Sawltak 18:26 - Tedim Bible

²⁶ Amah in kikhopna inn sungah hangtakin thu hilh ding kipan a, Prisilla le Aquila in ama thuhilhna a zak uh ciangin a omna uh inn-ah Apollos ciahpihin, Pasian’ thu paiziate a mantakin a hilhtel uh hi.

Tedim Bible Revision 2017

²⁶ Amah in kikhopna inn sungah hang takin thu hilh ding kipan a, Prisilla le Aquila in ama thuhilhna a zak uh ciangin a omna uh inn ah Apollos ciah pihin, Pasianʼ thu pai ziate a mantakin a hilh tel uh hi.

Sawltak 18:26 Referans Kwoze

Hebru 6:1

Tua ahih manin Khrih thu a kipat cilna lelte nusia-in a thuthuk zawte ngaihsutin nei ni. Bangmahin a kimang lo nasepnate nusiat ding, Pasian upna thu,

1 KORIN MASA 12:21

Tua ahih manin mit in khut kiangah, “Nang ka hong kisam kei hi,” ci thei lo a, lutang in zong khe kiangah, “Nang ka hong kisapna om lo hi,” ci thei lo hi.

Sawltak 18:25

Amah in Topa’ zia thei a, lawp mahmahna tawh Jesuh’ thu a mantakin a hilh hi. Ahi zongin amah in Johan’ tuiphumna thu bek a thei hi.

Sawltak 14:3

Tua lai-ah sawltakte sauveipi tam uh a, Topa Jesuh thu hangtakin a hilh uh hi. Ama dikna thu a hilhnate uh man hi, ci-in a lah nadingin Topa in amaute tungah lim le nalamdang bawltheih nading vangliatna a pia hi.

2 PETER NIHNA 3:18

Hehpihna thu le i Topa le Honpa Jesuh Khrih theihna thu-ah na khangto semsem zaw un. Tuhun a kipanin a tawntungin amah in minthanna ngah paisuak tahen. Amen.

1 KORIN MASA 3:18

Note khatpeuh hih leitung ngeina-ah a pilin na kingaihsut uhleh a pil taktak na hih theih nadingun a hai na suak phot un.

Sawltak 28:23

Tua ahih manin Paul tawh a kimuh nading uh a ni khat seh uh a, tua a kiciam ni-un Paul a zintunna munah Jew mite tampi tak a kikhawm uh hi. Paul in zingsang a kipan nitak dongin amaute tungah Pasian’ Ukna thu gentel a, Jesuh’ thu man hi, ci-in a uptheih nadingun Moses Thukham le kamsangte’ laigelhte siksanin a gen hi.

Sawltak 8:31

Amah in, “Mi khatpeuh in hong hilhtel lohpi-in bangci theih ding ka hi hiam?” ci-in dawng a, ama leeng tungah Filip a tuang dingin a sam hi.

Johan 7:17

Pasian’ deihna bangin a gamta nuam mi peuhmah in, ka thugente pen Pasian’ kiang panin a hong pai thu a gen ka hihna leh keima thu bek tawh a gen ka hihna khenthei ding uh hi.

Luka 24:27

Tua ciangin Jesuh in Lai Siangtho sungah ama thu a kigennate khempeuh, Moses laibu a kipanin kamsangte’ laibu khempeuh a khiatna a gen hi.

Luka 19:26

A topa in, ‘Ke’n kong cihin-ah, a neisate tungah kipiathuah ding a, ahi zongin a nei lote tung panin themkhat a neihsun nangawn kilaksak ding hi.

Marka 10:15

Hih naupangno khat’ man’ bangin Pasian’ Ukna a mang lo mi peuhmah Pasian’ Ukna sungah om lo ding ahihna thei un,” a ci hi.

Isaiah 58:1

Na aw siit hetloin nakpitakin kiko inla, peengkul aw bangin gingsak in. Ka mihingte tungah amau’ khialhnate gen inla, Jakob innkuan tungah amau’ mawhnate gen in.

Paunak 25:12

Hilhna a sang thei mipa a dingin a pil thuhilhpa pen kizepna kham bilbah tawh kibang hi.

Paunak 9:9

Mipilte thuhilh lecin pil semsemna-in nei ding a, thuman mite thuhilh lecin a thutheihna uh khang semsem ding hi.

Paunak 1:5

Mi ciimsate ciimsak semsemin, mi pilsate pilsak semsemin,

1 KORIN MASA 8:2

Mi khat in thu a thei-in a kingaihsut leh a taktakin a theih dingin a kilawmzah a thei nai lo ahi hi.

Sawltak 18:18

Korin khua-ah ni tampi sung thu um mite tawh Paul omkhawm lai a, tua khit ciangin amaute mangpha khakin Syria gam a zuan dingin Prisilla le Aquila tawh teembaw a tuang uh hi. Paul in Pasian tungah thuciamnasa nei ahih manin teembaw a tuan ma-un Korin khuapi teembaw khawlna Kenkhrea munah a sam a metsak hi.

Sawltak 19:8

Tua ciangin Paul in kikhopna inn sungah hangtakin kha thum sung thu hilh a, mite in Pasian’ Ukna thu a upzawh nadingun nakpitakin a gen hi.