Sawltak 15:5 - Tedim Bible

⁵ Ahi zongin Farisi mite sung panin thu um mi pawlkhat in, “Amaute in Moses Thukham zui-in, a vun uh a ki-at nading uh gen ding kisam hi,” a ci uh hi.

Tedim Bible Revision 2017

⁵ Ahi zongin Farisi mite sung panin thu um mi pawl khat in, “Amaute in Moses Thukham zui-in, a vun uh a ki-at nading uh gen ding kisam hi,” a ci uh hi.

Sawltak 15:5 Referans Kwoze

Sawltak 15:1

Judea gam panin Antiok khua-ah mi pawlkhat hong pai uh a, innkuan khat bangin a om thu um mite kiangah, “Moses Thukham sungah a kigen bangin na vun uh na at kei uhleh hotkhiatna na ngah kei ding uh hi,” ci-in thu hilh ding hong kipan uh hi.

Sawltak 21:20

Ama thugen teng a zakkhit uh ciangin a vekpi-un Pasian a phat uh hi. Tua ciangin Paul kiangah, “Sanggam aw, hih lai-ah na theih ding thu khat om hi. Hih lai-ah thu um Jew mi tampi tak om a, amaute in thukham nakzuih mahmah uh hi.

Sawltak 15:24

Kote’ hong sawl lohpi-in ko kiang panin mi pawlkhat hong pai-in a thugenna uh tawh note hong buaisakin hong lung-amsak hi, ci-in ka za uh hi.

Sawltak 24:5

Hih mipa, buaina a piangsak, a kihtakhuai mi ahihna ka mu uh hi. Mun khempeuha om Jew mite lakah buaina piangsak a, Nazareth mi pawl a kicite a makai pa ahi hi.

Mattiu 3:7

Ahi zongin Farisi mite le Saddusi mite tampi tak tui a kiphum dingin a hong pai a muh ciangin Johan in amaute kiangah, “Gul bangin ngian a zang note aw, a hong tung ding Pasian’ hehna panin na suahtak theih nading uh kua in hong hilhkhol ahi hiam?

Sawltak 5:17

Tua ciangin siampi lianpen pa le amah tawh a kipawl tua lai-a Saddusi mite in sawltakte haza-in thangpai uh ahih manin thu bawl ding a ngaihsun uh hi.

Sawltak 24:14

Ahi zongin nangma kiangah kong pulaknop thu in: Amaute in man lo hi, a cih uh tua Thu zui-in kote’ pu le pate’ Pasian ka bia hi. Moses’ Thukham laibu sunga a kigelh thu khempeuh le kamsangte’ laibu sunga a kigelhte khempeuh zong ka um hi.

Sawltak 28:22

Ahi zongin tu-a nangma kipawlna mite’ thu pen a koimah peuhah mi khempeuh in gensia uh ahih manin nangma ngaihsutna taktak ka zanuam uh hi,” a ci uh hi.

1 KORIN MASA 7:18

Vun ki-atsa mi khat Pasian in a sap leh, a vun ki-atna lim phiat tuan kei tahen.

Galati 2:11

Antiok khua-ah Peter hong hawh sungin a gamtat khialhna hangin thu uppih mite lak mahah amah ka taii hi.

Galati 2:14

Lungdamna thu tawh kizui-in a mantakin gamta lo uh hi, ci-in ka muh ciangin amaute khempeuh’ zakin Peter kiangah, “Nang pen Jew mi hinapi-in Jew mi bangin gamta loin Gentail mite bangin a gamta khinsa na hi hi. Tua bangin a gamta khinsa hinapi-in bang hangin tu-in Gentail mite, Jew mite bangin a gamtat nadingun na gamtatna tawh lakkik na hi hiam?” ka ci hi.