Sawltak 15:3 - Tedim Bible

³ Amaute a pai uh ciangin pawlpi mite in khuanawl ciang va kha uh a, Gentail mite zong Pasian lamah a kiheina thu, a nawkna uh Foenisia gamah gen kawikawi uh ahih manin thu um mite khempeuh a nuam mahmah uh hi.

Tedim Bible Revision 2017

³ Amaute a pai uh ciangin pawlpi mite in khua nawl ciang va kha uh a, Gentail mite zong Pasian lamah a kiheina thu, a nawkna uh Foenisia gamah gen kawikawi uh ahih manin thu um mite khempeuh a nuam mahmah uh hi.

Sawltak 15:3 Referans Kwoze

Sawltak 14:27

Antiok khua a tun uh ciangin amaute in pawlpi mite khawm uh a, a khualzinna uhah Pasian in na a seppihna khempeuh le Gentail mite in zong thu a uptheih nadingun Pasian in lam a honsaknate khempeuh a gen uh hi.

Sawltak 21:5

Amaute kiang panin ka ciahkhiat ding uh hun hong tun ciangin ka ding khia uh a, a zite a tate uh tawh a vekpi-un khuanawl ciang hong zui uh hi. Tuipi gei ka tun uh ciangin khukdinin thu ka ngen uh hi.

Titu 3:13

Sitni Zenas le Apollos-te a khualzinna uh manlang takin a paisuak theih nadingun na hihtheih bangin na huh inla, lamkalah kisapna bangmah a neihkhak loh nading uh zong na thei in.

1 KORIN MASA 16:11

Kuamah in na simmawhbawl kha kei unla, kei kiang a hong tunkik theih nadingin nuamtakin a khualzin a hong zoptheih nadingin na huh un. Thu uppih i sanggam dangte tawh kei kiangah a hong pai dingin ka lamet ahi hi.

1 KORIN MASA 16:6

Note kiang panin mundang ka zin nading peuhpeuhah kei na hong huh theih nadingun note kiangah tomno sung bek hi loin phalbi hun sung tawntung bang ka hong taamthei kha ding hi.

ROM (Romans) 15:24

tu-in note tawh kimu theita dingin ka kilamen hi. Spain gam ka paikawmin note kiang ka hong nawk nuam a, note tawh tawlkhat i kikholh khit ciangin Spain gam ka paina dingah nong huh ding uh ka ut hi.

Sawltak 15:12

Tua ciangin Barnabas le Paul in Gentail mite lakah amau tungtawnin Pasian in lim le nalamdang a bawlnate khempeuh a gen laitakun mi khempeuh pau loin a om uh hi.

2 KORIN NIHNA 1:16

Masedonia gam ka pai ciangin hong nawk masa-in, Masedonia gam panin ka kilehkik ciangin zong Judea gam a ka paina dingah nong huh theih nadingun hong nawk leuleu dingin ka ngaihsun masa phot hi.

Sawltak 28:15

Rom khua-a om ulenaute in kote’ thu na za uh ahih manin pawlkhat in, “Appias Sumbuk,” ciang dong hong dawn uh a, pawlkhat in “Ansai Thumna,” ciang hong ban uh hi. Paul in amaute a muh ciangin Pasian tungah a lungdamna ko a, a lungsim hong nuam mahmah hi.

Sawltak 13:52

Antiok khua-a om thu um mite ahihleh Kha Siangtho tawh kidimin lungdam mahmahin a om uh hi.

Sawltak 13:48

Gentail mite in hih thu a zak uh ciangin lungdam mahmah uh a, Pasian’ thu hoih mahmah hi, ci-in a phat uh hi. Nuntak tawntungna a ngah dingin Pasian in a teelsa mite in Pasian’ thu hong um uh hi.

Sawltak 8:14

Samaria mite in Pasian’ thu a sankhitna uh, Jerusalem-a om sawltakte in a zak uh ciangin amaute kiangah Peter le Johan a paisak uh hi.

Luka 15:32

Tu-in na naupa a sisa hong hingkik a, a mangsa hong tungkik ahih manin lungdamin pawi i bawl ding ahi hi,’ ci-in a pa in a dawng hi,” a ci hi.

Sawltak 1:15

Tua khit a sawt loin thu um mi zakhat le sawmnih bang a kikhop khawm laitakun Peter hong dingin thu hong gen a,

Sawltak 15:1

Judea gam panin Antiok khua-ah mi pawlkhat hong pai uh a, innkuan khat bangin a om thu um mite kiangah, “Moses Thukham sungah a kigen bangin na vun uh na at kei uhleh hotkhiatna na ngah kei ding uh hi,” ci-in thu hilh ding hong kipan uh hi.

Sawltak 15:4

Jerusalem khua a tun uh ciangin sawltakte, upate, le pawlpite in limtakin zin na do uh a, Pasian in na a seppihna thu, amaute kiangah a gen uh hi.

Sawltak 15:22

Tua ciangin sawltakte, upate, le pawlpi buppi in amau sung panin mi pawlkhat teelin Paul le Barnabas tawh Antiok khua-ah a paikhawmsak ding uh a vaihawm uh hi. Amaute tawh a paikhawm dingin thu um mite in a zahtakbawl mahmah mi nih, Barsabbas Judas le Silas teelkhia uh a,

Sawltak 15:32

Judas le Silas zong kamsangte mah hi uh a, thu um mite tawh sauveipi thu kikum uh a, amaute’ lungsim thanuam sakin a thahatsak uh hi.

Sawltak 17:15

Tuipi gei-ah Paul a paipih thu um mite in Athen khua ciang dong a va zui uh hi. Athen khua panin Berea khua-ah hong ciahkik uh ciangin, Silas le Timoti in a manlang theithei-in hong delh uh hen, ci-in Paul’ kam vaikhak thu a hong pua uh hi.

Sawltak 20:38

Paul in, “Kuamah in nong mukik nawn kei ding uh hi,” a cihna hangin a dah mahmah uh hi. Amaute in teembaw tung ciang dong Paul a hong kha uh hi.