahtawina a ngahna thu i thei hi.

Efesa 2:5

i mawhna hangin kha thu tawh kisai-in misi ihih laitakin Khrih tawh eite hong nungtasak hi. Pasian’ hehpihna hangin hotkhiatna a ngah thei ihi hi.

2 THESALONIKA NIHNA 2:16

I Topa Jesuh Khrih mahmah leh, eite hong itin, a hong hehpihna tawh thakhauhna le lametna a hong pia tawntung eite’ Pa Pasian in

ROM (Romans) 5:15

Ahi zongin Pasian’ hong piak letsong pen Adam’ mawhna tawh kibang lo ahih manin tua tegel tehkak theih ding hi lo hi. Tua mi khat a khialhna hangin mi tampi a sihna pen a man mah ahi hi. Ahi zongin Pasian’ hong itna le hong hehpihna nakpitakin lianzaw lai a, mi khat ahi tua Jesuh Khrih’ hehpihna hangin mi tampi tak tungah hong kipia letsong lian mahmah hi.

Johan 1:14

Tua Thu mihing hong suakin kote lakah hong om a, itna nei-in citak mahmah ahih manin Pasian’ pianzia a neihna ka mu cian uh hi. Hih pianzia pen Pasian’ Tapa khat bek hihna tawh a neih pianzia ahi hi.

Isaiah 52:10

Topa in minam khempeuh mai-ah a vangliatna siangtho zangin ama mite honkhia hi. Leitung mi khempeuh in i Pasian’ hotkhiatna mu ding uh hi.

Late 84:11

Bang hang hiam cih leh Topa Pasian pen eite a hong hupa a minthang i kumpi hi a, maipha le pahtawina a hong piapa ahi hi. Thumanin a gamta mite tungah Topa in na hoih bangmah siit lo hi.

Sawltak 11:23

Barnabas a tun ciangin Pasian in amaute thupha a piakna mu-in lungdam mahmah a, amaute citakin a lungsim khempeuh uh tawh Topa tungah a thuman nadingun a hanthawn hi.

Sawltak 20:24

Ahi zongin Topa Jesuh in kei sep dingin a hong piak, Pasian hehpihna hangin Lungdamna Thu, mite kiangah gen ding nasep ka tangtut zawh nakleh kei nuntakna-ah bangbang hong piang taleh a thupi-in ka ngaihsun kei hi.

Luka 3:6

Mi khempeuh in Pasian’ hotkhiatna ngah ding uh hi,’” ci-in a kigelh hi.

1 TIMOTI MASA 1:14

Pasian in genzawh lohin kei hong hehpih a, Khrih Jesuh tawh kipawlna hangin i ngahtheih upna le itna a hong guan hi.

ROM (Romans) 5:2

Ama hangin upna tawh tu-a i omna Pasian hehpihna sungah a tung ihi a, Pasian tawh minthanna ngahkhawm ding, ci-in lamen ihih manin i lung a dam hi.

Zekhariah 12:10

“David’ suanlekhakte le Jerusalem khuamite’ tungah hehpihna lungsim le thungetna lungsim ka guan ding hi. Amaute in a sutlup uh mipa enin, ta khat neihsun a sihsuah mite bangin kap ding uh a, tacil a khuaisuahte bangin nakpitakin kapin thum ding uh hi.

Late 96:10

Minam khempeuh lakah thu gen kawikawi unla, “Topa in uk hi. Leitung kikipsak a, kiling ngei lo ding hi. Amah in mihingte’ thu a manin khen ding hi,” ci un.

Kolose 1:6

Note in Pasian hong hehpihna thu za-in, ahi bangbangin na theih hun uh a kipanin thupha na ngah uh bangin leitung midang khempeuh tungah zong lungdamna thu in thupha tunin, leitung khempeuhah a kizel ahi hi.

Galati 2:21

Hih bang ka gen ciangin Pasian’ hehpihna thupha ka deih lohna ahi kei a, Thukham zuihzawhna hangin Pasian tawh kipawl theihna om hileh, singlamteh tungah Khrih sihna a mawkna hi lel ding hi, a cinuam ka hizaw hi.

