Sawltak 24:14 - Tedim Bible

¹⁴ Ahi zongin nangma kiangah kong pulaknop thu in: Amaute in man lo hi, a cih uh tua Thu zui-in kote’ pu le pate’ Pasian ka bia hi. Moses’ Thukham laibu sunga a kigelh thu khempeuh le kamsangte’ laibu sunga a kigelhte khempeuh zong ka um hi.

Tedim Bible Revision 2017

¹⁴ Ahi zongin nangma kiangah kong pulak nop thu in: Amaute in man lo hi, a cih uh tua Thu zui-in koteʼ pu le pateʼ Pasian ka bia hi. Mosesʼ Thukham laibu sunga a kigelh thu khempeuh le kamsangteʼ laibu sunga a kigelh khempeuh zong ka um hi.

Sawltak 24:14 Referans Kwoze

Sawltak 9:2

Topa’ thu a zui mi numei pasal a muh peuhpeuh manin Jerusalem khua-ah a ciahpih theih nadingin Damaskas khua-a Jew mi kikhopna inn ukte kiangah a lah dingin lai a ngen hi.

ROM (Romans) 3:21

Ahi zongin tu-in thukham zuihna hang hi loin thudang khat hangin Pasian tawh kipawl theih nading lampi hong kilangzo a, Thukham le kamsangte in zong hih thu-ah teci a pang uh hi.

Sawltak 28:23

Tua ahih manin Paul tawh a kimuh nading uh a ni khat seh uh a, tua a kiciam ni-un Paul a zintunna munah Jew mite tampi tak a kikhawm uh hi. Paul in zingsang a kipan nitak dongin amaute tungah Pasian’ Ukna thu gentel a, Jesuh’ thu man hi, ci-in a uptheih nadingun Moses Thukham le kamsangte’ laigelhte siksanin a gen hi.

Sawltak 3:13

I pupite Abraham, Isaac, le Jakob Pasian in a nasem Jesuh tungah ama vangliatna a pia hi. Note in aana neite khut sungah tua Jesuh na pia uh a, Pilat mangpa in amah khah dingin a ngaihsut khit ciang nangawnin Pilat’ maitang mahah amah na nial teitei uh hi.

Sawltak 26:22

Ahi zongin Pasian in tuni ciang dong hong huh ahih manin milian mineu, a kuamah peuh tungah thu a hilh ka hi hi. Keima thuhilhte pen kamsangte le Moses in hong tung ding hi, ci-in a gen thute mah ahi hi.

Sawltak 24:5

Hih mipa, buaina a piangsak, a kihtakhuai mi ahihna ka mu uh hi. Mun khempeuha om Jew mite lakah buaina piangsak a, Nazareth mi pawl a kicite a makai pa ahi hi.

2 TIMOTI NIHNA 1:3

A sun a zanin ka thungetna-ah nang ka hong phawk tawntung a, ka pu ka pate’ sep mah bangin kisuanna lungsim om hetloin a na ka sep Pasian tungah ka lungdamna ka ko hi.

Sawltak 26:27

Kumpi Agrippa aw, kamsangte’ thugente um hi lo na hi hiam?” a ci hi.

Mangmuhna 19:10

Tua ciangin amah a bia dingin a khe phungah ka kunsuk a, ahi zongin amah in, “Kei hong bia kei in. Kei pen Jesuh’ hong thugente a lenkip nang le na sanggamte khempeuh tawh nasemkhawm khat ka hi hi. Pasian bia in!” hong ci hi. Jesuh’ thugen in kamsang nasep sepnop nading lungsim a guan ahi hi.

1 PETER MASA 1:11

Khrih in gimna thuakin, tua khit ciangin minthanna a ngah nading thu Kha Siangtho in a gen ciangin, amaute sungah a om tua Khrih’ Kha Siangtho in kua a cihna hi a, bang hun ciang hi ding hiam, ci-in a kankan uh pen tuhun thu a gen ahi hi.

Titu 3:10

Kitot, kikhen nading a piangsak mite pen khatvei nihvei bang na hilh khit ciangin kisukha nawn vet kei in.

Galati 5:20

milim biakna, mi bumna, kilangbawlna, kitotna, hazatna, hehna, huaihamna, kikhenna, pawltuam lungsim neihna,

1 KORIN MASA 11:19

Bang hang hiam cih leh kuateng pawlpi mi citak ahi hiam, ci-in a kilat nadingin kikhenna a ommah ding ahi hi.

Sawltak 26:6

Ko Israel minam sawm le nihte in Pasian’ thuciam ngah ding lametna tawh a sun a zanin Pasian ka biabia uh a, ka pu ka pate uh tungah Pasian in a thuciamna ngah ding lamenin ka omna hangin hih lai-ah thusitna thuakin a ding ka hi hi. Kumpipa aw, hih thu ka lametna hangin Jew mite in kei hong mawhsak ahi uh hi.

Sawltak 24:22

Tua ciangin tua Thu paizia teltakin a thei Feliks in a thusitna hialbawl a, “Galkap mangpa Lysias hong tun ciangin na thu uh kong khensak ding hi,” ci-in a genkhit ciangin,

Sawltak 22:14

Tua ciangin amah in, ‘I pu i pate’ Pasian in ama deihna a thei ding, a thuman a Nasempa a mu ding, le ama kam mahmah tawh a thugen a za dingin nang hong teel khinzo hi.

Sawltak 19:9

Ahi zongin mi pawlkhat in kin hetloin um nuam lo uh a, mipi’ zakin Topa’ thu paiziate gensia gawp uh ahih manin Paul in amaute nusia-in thu um mite paikhiatpih a, Tirannas in thugenna-in a neih innpi sungah nisimin thugenna hun a zang hi.

