Luka 18:13 - Tedim Bible

¹³ Ahi zongin siahdongpa pen a gamla simah ding a, vantung lamah zong dak ngam loin a dip humin kuncip a, ‘Pasian aw, kei mimawh mi khial pa hong hehpih in,’ ci-in a ngen hi.

Tedim Bible Revision 2017

¹³ Ahi zongin siahdongpa pen a gamla simah dinga, vantung lamah zong dak ngam loin a dip humin kuncip a, ‘Pasian aw, kei mimawh mi khial pa hong hehpih in,’ ci-in a ngen hi.

Luka 18:13 Referans Kwoze

Ezra 9:6

“Ka biak Pasian aw, ka mawhnate un ka lu dawn dong uh hong vuknelhin vantung dong banto ahih manin nangma lam kong et ding maizumin ka mai a san hi, ka Pasian aw.

1 TIMOTI MASA 1:15

Khrih Jesuh, mawhneite a honkhia dingin leitungah hong pai hi, cihna thu a man hi a, a uphuai a sanhuai thu ahi hi. Keimah zong tua mawhnei mite lakah a mawhpha bel ka hi hi.

Late 41:4

Ke’n ahihleh, “Topa aw, kei hong hehpih inla, kei hong damsak in; bang hang hiam cih leh nang tungah kong khialzo hi,” ka ci hi.

Luka 23:48

Hih thute a en dingin a hong pai mihonpite in a thupiang teng a muh uh ciangin dahin dip humsa-in a ciah uh hi.

Hebru 8:12

A mawhna a khialhna uhah amaute ka hehpih ding a, tua bangte phawkin ka nei nawn kei ding hi,” na ci hi.

Sawltak 2:37

Amaute in hih thu a zak uh ciangin a lungsim uh nakpitakin sukha a, Peter le sawltak dangte kiangah, “Sanggamte aw, bangci gamtat ding ka hi uh hiam?” ci-in a dong uh hi.

Hebru 4:16

Tua ahih manin a kisap hunin, eite a hong huh dingin hehpihna le dikna thupha i ngahtheih nadingin, kimuanna lungsim tawh hehpihna tokhom va zuan ciat ni.

ROM (Romans) 5:8

Ahi zongin eite mawhna nei ihih laitakin eite a dingin Khrih hong si ahih manin Pasian in eite hong it mahmahna thu hong lak khin hi.

Luka 5:8

Simon Peter in hih thu a muh ciangin Jesuh’ mai-ah khukdin a, “Topa aw, kei mawhnei mi ka hih manin ka kiang panin paikhia in,” a ci hi.

Isaiah 6:5

Tua ciangin keimah in, “Gim ngah pa hi ta ing! Bang hang hiam cih leh a mawknapi ka hi hi; ka kama ka thugen khempeuh a mawkna vive hi a, a thugen khempeuh uh mawhna le nitna ahi mite lakah ka tengkha hi. Vanglian Topa, Kumpipa ka mukha khinta hi,” ka ci hi.

Late 25:11

Topa aw, ka mawhna lian ahih manin, nangma min phat nadingin keima mawhna hong maisak in.

JOB (Job) 42:6

Tua ahih ciangin tu-in ka paunasate khempeuh hangin ka maizum mahmah a, tu-in vutlevai khu-in nakpitakin ka kisik hi,” a ci hi.

2 KORIN NIHNA 7:11

Hih note’ dahna pen Pasian in a hoihlamin hong zatsak ahih manin mawk om nawn loin lungsim takpi tawh kinna na nei uh a, hoih lo hi, ci-in ka hong gente lunghimawhin siansak nopna lungsim na nei uh hi. A thupiangsate hangin lau-in lunghimawhin a hoih lote gim na pianuam uh hi. Hih thu khempeuhah note na paubaan nading uh a om lo hong suaksak hi.

