Mattiu 8:3 - Tedim Bible

³ Jesuh in zong a khut zanin tua mipa lawng a, “Ka hong damsaknuam hi; dam ta in,” a cih khit phetin a phakna a dampah hi.

Tedim Bible Revision 2017

³ Jesu in zong a khut zanin tua mipa lawng a, “Ka hong damsak nuam hi; dam ta in,” a cih khit phetin a phakna a dam pah hi.

Mattiu 8:3 Referans Kwoze

Luka 5:13

Jesuh in zong a khut zanin amah lawng a, “Kong damsak nuam hi; dam ta in,” ci-in a dawng hi. Tua khit phetin a phaknatna a dampah hi.

Late 33:9

Bang hang hiam cih leh amah pau a, leitung hong piang hi; amah in thu pia a, na khempeuh hong om hi.

2 KUMPI NIHNATE 5:14

Tua ahih ciangin Pasian mipa’ kamgen bangin amah paisukin Jordan gun sungah sagihvei kidiah hi. Tua ciangin a cilesa naupangno cilesa bangin a ngei bangkikin amah a siang hi.

Marka 1:41

Jesuh in hehpihhuaisa ahih manin a khut zanin lawng a, “Nang kong damsak nuam hi,” a ci hi.

Johan 5:21

Pa in mi sisate nangawn thosakin a nuntaksak mah bangin Tapa in zong a ut peuhpeuh nungtasak thei hi.

Marka 4:39

Jesuh zong tho-in, “Nung nawn kei in,” ci-in huihpi thu pia a, tuihualte kiangah, “Kilok nawn kei un,” a ci hi. Tua ciangin huihnung khawlin dai khipkhep pah hi.

2 KUMPI NIHNATE 5:11

Ahih hangin Naaman hehin paikhia a, “En un, amah kei kiangah hong paikhia-in, ka gei-ah hong dingin, a Pasian a Topa’ min loin, a natna mun tungah a khut vanin, kei miphak pa hong damsak taktak ding hi, ci-in ka ngaihsun hi.

Piancilna 1:3

Pasian in, “Khuavak om hen,” ci hi; tua ciangin khuavak om pah hi.

Johan 11:43

a cih khit ciangin nakpitakin kiko-in, “Lazaras aw, hong pusuak in,” a ci hi.

Luka 7:14

Tua ciangin pai-in a hankuang va len a, si puate zong a khawlpah uh hi. Tua ciangin Jesuh in, “Tangval aw, tho in, kong ci hi,” a ci hi.

Marka 9:25

Mihonte amau kiangah a hong kikhawm dingin a hong taina uh Jesuh in a muh ciangin, “A pau thei lo, a bilngong dawi aw, hih naupang sung pan paikhia inla, tumkik ngei nawn kei in,” ci-in a taii hi.

Marka 7:34

vantung lam ento a, khuisa-in, “Kihong in,” a cihnopna ahi “Effatha” a ci hi.

Marka 5:41

Tua ciangin numeino’ khut lenin, “Numeino aw, tho in,” a cihna, “Talitha kumi,” a ci hi.

Johan 15:24

Kuamah in a bawl ngei loh na lamdangte amaute lakah a bawl lo hi leng amaute in mawh pualo ding uh hi. Ahi zongin amaute in ka nalamdang bawlte mu khin uh ahih manin kei le ka Pa a hong mudah khawm uh ahi hi.

Paikhiatna 4:7

Tua ciangin Pasian in, “Na khut na ang sungah koih kik in,” ci hi. Tua ahih ciangin amah in a khut a ang sungah koih kik hi. Amah in a lak khiat kik ciangin ama cilesa dangte mah bangin dam kik hi.

Mattiu 12:13

a mipa kiangah, “Na khut zan in,” a ci hi. A mipa in zong a khut zanpah a, midangte mah bangin hoihtakin a damkik hi.

Luka 4:27

Kamsang Elisha’ hun laitakin Israel gam sungah miphak tampi om a, ahi zongin kuamah in damna ngah loin, Syria mi Naaman bek in damna ngah hi,” a ci hi.