Luka 5:35 - Tedim Bible

³⁵ Amaute kiang panin zineipa a kipaikhiatpih hun hong tung ding a, tua hun ciangin tang ding uh hi,” ci-in a dawng hi.

Tedim Bible Revision 2017

³⁵ Amaute kiang panin zineipa a kipaikhiat pih hun hong tung dinga, tua hun ciangin tang ding uh hi,” ci-in a dawng hi.

Luka 5:35 Referans Kwoze

Luka 17:22

Tua ciangin Jesuh in nungzuite kiangah, “Nikhat ni ciangin Mihing Tapa nikhat sung bek nangawn na muhnop hun uh hong tung ding a, ahi zongin na mu kei ding uh hi.

2 KORIN NIHNA 11:27

Nasem silbawlin ki-om tawntung a, ihmu man lo liangin zong ka om zel hi. Gilkial dangtakin ka om zel a, annek ding nei lo, giah nading om lo, puansilh ding nei loin ka om hun tampi a om hi.

1 KORIN MASA 7:5

Thungetna-in hun na zattheih nadingun tawlkhat sung tuam om ding thukim khawm masa lopi-in lupkhop ding kinialkha kei un. Tua bangin tawlkhat sung na tuam om khit uh ciangin note’ pumpi’ deihna hangin Satan’ ze-etna sungah na pukkhak loh nadingun a ngeina bangin lupkhop ding kipan kik un.

Sawltak 14:23

Khua pawlpi simah pawlpi upa ding sehsak uh a, an tangin thungetna tawh amaute’ muan ahi Topa’ khut sungah tua mite a ap uh hi.

Sawltak 3:21

Pasian in ama kamsang mi siangthote tungtawnin tanglai-in a genkholhsa bangin, na khempeuh a thakin a kibawl hun dong mateng vantungah Jesuh a om ding ahi hi.

Sawltak 1:9

Hih thu a genkhit ciangin amaute’ muhtangpi mahin vanah Jesuh kilato a, meiipi in liah ahih manin amah mu thei nawn lo uh hi.

Johan 16:28

Pa kiang panin hong pai-in leitung a hong tung ka hi a, tu-in leitung nusia leuleu-in Pa kiang a zuankik ding ka hi hi,” a ci hi.

Johan 13:33

Ka tate aw, note tawh sauvei ka hong omkhawm nawn kei ding hi. Note in kei na hong zong ding uh a, ahi zongin Jerusalem khua-a Jew uliante kiangah, ‘Ka paina munah na hong pai thei kei ding uh hi,’ ci-in ka gen mah bangin note kiangah zong tu-in ka hong gen hi.

Johan 12:8

Mizawngte pen note tawh hong omkhawm niloh ding a, kei ka hih leh note tawh ka hong omkhawm tawntung kei ding hi,” a ci hi.

Zekhariah 13:7

“Namsau aw, ka tuucingpa a su dingin kipan inla, kei tawh nasem khawm pa langpang in. Tuucingpa sat in. Tuute kithehthang ding a, ka tuute gim ka pia ding hi.

Daniel 9:26

Tua hun a bei khit ciangin sathau kinilh pa thuman lopi-in a kithat ding hi. Galsim dingin a hong pai galkapmang lianpa in khuapi le biakinnpi a susia ding hi. A beina pen tuiciin tun bang hi ding a, a tawp dongin galdona le kisiatna vive ahi dingin Pasian in thu a khenzo hi.

Isaiah 22:12

Tua ni ciangin Vanglian Topa Pasian in kahna le thumna, sam mettolna le puanhampi silhna a zang dingin thu hong pia hi.

Mattiu 9:15

Jesuh in amaute kiangah, “Mopina pawi khatah, a zineipa a om sungin a mopawi simte dah dingin um na hi uh hiam? Dah het lo ding uh hi. Ahi zongin amaute kiang panin zineipa a kilakkhiat ding hun hong tung ding a, tua hun ciangin amaute in an a tang ding uh hi.

Marka 2:20

Ahi zongin amaute kiang panin zineipa a kipaikhiatpih hun hong tung ding a, tua hun a tun ciangin an ne loin a om ding uh hi.

Luka 5:34

Jesuh in amaute kiangah, “Mopawi-ah zineipa le pawisimte a omkhawm laitakin a pawisimte an tangsak thei ding na hi uh hiam?

Luka 5:36

Tua ciangin Jesuh in thugentehna dang khat zong gen a, “Mi khat in puan thak khat eukhia-in puan lui thuapna-in nei lo hi. Tua bangin hih leh a puan thak pen a keeksak suak ding a, a puan thak eukhiat zong a puan lui tawh etlawm lo ding hi.