Sawltak 13:15

Kikhopna inn ukte in Moses Thukham Laibu sung le kamsangte’ laibute a sim khit uh ciangin amaute kiangah, “Sanggamte aw, mihonte tungah hanthotna kam na gennop uhleh thu nong gen ding uh ka deih uh hi,” a cisak uh hi.

Sawltak 10:43

Amah a um mite khempeuh in ama min hangin a mawhna uh a mai nading thu, kamsangte khempeuh in zong gen belin a neih khat uh ahi hi,” a ci hi.

Sawltak 7:32

‘Kei pen na pu na pate uh ahi Abraham, Isaac, le Jakob-te’ Pasian ka hi hi,’ a na ci hi. Moses zong lau-in linggawp a, en ngam lo hi.

Sawltak 5:30

Note in singlamteh tungah Jesuh khai-in na thah khit uh ciangin i pu i pate’ Pasian in sihna panin amah hingkiksak khinzo hi.

Johan 1:45

Nethanel tawh a kituah ciangin Filip in, “Moses in Thukham laibu sungah a gelh mipa, le kamsangte in zong a gelh mipa ka mu khin uh hi. Amah Jesuh hi a, Nazareth khuami Josef’ tapa ahi hi,” a ci hi.

Luka 24:44

Tua ciangin Jesuh in amaute kiangah, “Tu-a thupiang khempeuh pen note tawh kong omkhawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi.

Luka 24:27

Tua ciangin Jesuh in Lai Siangtho sungah ama thu a kigennate khempeuh, Moses laibu a kipanin kamsangte’ laibu khempeuh a khiatna a gen hi.

Luka 16:29

Ahi zongin Abraham in, ‘Na sanggamte a hilh dingin Moses le kamsangte om uh ahih manin tuate’ thugen na ngai ta uh hen,’ a ci hi.

Luka 16:16

“Tuiphumpa Johan’ hun ciang dong Moses Thukham le kamsangte’ thugente pen zuih belin kinei a, ahi zongin Pasian’ Ukna hangin Lungdamna Thu a kihilh hun a kipanin hih thu-ah mi khempeuh hong kituhteh uh hi.

Luka 1:70

Amah in tanglai-in a kamsang mi siangthote tungtawnin thu hong gen a,

Mattiu 22:40

Hih thukham nihte tung panin thukham dang khempeuh le kamsangte’ thuhilhna khempeuh a hong meengkhia ahi hi,” ci-in a dawng hi.

Mattiu 10:32

“Keima mi ahihna thu mite’ theihin a genkhia mite, kei zong vantungah ka Pa’ mai-ah keima mi ahihna thu ka gen ding hi.

Mattiu 7:12

Tua ahih manin note tungah hong kibawl ding na deih bangun midangte tungah na bawl un. Moses Thukhamte le kamsangte’ thuhilhnate pen hih mah a deihna ahi hi.

Micah 4:2

Minam tampite hong pai-in, “Israel mite’ Pasian’ biakinn, Topa’ mualah va paito ni. Tua lai-ah ama deihna hong hilh ding a, ama deihna bangin i gamta ding hi,” ci ding uh hi. Bang hang hiam cih leh Zion panin thuhilhna hong gingkhia a, Jerusalem panin Topa’ thu hong paikhia hi.

Amos 8:14

Samaria milim pasian Ashimah min tawh kiciam a, ‘Dan khuapi pasian a nungta ahih mah bangin,’ le ‘Beersheba khuapi pasian a nungta ahih mah bangin,’ a ci mite pukin thokik nawn lo ding uh hi,” a ci hi.

Late 119:46

Kumpite’ mai-ah nangma thute ka gen ding a, maizumna ka thuak kei ding hi.

1 KHANG TANGTHU MASATE 29:18

Ka pute uh Abraham, Isaac, le Israel Pasian, Topa aw, na mite’ lungsim sungah tua bang ngimnate le ngaihsutnate omsak tawntung inla, amaute’ lungsim nangma lamah kai in.

Paikhiatna 3:15

Pasian in Moses kiangah, “Hih thu Israel mite tungah gen in: ‘Topa, na pate uh’ Pasian, Abraham’ Pasian, Isaac’ Pasian, le Jakob’ Pasian in note kiangah kei hong sawl hi,’ ci in. Hih pen keima min hi tawntung ahih manin kei pen khang tawntungin phawk ding ka hi hi.

Sawltak 19:23

Tua hun laitakin Topa’ thu hangin Efesa khua-ah buaina lianpi khat a hong piang hi.

Sawltak 15:5

Ahi zongin Farisi mite sung panin thu um mi pawlkhat in, “Amaute in Moses Thukham zui-in, a vun uh a ki-at nading uh gen ding kisam hi,” a ci uh hi.

Sawltak 25:8

Paul in, “Jew mite’ Thukham ahi a, Rom gam uk kumpipa tungah ahi zongin ka khialhna bangmah om het lo hi,” ci-in a kisut hi.

Sawltak 26:4

“Jew mite khempeuh in ka neutung a kipan, keima pianna gam le Jerusalem khua-a ka omzia khempeuh hong thei uh hi.

Sawltak 28:22

Ahi zongin tu-a nangma kipawlna mite’ thu pen a koimah peuhah mi khempeuh in gensia uh ahih manin nangma ngaihsutna taktak ka zanuam uh hi,” a ci uh hi.

ROM (Romans) 1:9

Ama Tapa hangin Lungdamna Thu ka lungsim khempeuh tawh hilhin a na ka sep Pasian in hih ka thugente a man taktak ahihna thu hong thei hi.