Sawltak 13:32 - Tedim Bible

^32-33 Kote pen note kiangah Lungdamna Thu a puak dingin hih lai-ah a hong om ka hi uh hi. Tua thu in: Pasian in i pu i pate tungah a ciam thu pen Jesuh a hinkik sakna tawh, Israel’ suan ahi eite le midang khempeuh a dingin tu-in a hong tungsak ahi hi. Late a lian nihna sungah, ‘Nang pen ka Tapa na hi a, tuni-in nangma Pa ka suak hi,’ a cihna thu hong tungsak hi.

Tedim Bible Revision 2017

^32-33 Kote pen note kiangah Lungdamna Thu a puak dingin hih lai ah a hong om ka hi uh hi. Tua thu in: Pasian in i pu i pate tungah a ciam thu pen Jesu a hinkiksakna tawh, Israelʼ suan ahi eite le midang khempeuh adingin tu-in a hong tungsak ahi hi. Late a lian nihna sungah, ‘Nang pen ka Tapa na hi a, tu ni-in nangma Pa ka suak hi,’ a cihna thu hong tungsak hi.

Sawltak 13:32 Referans Kwoze

ROM (Romans) 4:13

Abraham le a suan a khakte in leitung luah ding hi, ci-in Pasian in thu a ciamna pen Abraham in Thukham a zuihna hang hi loin, a upna hangin Pasian in mihoihin a sanna hang ahi hi.

Sawltak 26:6

Ko Israel minam sawm le nihte in Pasian’ thuciam ngah ding lametna tawh a sun a zanin Pasian ka biabia uh a, ka pu ka pate uh tungah Pasian in a thuciamna ngah ding lamenin ka omna hangin hih lai-ah thusitna thuakin a ding ka hi hi. Kumpipa aw, hih thu ka lametna hangin Jew mite in kei hong mawhsak ahi uh hi.

Ezekiel 34:23

Amaute a cing dingin ka nasempa David ka koih ding a, amah in amaute hoihtakin an vakin a kem ding hi.

ROM (Romans) 9:4

Amaute pen Pasian’ teel Israel mite hi a, Pasian in ama ta-in bawlin a minthanna a hopte, amaute tungah thuciamna bawlin Thukham a piakte, a man taktakin biaktheihna nei-in thuciamna a ngahte,

Sawltak 13:38

Tua ahih ciangin sanggamte aw, hih Jesuh hangin mawhmaisakna thu note tungah hong kihilh ahihna teltakin na theih ding uh ahi hi.

Zekhariah 6:12

Ama kiangah, ‘Vanglian Topa in hih bangin ci hi: “Hih mipa pen sing bangin A Sel a kici mipa ahi hi. A omna peuhpeuhah amah cithei ding a, Topa’ biakinn lamkik ding hi.

Micah 5:2

Bethlehem Efrathah khua aw, nang pen Judah gamah khua neupen khat na hi a, ahi zongin nang sung panin Israel-te a uk ding khat ka piangsak ding hi. Ama gui pen tangtawng pek tawh kizom hi.

Jeremiah 23:5

“En un, Topa in kong cihin-ah, keimah in David’ suan lak panin kumpi dingin a diktat mi khat ka khankhiatsak ni hong tung ding hi. Amah gam uk siam mahmah ding a, gam sungah thuman thutang tawh thu hong khen ding hi.

ROM (Romans) 10:15

A gen dingin kisawl kei leh kua in a thu gen thei ding ahi hiam? Tua ahih manin Lai Siangtho sungah, “Lungdamna thu a hilh dingin a hong pai mite hangin kinuam mahmah hi,” ci-in kigelh hi.

Sawltak 5:42

Nisimin biakinn sung le mite inn-ah thu hilh uh a, Jesuh, Khrih hi, cih Lungdamna Thu a gengen uh hi.

Sawltak 3:19

Tua ahih ciangin na mawhnate uh hong sawpsiangsak theih nading, Topa kiang panin a hong pai lungsim nopna hun na ngah theih nading uh le note a dingin a sehsa Jesuh Khrih a hong sawltheih nadingin na mawhna uh kisik unla, Pasian kiang zuan un.

Luka 2:10

Ahi zongin vantungmi in, “Lau kei un. Mi khempeuh a lungdamsak ding thuthak hoih khat note a’ ding ka hong puak hi.

Luka 1:19

vantungmi in dawng a, “Kei pen Pasian’ na a sem Gabriel ka hi hi. Nang kiangah thu hong genin, hih lungdamna thu a ko dingin a hong sawl ka hi hi.

Malakhi 4:2

Ahi zongin ka thu a hong mang note tungah dikna ni hong taang ding a, tua in nizang bangin note tungah cidamna hong tun ding hi. Bawng khumna panin a kikhah bawngnote bangin suakta-in nuam na sa ding uh hi.

Malakhi 3:1

Hih bangin na thugenna uh tawh kisai-in Vanglian Topa in hong dawng a, “Ka pai nading lampi a bawlkhol dingin ka kamtai pa ka sawl ding hi. Tua ciangin na ngakngak uh Topa a biakinn sungah thakhat thu-in hong pai ding hi. Na muhnop uh kamtai pa hong pai-in ka thuciamna hong taangko ding hi,” ci hi.