2 KORIN NIHNA 6:1

Tua bangin Pasian tawh na semkhawmin om ka hih manun Pasian’ hong hehpihna thu a mawkna na suahsakkhak loh nadingun ka hong thum uh hi.

Sawltak 13:47

Bang hang hiam cih leh Topa in kote kiangah thu hong pia khinzo a, ‘Leitung mi khempeuh in hotkhiatna a ngahtheih nadingin Gentail mite’ khuavak ahi dingin ka hong koih hi,’ hong ci hi,” a ci uh hi.

Sawltak 13:43

Kikhopna inn panin a ciahkhiat uh ciangin Jew mi tampite le Jew biakna a zui Gentail mi tampite in Paul le Barnabas zui uh a, amau tegel in zong tua mite hanthawnin, Pasian’ hehpihna suangin kiptakin a om nadingun a gen uh hi.

Johan 1:9

Ama gen khuavak taktak pen zong leitungah hong tung khin a, mi khempeuh a taan khin hi.

Luka 24:47

Jerusalem khua a kipan minam khempeuh tungah a mawhna uh kisikin a kimaisak nading thu, ama min tawh kihilh ding hi, ci-in kigelh hi.

Marka 16:15

Tua khit ciangin amaute tungah, “Leitung khempeuhah note pai kawikawi unla, mi khempeuh tungah Lungdamna Thu na hilh ta un.

Mattiu 28:19

Tua ahih ciangin note pai unla, midang khempeuh, keima nungzui mi suaksakin, Pa min, Tapa min, le Kha Siangtho min tawh tui sungah na phum un.

Zekhariah 4:7

Thuhaksa pente nangawn in na ma hong khaktan zo lo ding hi. Biakinn na lamkik ding a, mite in, ‘Hoih mahmah hi,’ ci-in a ot ngeingai laitakin a khupna suang na ciang ding hi, hong ci hi,” a ci hi.

Isaiah 49:6

Amah in, “Jakob minamte a laamto ding le a suaktalai Israel mite a ngei uh a bangsakkik dingin keima nasem na hihna pen a baih lua mahmah nasep ahi hi. Keima hotkhiatna in leimong dong a phak theih nadingin minam dangte tungah khuavak ahi dingin nang kong pia ding hi,” hong ci hi.

Hebru 12:15

Pasian’ hehpihna a ngahlah na hihkhak loh nadingun na kidawm un. Zungkha a nei singkung hong khangin mi tampi gimsakin a siatsak bangin mite a siasak na hihkhak loh nadingun na kidawm un.

2 TIMOTI NIHNA 4:17

Ahi zongin Topa in kei hong ompih a, Gentail mi khempeuh tungah Pasian’ thu a kicingin ka gentheih nadingin thahatna a hong pia hi. Tua ahih manin sih nading thukhenna pan hong suaktasak hi.

Kolose 1:23

Ahi zongin note in lungdamna thu na zak cil lai-un na neih uh lametna panin ling hetloin, bulkip nei-in citakin na om paisuak ding uh ahi hi. Tua lungdamna thu mah keimah Paul in hilhin ka sepbel hi a, leitung mun khempeuhah a kihilh lungdamna thu mah ahi hi.

ROM (Romans) 10:18

Tua ahihleh amaute in thu za lo uh ahi hiam? Lai Siangtho sungah, “Amau’ awgingte leitung khempeuh ah kizel a, a thugente uh in mun khempeuh a ban hi,” ci-in a kigelh mah bangin amaute in thu za khinzo uh hi.

Late 67:2

Leitungah nangma deihna, minam khempeuhte lakah na vanglian hotkhiatna kithei tahen.

Sawltak 17:30

Pasian in mihingte’ theih loh hun lai-a a gamtatnate uh phamawh a sak loh hangin, tu-in mun khempeuha om mi khempeuhte a gamtat siatna panun a kihei nadingun thu a hong pia khinzo hi.

2 TIMOTI NIHNA 1:10

tuhun ciangin eite hong Honpa Khrih Jesuh tungtawnin a dikna hong langsak ta hi. Tua Jesuh in sihna beisak a, lungdamna thu hangin sih nawn lohna thu a hong kilangsak hi.