Sawltak 7:42 - Tedim Bible

^42-43 Tua ahih manin kamsangte laibu sungah, ‘Israel mite aw, gamlakah kum sawmli sung, gan go-in biakna na piakte uh kei tunga nong piak uh hi lo hi. Note in na puak uh puanbuk pen Molok pasian milim puanbuk le note’ aksi pasian Refan’ puanbuk ahi hi. Tuate pen na biak dingun note’ bawltawm milim ahih manin Babylon khuapi khen pekah salin ka hong paisak ding hi,’ ci-in a kigelh mah bangin Pasian in amaute nungngat a, vana om aksite a bia dingin amaute a sawlkhia hi.

Tedim Bible Revision 2017

^42-43 Tua ahih manin kamsangte laibu sungah, ‘Israel mite aw, gamlak ah kum sawm li sung, gan go-in biakna na piakte uh kei tunga nong piak uh hi lo hi. Note in na puak uh puanbuk pen Molok pasian milim puanbuk le noteʼ aksi pasian Refanʼ puanbuk ahi hi. Tuate pen na biak dingun noteʼ bawl tawm milim ahih manin Babylon khuapi khen pekah salin ka hong paisak ding hi,’ ci-in a kigelh mah bangin Pasian in amaute nungngat a, van a om aksite a bia dingin amaute a sawl khia hi.

Sawltak 7:42 Referans Kwoze

Ezekiel 20:39

Topa Pasian in, “Israel mite khempeuh aw, na milimte uh biabia un! Ahih hangin tu a kipanin keima thu nong man’ uh kul ding a, na milimte uh letsong piakna tawh ka min siangtho na daisak nawn kei ding uh hi,” a hong ci hi.

Jeremiah 19:13

Jerusalem khua-a innte le Judah kumpite’ innte a kipan, innkhum zangah vantung a aksite khempeuh tungah paknamtui hal biakna a kipiakna innte le pasian dangte tungah dawn ding biakna a kibuakna innte khempeuh a vekin Tofeth mun bangin a nin a suak ding hi, ci hi, va ci in,” hong ci hi.

Thu-hilhkikna 4:19

Note in na mit uh tawh vantung lam ento-in, ni le kha le aksite, vantung na khempeuh na muh uh ciangin, mun khempeuh a mite’ tungah Topa na Pasian un a piak nate’ lamah kihei-in tuate bia-in a na na sep khak loh nading uh kidawm un.

Isaiah 63:10

Ahih hangin amaute in lehdo uh a, ama kha siangtho a dahsak uh hi. Tua ahih ciangin amah pen amaute’ gal suak a, amahmah in amaute a do hi.

Sawltak 7:36

Amah in Egypt gam le San Tuipi-ah lim le na lamdangte bawlin, Egypt gam panin Israel mite paikhiatpih a, gamlakah kum sawmli sung amaute a makaih hi.

Hosea 4:17

Israel mite, milim biak uuklua uh a, cihtheih hi lo hi.

Ezekiel 8:16

Tua ciangin biakinn tual sungnungah hong paipih hi. Tua lai-ah biakinn kongkhak gei, biakna taute le innliim kikal sanah mihing sawmnih le nga khawng na om a, biakna tau nungngatin nisuahna lam nga-in nisuak tung na bia uh hi.

Isaiah 66:4

Tua ahih ciangin amaute tungah gimna ka tungsak ding a, amau’ kihtak thute mah amau’ tungah ka tungsak ding hi. Bang hang hiam cih leh ka sap ciangin kuamah in hong dawng lo uh a, thu ka gen ciangin kuamah in hong ngai lo uh hi. Keima thu man loh ding mah utzaw uh a, a sia-in gamta uh hi, a ci hi.

Joshua 24:20

Topa nusia-in gamdang pasian-te’ na na sep uhleh, note tungah a hoih hong bawl khit ciangin amah hong kihei-in note’ tungah siatna hong bawlin note hong beisak ding hi,” a ci hi.

Ezekiel 20:25

“Tua ahih manin kei zong amaute a dingin nuntakna a piangsak lo thukhamte le thupiaknate amaute tungah ka pia hi.

Late 95:10

Kum sawmli sung tua minam ka kih a, “Amaute pen a lungsim uhah a khial mi hi a, amaute in ka thupiakte mang lo uh hi,” ka ci hi.

2 KUMPI NIHNATE 21:3

Bang hang hiam cih leh amah in a pa Hezekiah’ suksiatsa mualtung a biaknate lamkik hi. Tua ciangin amah in Baal a dingin biakna taute phut a, Israel kumpi Ahab’ bawl bangin Asherah milim khat bawl a, vantung a om nate khempeuh bia-in tuate’ na a sem hi.

2 KUMPI NIHNATE 17:16

Amaute in Topa a Pasian uh thupiakte khempeuh nusia-in amau a dingin a kisung bawngno lim nih bawl uh hi. Amaute in Asherah milim khat bawl uh a, vantung a om nate khempeuh bia-in Baal milim na sem uh hi.

Thu-hilhkikna 17:3

pasian dangte’ na semin tuate bia ahi zongin, keimah in ka kham ahi ni ahi a, kha ahi a, vantung na khat peuhpeuhte’ na semin bia ahi zongin,

Isaiah 43:23

Meihal biak nadingin kei kiangah na tuu nong paipih kei a, biakpiakna tawh kei nong pahtawi kei hi. Piakna tawh nang kong vangiksak nai kei a, paknamtui piakna tawh kong gimsak nai kei hi.

Hebru 3:9

Na pu na pate un kum sawmli sung ka nasepnate mu napi-in kei hong ze-et veve uh hi.

Jeremiah 8:2

Amaute in a it uh, a na a sepsak uh, a delh uh, a zon uhleh a biak uh ahi ni le kha le vana om nate khempeuh mai-ah a kiphokhia ding hi. Tua guhte kikhawm nawn lo ding a, kiphum nawn lo ding hi. Leilak a ek kinusia bang ahi lel ding hi.

Johan 6:45

Kamsangte in a lai gelhna uhah, ‘Pasian in mi khempeuh a hilh ding hi,’ na ci uh hi. Tua ahih manin Pa kiang panin thu za-in a thei mi khempeuh ka kiangah a hong pai ahi hi.

Sawltak 13:40

Tua ahih manin kamsangte in, ‘Pasian a thusim lo mite aw, lamdangsa lua-in na si ding uh hi. Na nuntak sungun note lakah ka sepkhiat ding uh thu pen mi khatpeuh in hong gen hileh na up hetloh ding uh thu ahi hi,’ ci-in a gen uh thute, note tungah hong pian’ khak loh nadingin kidawm un,” a ci hi.