Mattiu 11:1 - Tedim Bible

¹ Jesuh in a nungzui sawm le nihte a vaikhakna a man khit ciangin tua kiimnai-a om khuate-ah thuhilh ding le thugen dingin tua mun panin a paikhia hi.

Tedim Bible Revision 2017

¹ Jesu in a nungzui sawm le nihte a vaikhakna a man khit ciangin tua kiimnai-a om khuate ah thuhilh ding le thugen dingin tua mun panin a paikhia hi.

Mattiu 11:1 Referans Kwoze

Sawltak 10:38

Nazareth khuami Jesuh tungah Pasian in Kha Siangtho le vangliatna pia a, Pasian in a ompihna hangin tua Jesuh in a paina khempeuhah na hoih semin, Dawimangpa in a gimsak mite khempeuh a damsakna thu zong na thei uh hi.

Luka 8:1

Tuazawh tawlkhat khit ciangin khuapite le khuaneute-ah a ban banin Jesuh pai a, Pasian’ Ukna hangin Lungdamna Thu hilhin a vak kawikawi hi. Tua a vak kawikawina-ah nungzui sawm le nihte,

Mattiu 9:35

Tua bangin khuapite le khuaneute-ah Jesuh pai kawikawi a, a kikhopna uh innte-ah thu hilhin, Pasian’ ukna hangin a lungdamhuai thute gen a, natna nam khempeuh a damsak hi.

2 THESALONIKA NIHNA 3:10

Note tawh ka hong omkhawm lai-un, “Na a sem nuam lo mi peuhmah an nesak kei un,” ci-in ka hong gen uh hi.

2 THESALONIKA NIHNA 3:6

Sanggamte aw, i Topa Jesuh Khrih min tawh kong sawlnop uh thu panin: Note tungah ka hong hilhsa uh thute a zui lo, a thadah gamtat thu uppih mite tawh na kikhawl kei un.

1 THESALONIKA MASA 4:2

Bang hang hiam cih leh Topa Jesuh min tawh ka hong thuhilhnate uh na theihsa uh ahi hi.

Sawltak 10:42

Kote in mite kiangah thu ka hilh nading uh le mihing le misite tungah thu a khen dingin Pasian in amah a sehna thu teci a pang dingin a hong sawl hi.

Johan 15:14

Ka hong thupiak bangin na gamtat uhleh ka lawmte na hi uh hi.

Johan 15:10

Ka Pa’ hong thupiakte zui-in ama itna sungah ka om mah bangin note in zong ka thupiaknate na hong zuih uhleh ka itna sungah a om na hi ding uh hi.

Mattiu 28:20

Tua ciangin note tungah ka hong gen thute khempeuh a zuih nadingun na hilh un. Hun bei dongin note a hong ompih tawntung ding ka hihna thu phawk ta un,” a ci hi.

Mattiu 7:28

Jesuh in hih a thugente a man khit ciangin, ama thugenna hangin mihonpite in lamdangsa mahmah uh hi.

Mattiu 4:23

Galilee gam sung khempeuhah Jesuh pai kawikawi a, amau’ kikhopna innte-ah thu hilhin, vantung ki-ukna hangin lungdamna thute hilh a, natna tuamtuam a nei cina khempeuh a damsak hi.

1 TIMOTI MASA 6:14

I Topa Jesuh hong kilatkik Ni dongin paubaanna le mawhsakna om hetloin nang hong kipia thute na zui in.

Marka 6:12

Tua ahih ciangin amaute kuankhia uh a, mite a mawhna panun a kisik nadingun thu a hilh uh hi.

Luka 23:5

Ahi zongin amaute in nawhsa takin nakpau semsem uh a, “Amah in mite a buai nadingin thu hilh a, Galilee gam pan hong kipanin Judea gam sung khempeuhah hong hilh a, tu-in hih lai mun hong tungta hi,” a ci uh hi.