Micah 7:9 - Tedim Bible

⁹ Topa tungah khialkhin ka hih manin ama hehna tawlkhat ka thuak ding hi. Ahi zongin a tawpna-ah kei hong huh ding a, a man lopi-in a hong kibawlna teng hong bawlphat sakin, amah in hong honkhia ding hi.

Tedim Bible Revision 2017

⁹ Topa tungah khial khin ka hih manin ama hehna tawl khat ka thuak ding hi. Ahi zongin a tawpna ah kei hong huh dinga, a man lopi-in a hong kibawlna teng hong bawl phatsakin, amah in hong hon khia ding hi.

Micah 7:9 Referans Kwoze

1 KORIN MASA 4:5

Tua ahih manin a hun a tunma-in kuamah mawhsakin thu khen kei un. Topa hong pai ciangin a tawpna thukhenna hong om ding a, amah in thusimte hong pholakin, mihingte in a lungsim sung uhah a ipcip uh thute hong telkheh ding hi. Tua ciangin mi khempeuh in amau’ ngah dingin a kilawm phatna, Pasian’ kiang panin a ngah ciat ding uh hi.

Late 37:6

Amah in nangma dikna khuavak bangin, nangma thumanna nitaang bangin hong langsak ding hi.

1 SAMUEL MASA 24:15

Tua ahih ciangin Topa thukhen hong hi-in, kei le nang kikalah thukhenna hong pia hen la, hih thu thei-in ka thu-ah hong pang hen la, na khutsung panin kei hong honkhia ta hen,” a ci hi.

2 TIMOTI NIHNA 4:8

Thu a manin a khen Topa in tua Ni ciangin kei a hong piak ding thuman lukhu ahi gualzawhna thaman in tu-in kei hong ngak gige hi. Kei tung bekah a hong pia ding hi lo a, ama hong paikik ding itna tawh a ngakte khempeuh tungah zong a pia ding ahi hi.

Malakhi 3:18

Tua ciangin midikte le migilote, le keima na hong semte le hong sem lote a kilamdanna na mukik ding uh hi,” a ci hi.

Mangmuhna 18:20

Vantung aw, ama siatna hangin lungdam in. Mi siangthote, sawltakte, le kamsangte aw, note tungah hong gamtatna hangin Pasian in ama tungah thukhenna pia khinta ahih manin lungdam ta un,” a ci uh hi.

Isaiah 46:13

Suahtakna ding hun ka hong tungsak ta a, gamla nawn lo hi. Ka hong hotkhiat ding hun zekai nawn lo ding hi. Keima minthanna ahi Israel a dingin Jerusalem ka honkhia ding hi,” a ci hi.

Late 43:1

Pasian aw, ka dikna hong langsak inla, migilote tawh ka thu-ah kei hong panpih in. Mi khemte le thutang lote kiang panin kei hong honkhia in.

Late 7:6

Tho in, Topa, a hehsa-in thasaan inla, ka galte’ hehna panin kei hong dal in. Khanglo in, ka Pasian aw, thukhenna ding hun khat na seh khinzo hi.

JOB (Job) 23:10

Ahi zongin Pasian in ka kalsuanna khempeuh thei a, kei hong ze-et leh ka sianthona a mu ding hi.

2 SAMUEL NIHNA 24:17

Tua ciangin mite a vat vantungmi a muh ciangin David in Topa’ tungah thu gen a, “En in, ka mawh hi; a khial pa pen kei ka hi hi. Hih mite in bang khialhna nei ahi uh hiam? Kong thum hi; kei le ka innkuante bek gim hong pia in,” a ci hi.

1 SAMUEL MASA 26:10

David in, “Topa a nungta ahih mah bangin Topa in amah vat taktak ding hi; tua ahih kei leh zong a sih hun hong tung ding hi; tua ahih kei leh gal kikapna sungah amah paisukin si ding hi.

1 SAMUEL MASA 25:39

Nabal a sihna thu David in a zak ciangin amah in, “Nabal khut tung panin ka ngah zahkohna hong thuksakin, siatna panin a nasempa a lenkik Topa in thupha ngah tahen. Topa in Nabal’ gamtat siatna ama lu tung mahah tungkiksak hi,” a ci hi. Tua ciangin David in mi sawlin ama zi dingin Abigail helsak hi.

1 SAMUEL MASA 3:18

Tua ahih ciangin Samuel in ama kiangah a vekpi-in genin bangmah im lo hi. Tua ciangin Eli in, “Amah pen Topa ahi hi. Amah in hoih a sak bangin hih ta hen,” a ci hi.

Kah la 1:18

Topa a thutang ahi hi. Bang hang hiam cih leh keimah in ama thu a mang lo ka hi hi. Mun khempeuhah a om mite aw, ka thugenna hong ngai un. Ka thuaknate hong mu dih un. Ka khangno numei le pasalte salin a kipuakhia hi.

Late 94:15

Bang hang hiam cih leh thutang pen thuman mite tungah hong tungkik ding a, lungsim thutang khempeuh in amah zui ding uh hi.

Late 119:154

Ka thu-ah hong pang inla, kei hong suaktasak in. Na ciamsa bangin kei hong honkhia in.

Isaiah 42:16

“Amau’ theih loh lampi-ah mittawte ka paipih ding a, amau’ theih ngei loh sul zuihpihin ka kha ding hi. Amau’ mai-ah khuamial pen khuavak suaksakin, a phokna munte a tamin ka bawl ding hi. Hihte pen keima hih ding nate hi a, tuate sem loin ka nusia kei ding hi.

Isaiah 56:1

Topa in hih bangin ci hi: “A sawt loin note ka hong honkhia ding a, hong khahkhia ding ka hih manin thutang thumanin gamta un.

Jeremiah 10:19

Ka thuakna hangin ka gim a, ka liamna nasia mahmah hi. Ahih hangin, “Hih gimna ka thuak ding mah hi,” ka ci hi.

Jeremiah 51:10

“Keima mite in, ‘Topa in thuman ihihna hong kilang khiasakzo hi. Hong pai un, Topa Pasian’ nasepna Zion khua-ah va taangko ni,’ a ci uh hi.

JOB (Job) 35:14

“Job aw, nangmah in, ‘Pasian ka mu thei kei a, ahi zongin ka thu ama khut sungah om a, lungduai takin ka ngak niloh hi,’ na ci hi.

Isaiah 51:22

Ama mite a dingin a thumsak Topa, Topa ahi note’ Pasian in hih bangin ci hi: “En un, note’ khutsung panin hoina hai ka lakhia khin a, ka hehna haipi na dawn nawn kei ding uh hi.

Jeremiah 14:7

Ka mite in kei tungah, ‘Topa aw, ka mawhna uh kote’ langkhatah hong pang ahi ta zongin nangma min hangin kote hong hehpih in. Kote in tam veipi nang kong nungngat uh a, nangma tungah ka hong khial khinzo uh hi.