Luka 3:16 - Tedim Bible

¹⁶ Tua ahih ciangin Johan in amaute kiangah, “Keimah in tui sungah note ka hong phum hi; ahi zongin kei sangin nakpitakin a lianzaw khat hong pailai ding hi. Ama khedap khau a sutsak ding nangawnin kei ka kilawmzo nai kei hi. Amah in Kha Siangtho le mei sungah note hong phum ding hi.

Tedim Bible Revision 2017

¹⁶ Tua ahih ciangin Johan in amaute kiangah, “Keimah in tui sungah note ka hong phum hi; ahi zongin kei sangin nakpi takin a lian zaw khat hong pai lai ding hi. Ama khedap khau a sutsak ding nangawnin kei ka kilawm zo nai kei hi. Amah in Kha Siangtho le mei sungah note hong phum ding hi.

Luka 3:16 Referans Kwoze

Sawltak 1:5

Johan in tui sungah mite phum a, ahi zongin a sawt loin Pasian in Kha Siangtho tawh note hong kidimsak ding hi,” ci-in thu a pia hi.

Mattiu 3:11

Na kisikkik khitna uh a kilat nadingin tui sungah note ka hong phum a, ahi zongin kei nungah a hong pai pa in Kha Siangtho le mei sungah note hong phum ding hi. Tua a hong pai ding pa pen kei sangin nakpitakin lianzaw a, ama khedap a tawisak ding nangawnin ka kilawmzo nai kei hi.

Johan 1:33

Keimah in amah ka theih nai loh hangin, tui sungah mite a phum dingin kei a hong sawl Pasian in, ‘A tungah Kha hong paisukin a omna mipa pen Kha Siangtho sungah mite a phum ding pa ahi hi,’ ci-in hong genkhol hi.

Johan 1:26

Johan in, “Keimah in tui sungah mite a phum lel ka hi hi. Ahi zongin tu mahmahin note’ muh ngei loh mipa, note’ lak mahah hong om hi.

1 KORIN MASA 12:13

Jew mi ihi a, Gentail mi ihi zongin, sila ihi a, sila ahi lo ihi zongin, eite minam tuamtuam ihih hangin Kha Siangtho khat bek mah in Jesuh’ pumpi a suak dingin ama sungah hong phum a, eite khempeuh tungah a hong kipia pen tua a kibang Kha Siangtho khat bek mah ahi hi.

Zekhariah 13:9

Tua a suakta sehkhatte pen meikhukah ngun a kisiansak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ thungetna ka pia ding hi. Keima mi ahihna uh amaute tungah ka gen ding a, amaute in kei pen amau’ Pasian ka hihna thu a kam uh tawh pulak ding uh hi,” a ci hi.

Isaiah 32:15

Ahi zongin Pasian in ama kha hong puak ding hi. Leitang siate lei hoih suakkik ding a, lo-a ante hoih mahmahin tulak bang ding hi.

Paunak 1:23

Kong thuhilhna hong ngai un; ka ngaihsutna kong gen ding a, ka theihna kong zasak ding hi.

Sawltak 2:33

Amah in Pasian’ taklamah omna dongin liatna ngah a, ama tungah Pasian in a ciamsa Kha Siangtho zong a ngahkhin hi. Tu laitak a na muh na zak uh nate pen kote tungah a hong piak tua Kha Siangtho ahi hi.

Johan 7:38

Lai Siangtho sungah, ‘Kei hong um mite sung panin nuntakna tui luangkhia ding hi,’ a cih mah bangin kei hong um mite ka kiangah hong pai-in hong dawn ta un,” a ci hi.

Sawltak 10:44

Tua bangin Peter in thu a hilh laitakin tua thuhilhna a ngai mite khempeuh tungah Kha Siangtho hong tungsuk hi.

Ezekiel 36:25

Note tungah tui siangtho kong theh ding a, na milim biakna uh le note hong ninsak na dang khempeuh panin kong siangsak ding hi.

Mattiu 3:12

Amah in a khutah anzapna tawi-in a ante zap a, a taksate khawmin a ansal sungah koih ding a, a ansite ahihleh a mit ngei lo mei sungah a khul ding hi,” ci-in thu a hilh hi.

Johan 1:27

Keima khit ciangin note lakah amah in nasep hong kipan ahih hangin, kei pen ama khedap khau a sutsak ding nangawnin ka kilawmzo nai kei hi,” ci-in a dawng hi.