Zekhariah 13:7

“Namsau aw, ka tuucingpa a su dingin kipan inla, kei tawh nasem khawm pa langpang in. Tuucingpa sat in. Tuute kithehthang ding a, ka tuute gim ka pia ding hi.

Zekhariah 13:1

“Tua ni hong tun ciangin David’ suanlekhakte le Jerusalem khuamite’ mawhna le nitnateng khempeuh a silsiang dingin tuinak khat hong phul ding hi.

Zekhariah 9:9

Zion mite aw, nakpitakin lungdam un. Jerusalem mite aw, lungdamin awng un. En un, na kumpipa uh hong pai hi. Amah, gualzawhna tawh hong pai hi. Ahi zongin kiniamkhiatna tawh hong pai a, sin nai loh lano tungah hong tuang hi.

Haggai 2:7

Minam dang khempeuh lokgawp ding ka hih manin a neihsa uh sum le paite, hih munah hong kipuak ding a, biakinn sungah a dimin van hong om ding hi.

Isaiah 61:1

Gimna a thuak mite tungah thuhoih a puak dingin Topa in kei hong teelin hong sawl ahih manin keima sungah Topa Pasian’ kha hong om hi. Lungsim kitamzante a damsak ding, salin a kimante tungah suahtakna thu a gen ding, a kikhum mite a dingin thong kong a hong ding,

Isaiah 52:7

Thuhoih hong puak, kilemna thu a genzak, thuhoih thupha a hong puak, hotkhiatna thu a genzak, Zion tungah, “Na Pasian in uk hi,” ci-in mualte kantanin thu hong gen kamtai pa bangzahin hoih ahi hiam?

Isaiah 41:27

Topa ahi keimah in Zion tungah hih thu ka pulak masa a, Jerusalem tungah lungdamna thu ka gen hi.

Isaiah 40:9

Jerusalem aw, mual sang dawnah kahto-in lungdamna thu kiko in. Zion aw, nakpitakin awng inla, lungdamna thu taangko in. Nakpi takin kiko inla, lau kei in. Judah gam khuapite tungah, “Na Pasian uh hong pai ta hi,” ci-in gen ta un.

Isaiah 11:1

Jessi’ phung sung panin a sel khat hong khangkhia ding a, a zungte panin a no khat hong khang ding hi.

Isaiah 7:14

Tua ahih ciangin Topa mahmah in note tungah lim khat hong pia ding hi. En un, nungak khat gai-in tapa khat nei ding a, ama min Immanuel kici ding hi.

Thu-hilhkikna 18:15

“Topa na Pasian un note lak ahi na sanggamte uh lak panin note a dingin kei tawh a kibang kamsang khat hong khangsak ding hi. Note in ama thu na ngai ding uh hi.

Piancilna 49:10

Judah in kumpi ciangkhut len tawntung ding a, a suan a khakte in zong ukna aana nei tawntung ding hi. Minam dangte in ama tungah siah puak ding a, zahtakna tawh ama mai-ah kun ding uh hi.

Piancilna 26:4

Na suanlekhakte vana aksi bangin tampi ka phasak ding a, na suanlekhakte tungah hih leitang khempeuh ka pia ding hi. Na suanlekhakte thupha ka piak bangin leitung minam khempeuh in thupha a ngah nadingun hong ngen ding uh hi.

Piancilna 22:18

na suanlekhakte thupha ka piak bangin, leitung minam khempeuh in thupha a ngah nadingun hong ngen ding uh hi. Bang hang hiam cih leh nang in ka thu na mang hi,” a ci hi.

Piancilna 12:3

Nang thupha hong piate thupha ka pia ding a, nang hong samsiate ka samsia ding hi. Nang’ thupha ngah bangin thupha a ngah nadingun leitung midang khempeuh in hong ngen ding uh hi,” a ci hi.

Piancilna 3:15

Nang le numei kikal na suanlekhakte le ama suanlekhakte kikalah kilangneihna ka omsak ding hi. Amah in na lutang hong sunim ding a, nang in ama khetul na sunim ding hi,” a ci hi.

Sawltak 10:36

Mi khempeuh’ Topa ahi Jesuh Khrih hangin a kingah Lungdamna Thu, Israel mite tungah Pasian in a puakna thu na thei uh hi.

Sawltak 13:23

Pasian in ama ciamsa bangin Israel mite a honkhia dingin hih David’ suan sung pan Jesuh a bawl hi.

Sawltak 14:15

“Lawmte aw, bang hangin hih bangin gamta na hi uh hiam? Kote pen note mah bangin mihing ka hi lel uh hi. Bangmahin a kimang lo hih milimte na biakna uh panin kihei-in, vantung, leitung, tuipi le tuate tung le a sunga om khempeuh a bawl a nungta Pasian na biak nadingun Lungdamna Thu note kiangah a gen dingin hih lai-ah a hong om ka hi uh hi.

ROM (Romans) 1:2

Pasian in kamsangte tungtawnin hih Lungdamna Thu a gensa hi a, Lai Siangtho sungah a omsa thu ahi hi.