Mattiu 12:41 - Tedim Bible

⁴¹ Jonah in amaute kiangah thu a hilh ciangin a mawhna panun kisikkik uh ahih manin thukhen ni ciangin Nineveh khuamite in note mawhsakna thu hong gen ding uh hi. Note kiangah kong genin-ah: Tu mahmahin note kiangah Jonah sangin a lianzaw khat a om hi.

Tedim Bible Revision 2017

⁴¹ Jonah in amaute kiangah thu a hilh ciangin a mawhna panun kisikkik uh ahih manin thukhen ni ciangin Nineveh khua mite in note mawhsakna thu hong gen ding uh hi. Note kiangah kong genin ah: Tu mahmah in note kiangah Jonah sangin a lian zaw khat a om hi.

Mattiu 12:41 Referans Kwoze

Mattiu 12:42

Leitaw lam gam kumpinu in Solomon’ pilna thu a ngai dingin leitung phelkhat kantanin hong pai ahih manin thukhen ni ciangin amah in note mawhsakna thu hong gen ding hi. Note kiangah kong genin-ah: Tu mahmahin hih lai-ah Solomon sangin a lianzaw khat a om hi.

Hebru 11:7

Noah in zong a upna hang mah tawh mailam a thupiang ding a muh theih lohpi mahin Pasian’ thugenna na mang a, teembaw khat bawlin a innkuanpihte tawh na suakta hi. Hih bangin a gamtatna tawh leitung midangte a mawh ahihna kilangsak a, a upna hangin mihoih hihna thu Pasian kiang panin a ngah hi.

ROM (Romans) 2:27

Tua ahih manin thukham nei-in vun ki-at napi-in tua thukham a zui lo no Jew mite pen vun ki-at lo thukham a zui Gentail mite in thu hong khen ding hi lo ahi uh hiam?

Johan 3:31

“Vantung pan hong pai pa pen adang khempeuh sangin lianzaw hi. Leitung panin a piang mi pen leitung mi hi a, leitung thute bek mah a gen hi. Tua ahih manin vantung panin a hong pai pa ahihleh adang khempeuh sangin a lianzaw ahi hi.

Mattiu 12:6

Note kiangah kong genin-ah: Tua biakinn sangin a lianzaw khat hih lai-ah hong om hi.

Jonah 1:2

“Kithawi inla, a lian mahmah Nineveh khuapi-ah va pai-in thu va hilh in; bang hang hiam cih leh amau’ gitlohna thu ka za khinzo hi,” a ci hi.

Jeremiah 3:11

Tua ciangin Topa in kei hong hopih a, “A zulhzau Israel, numei ginalo Judah sangin a mawhna tamzaw hi.

Johan 4:12

Tua tham loin, i pupi Jakob sangin lianzaw ding na hi hiam? Amah a kipan a tate le a ganhingte in a nek hih tui sangin a limcizaw koi-ah ngah ding na hi hiam?” a cih ciangin

Luka 11:32

Thukhen Ni ciangin Nineveh khuamite hong dingin note mawhsakna thu hong gen ding uh hi. Bang hang hiam cih leh amaute in Jonah’ thuhilhna a zak uh ciangin a mawhnate uh kisik uh a, ahi zongin Jonah sangin a lianzaw khat hih lai-ah a om hi,” a ci hi.

Mattiu 23:36

Note kiangah kong genin-ah: Tuhuna mite tungah hih gimna hong tung takpi ding hi.

Mattiu 17:17

Jesuh in, “Upna nei lo, a ngaihsun khial mite aw, note bang tanvei hong ompih ding a, bang tanvei hong kikholhpih ding ka hi hiam? A naupang hong paipih un,” a ci hi.

Mattiu 16:4

Tulai hun mite giloin, Pasian tawh kipawl lo uh hi. Lim a nget uh hangin Jonah lim simloh a dang kilaklo ding hi,” ci-in a dawng hi. Tua ahih manin amaute nusia-in a paisan hi.

Mattiu 12:45

Tua ciangin va paikik a, amah sangin a siahuaizaw dawi sagih hong tunpihin tua mipa sungah a teng uh hi. Tua ahih manin tua mipa pianzia pen a masa huna sangin a siazaw hi. Tua ahih ciangin tuhuna migilote zong hih mipa’ pianzia mah tawh kibang ding uh hi,” a ci hi.

Mattiu 12:39

Ahi zongin Jesuh in, “Tuhuna mite bangzahin giloin, Pasian’ thu thei lo ahi uh hiam? Na lamdang ka bawl ding na hong ngen tazen uh hi. Jonah thu tawh kisai nalamdang longal adang hong kilaklo ding hi.

Isaiah 54:17

Nangmah do nadingin a kibawl hiam peuhmah maavang lo ding a, thukhenna sungah na langah a pang mi khempeuh na nialgawpzo ding hi. Hih thu pen Topa’ nasemte’ gamhluah le keima kiang panin amaute’ dikna a kilahna ahi hi, Topa in ci hi,” a ci hi.

Jonah 3:4

Jonah zong khuasung lam manawhin kipan a, ni khat sung lam a pai khit ciangin, “Ni sawmli khit ciangin hih Nineveh khuapi kisusia ding hi,” ci-in a kiko hi.