Sawltak 8:39 - Tedim Bible

³⁹ Tui sung panin a paikhiat khit uh ciangin Topa’ Kha Siangtho in Filip paikhiatpih hi. Mangpa in Filip mu nawn lo hi; ahi zongin lungdam takin a lampai a zom hi.

Tedim Bible Revision 2017

³⁹ Tui sung panin a paikhiat khit uh ciangin Topaʼ Kha Siangtho in Filip paikhiatpih hi. Mangpa in Filip mu nawn lo hi; ahi zongin lungdam takin a lampai a zom hi.

Sawltak 8:39 Referans Kwoze

1 KUMPI MASATE 18:12

Nang kiang panin kei ka paikhiat phetin ka theih lohna munah Topa’ kha in nang hong pua ding hi. Kei va pai-in Ahab kiangah genin amah in nang hong muh loh ciangin, ka khangno lai a kipanin keimah na nasempa in Topa a zahtak hinapi-in, amah in kei hong that ding hi.

2 KUMPI NIHNATE 2:16

Tua ciangin amaute in ama kiangah, “Tu-in en in, a thahat na nasem mihing sawmnga ka om uh hi; kong thum uh hi, kote hong paisak inla na topa hong zongsak in. Topa’ kha in amah manin mualtung ahih kei leh guam sungah amah khia hi kha ding hi,” a ci uh hi. Tua ciangin amah in, “Na zong kei ding uh hi,” a ci hi.

Ezekiel 11:24

Tua ciangin ka maang sung mahin Pasian’ kha in hong leenpihin Babylon gamah salin a omte kiang hong tunpih hi. Tua ciangin ka maangmuhna hong beita a,

Ezekiel 8:3

A khut ding tawh a kibang pian khat in hong sawkin ka samin hong man hi. Tua ciangin hih ka maang sungin Pasian’ kha in vanah hong lenpihto-in Jerusalem khuapi hong tunpih hi. Tua lai panin, Pasian a hehsuahna ahi milim a omna mun, biakinn tual sungnung lutna, leilu lam kongpi-ah hong paipih hi.

Ezekiel 43:5

Tua ciangin Topa’ kha in hong la-in a tual sungnungah hong paipih a, tua lai panin, Topa’ minthanna vang tawh biakinnsung a kidimna ka mu hi.

Ezekiel 11:1

Tua ciangin Pasian’ kha in biakinn nisuahna lam kongpi-ah hong paipih hi. Tua kongpi gei-ah mihing sawmnih le nga na om a, tuate lakah minam makai ahi nihte, Azzur’ tapa Jaazaniah le Benaiah’ tapa Pelatiah-te zong na kihel uh hi.

Marka 1:10

Tui sung panin Jesuh a thawhkhiat khit phetin vantung kihongin, ama tungah vakhu bangin Kha Siangtho a hong kumsuk a mu hi.

Filippi 3:3

Bang hang hiam cih leh eite in Kha Siangtho’ hong huhna tawh Pasian bia-in, Jesuh Khrih tawh i kipawl manin lungdamin, a tung lama kilang vun-atna limte muanin nei lo ihih manin, amaute hi loin, eite pen vun-atna man taktak a zang mite ihi zaw hi.

Jeim 4:16

Ahi zongin note kihisakin na kisial uh hi. Tua bangte hoih het lo hi.

Filippi 4:4

Topa sungah lungdam tawntung un, ka hong cihsa bangin tu-in zong lungdam un, ka hong ci kik hi.

ROM (Romans) 5:2

Ama hangin upna tawh tu-a i omna Pasian hehpihna sungah a tung ihi a, Pasian tawh minthanna ngahkhawm ding, ci-in lamen ihih manin i lung a dam hi.

Sawltak 13:52

Antiok khua-a om thu um mite ahihleh Kha Siangtho tawh kidimin lungdam mahmahin a om uh hi.

Sawltak 8:8

Tua ahih manin tua khuapi sunga om mite lungdam mahmah uh hi.

Mattiu 13:44

“Vantung ki-ukna pen lolai-ah a kiseel sum tawh kibang hi. Mi khat in a muh ciangin limtakin a seelpha hi. Amah lungdam mahmahin a inn-ah ciahpah a, a neih khempeuh a zuak khit ciangin tua lo a lei hi.

Mattiu 3:16

Jesuh a kituiphum khit phetin tui sung panin a paikhia pah hi. Tua laitakin vantung hong kihong a, vakhu bangin Pasian’ Kha Siangtho hong kumsukin ama tungah a khawl a mu hi.

Isaiah 61:10

Topa’ hangin nakpitakin ka lungdam ding a, ka Pasian’ hangin kipakin ka diang ding hi. Bang hang hiam cih leh zipi pa puanhoih tawh kizemin, mothak nu a suangmanphate tawh a kizep mah bangin amah in hotkhiatna puan kei hong silhsakin, thumanna puanpi tawh kei hong tuam khin hi.

Late 119:111

Nangmah biakna ngeina kipte tawntung keima luah ahi hi. Tuate pen keima lungdamna ahi hi.

Late 119:14

Hauhnate khempeuh sangin nangma thuhilhnate nuam ka sa zaw hi.

Sawltak 16:34

Tua ciangin a inn-ah amaute ciahpihin an a pia hi. Tu-in Pasian thu um uh ahih manin amah a kipan a innkuanpih khempeuh a lungdam mahmah uh hi.

Ezekiel 37:1

Ka sungah Topa’ vangliatna hong om lamtak ka kiphawk a, ama kha in kei hong paipihin, misi guh tawh a kidimin a om kuampi khatah hong koih hi.

Sawltak 8:29

Tua laitakin Kha Siangtho in Filip kiangah, “Pai inla tua leeng mai-ah va om in,” ci-in a sawl hi.

Sawltak 8:38

Tua ciangin a leeng a khawlsak nadingin mangpa in thu pia a, Filip tawh a nihun tui phualah pai-in Filip in amah a tuiphum hi.