Sawltak 21:3 - Tedim Bible

³ Saipras tuikulh a kigal muhna mun ka tun uh ciangin tua tuikulh leitaw lampang kantanin Syria gam lam manawhin ka paisuak uh a, Taia khua ka tun uh ciangin teembaw in a van puakte suah ahih manin teembaw tung pan ka tuakkhia uh hi.

Tedim Bible Revision 2017

³ Saipras tuikulh a kigal muhna mun ka tun uh ciangin tua tuikulh leitaw lam pang kantanin Syria gam lam manawhin ka paisuak uh a, Taia khua ka tun uh ciangin teembaw in a van puakte suah ahih manin teembaw tung pan ka tuak khia uh hi.

Sawltak 21:3 Referans Kwoze

Sawltak 27:4

Tua lai panin ka ding leuleu uh a, huih in hong maiphut ahih manin Saipras tuikulh pang beelin ka pai uh hi.

Sawltak 21:16

Sisaria khua panin thu um mi pawlkhat in zong hong zui uh a, ka tun nading uh Mnason’ inn-ah hong paipih uh hi. Mnason pen Saipras tuikulh gammi hi a, sawt pek a kipanin thu um mi a na hi khinsa ahi hi.

Sawltak 12:20

Taia khuamite le Sidon khuamite tungah Herod heh mahmah ahih manin Herod tawh a kimu dingin hih khua nih mite hong paikhawm uh hi. A masa-in kumpi innsunga ulian nasem ahi Blastus a pawlmat phot uh hi. Hih khua nihte’ annek tuidawn pen hih kumpipa’ gam panin a ngah uh ahih manin Blastus makai sakin Herod kiangah va pai-in kilem nading thu a va gen uh hi.

Sawltak 4:36

Tua hi a, Saipras tuikulh-a suak, Levi mi Josef, sawltakte in Barnabas (Hanthawn Siampa a cihnopna) min a phuah pa in,

Mattiu 4:24

Syria gam sung khempeuhah ama thu kizel ahih manin dawivei mi, sibup mi, khutzaw khezaw mi a kipanin natna satna a tuamtuam a nei mi khempeuh ama kiangah hong kipuak a, amah in a vekpi-in a damsak hi.

Sawltak 18:18

Korin khua-ah ni tampi sung thu um mite tawh Paul omkhawm lai a, tua khit ciangin amaute mangpha khakin Syria gam a zuan dingin Prisilla le Aquila tawh teembaw a tuang uh hi. Paul in Pasian tungah thuciamnasa nei ahih manin teembaw a tuan ma-un Korin khuapi teembaw khawlna Kenkhrea munah a sam a metsak hi.

Sawltak 15:41

Syria gam le Silisia gam nawkin pai-in pawlpite hanthawnin a thahatsak hi.

Sawltak 15:39

Hih thu hangin amau tegel nakpitakin kinial uh ahih manin kikhenlawh uh a, Barnabas in Johan Marka zawnin Saipras tuikulh gam a zuan dingin teembaw tawh a pai hi.

Sawltak 15:23

a nuai-a kigelh bangin lai a puasak uh hi. Tua a lai puaksak uh sungah, “Sawltakte le upate ahi ko na sanggamte un, Antiok khua, Syria gam, le Silisia gam a om thu upna sungah sanggam ahi Gentail mite tungah hopihna kam kong khak uh hi.

Sawltak 13:4

Kha Siangtho’ sawlna mah bangin Seleusia khua-ah paisuk uh a, tua khua panin teembaw tuangin Saipras tuikulh-ah a pai uh hi.

Sawltak 11:19

Stefen a kithah huna bawlsiatna hangin thu um mite tampi kithehthang uh hi. Mi pawlkhatte Foenisia gam, Saipras gam, le Antiok khua ciang dong tung uh a, Jew mite kiang bekah Pasian’ thu a hilh uh hi.

Luka 10:13

Tua ciangin Jesuh in, “Khorazin khuapi mite le Bethsaida khuapi mite aw, gimna lianpi na thuak ding uh hi. Bang hang hiam cih leh note khua sungah a hong kilak na lamdangte, Taia le Sidon khua sungah kilak hileh amaute in kisikna limin sawtpekin puanhampi silhin vut kinuh ding uh hi.

Luka 2:2

Kuirinias in Syria gam a uksawn hun laitakin hih bangin mi phazah kisimna thu hong piang hi.

Mattiu 11:21

“Khorazin khuapi mite le Bethsaida khuapi mite aw, gimna lianpi na thuak ding uh hi. Bang hang hiam cih leh note khua sungah a hong kilak na lamdangte, Taia le Sidon khua sungah kilak hileh amaute in kisikna limin sawtpekin puanhampi silhin vut kinuh ding uh hi.

Isaiah 7:2

“Syria-te pen Efraim mite tawh kikop,” ci-in David’ innkuante tungah a kigen ciangin, huih in gamlak a singte a mut bangin amah le a mihingte’ lungsim kiling hi.

Late 87:4

Kei hong theite lakah Egypt le Babylon ka hel hi. Filistia, Taia le Ethiopia te zong kihel a, “Hihte pen hua lai mah panin a piang ahi hi,” kici ding hi.

Late 45:12

Mi haupen ahi Taia mite in na manpha namkim letsong tawh nang hong maivil ding uh hi.

2 SAMUEL NIHNA 8:6

Tua ciangin David in Damaskas gam Aram-ah khuacingte a koih hi. Syria mite David’ nasem suak uh a, siah a puak uh hi. Topa in David a paina peuhpeuhah gualzawhna a pia hi.

Thukhente 10:6

Tua ciangin Topa’ muhna-ah Israel mite a sia gamta kik uh a, Syria mite’ pasian-te, Sidon mite’ pasian-te, Moab mite’ pasian-te, Ammon mite’ pasian-te, Filistia mite’ pasian-te le Baal-te, le Ashtaroth bia uh a, amaute in Topa nusia-in ama na sem lo uh hi.

Sawltak 21:2

Tua lai panin Foenisia gamah a pai ding teembaw khat na om ahih manin tua teembaw tuangin ka pai uh hi.

Sawltak 21:7

Taia khua panin teembaw tawh pai-in Tolemais khua ka tung uh a, tua lai-ah thu um mite kiangah sun khat kulhin amaute tawh ka kiho uh hi.