Late 25:7

Topa aw, ka khangno lai-a ka mawhna le ka khialhnate ciamteh kei inla, na hoihna na ngaihsutna le na itna kip tawh kizui-in kei hong phawk in!

Mattiu 9:13

Lai Siangtho sungah, ‘Ganhing tawh biak ding ka deih kei a, migitna ka deihzaw hi,’ ci-in a genna pen bang a cihnopna ahi hiam, va kan un. Mite in a zahtak mihoihte a sam dingin a hong pai ka hi kei a, mite in a pampaih mite a sam dingin a hong pai ka hi hi,” a ci hi.

Ezekiel 16:63

Na gamtatnasa khempeuh kong maisak khit ciangin na gamtatnasa khempeuh na phawkkik ding a, maizum lua-in cih nading mel thei loin na om ding hi, Topa Pasian in ci hi,” a hong ci hi.

Isaiah 1:18

Topa in hih bangin ci hi: “Tu-in hong pai unla, thu kikumkhawm ni. Na mawhnate uh puansan a bat hangin vuk bangin hong ngo ding hi. Na mawhnate uh si bangin a san hangin tuumul bangin hong kang ding hi.

Luka 17:12

Khuaneu khatah a lut dektak laitakin miphak sawm in a dawntuah uh hi. Jesuh tawh a kigamla munah ding uh a,

Daniel 9:5

“Kote ka hih uhleh ka gilo uh a, mawh khinin ka khial khin uh hi. Na hong sawlna bang ka mang kei uh a, na thupiakna le na thukhamte ka taisan khin uh hi.

Late 130:7

Israel aw, Topa muang in. Bang hang hiam cih leh Topa’ itna kip tawntungin, hong honkhia nuam tawntung hi.

Late 119:41

Topa aw, na ciamna bangin na itna kip, na hotkhiatna kei tungah hong tungsak in.

Late 106:6

Ka pu ka pate uh a kipan kote ka khial khin uh hi. Mawhna ka bawl khin uh a, ka gilo gamtat khin uh hi.

Late 40:12

Bang hang hiam cih leh a malin simzawh loh ding siatna tampite in kei hong umcih a, khua a hong musak thei lo zah dong dingin ka mawhna thaman ka thuak khinta hi. Amaute ka sam mal sangin tamzaw uh a, ka lung in a lel ta hi.

2 KHANG TANGTHU NIHNATE 33:23

A pa Manasseh a kiniamkhiat bangin Topa’ mai-ah amah kiniamkhiat lo a, hih Amon in mawhna tam piangsak semsem hi.

2 KHANG TANGTHU NIHNATE 33:19

Tua ciangin ama thungetna, le ama kutna Pasian in a sanna, le ama khialhna le a cihtak lohna khempeuh, le amah a kiniamkhiat ma-in mual dawna biakpiaknate bawlin Asherah-te le milim dangte a koihna munte thu, Thumute’ Khang Tangthu sungah kigelh hi.

2 SAMUEL NIHNA 12:13

David in hih thu a zak ciangin Nathan kiangah, “Topa’ tungah ka khial khin hi,” a ci hi. Tua ciangin Nathan in David kiangah, “Topa in zong na khialhna hong maisak khinzo hi; nang na si kei ding hi.

Isaiah 66:2

Hih nate khempeuh keima bawlsa ahih manin hih nate khempeuh keima-a’ ahi hi, Topa in ci hi. Ahih hangin kiniamkhiatin, lungsim a kitamzan mipa, keima thu-ah lau-in a ling kelkel pa, keima deih mipa ahi hi.

Mattiu 6:5

“Note in thu na nget uh ciangin mite’ muh theih dingin a kineihkhem mite in kikhopna innsung le kongzing lamka lai-ah a ngetnop se uh bangin na gamta kei un. Tua bangin a gamtate in thaman a ngah khinta ahihna uh limtakin phawk un.

Mattiu 10:3

Filip le Bartholomew, Thomas le siahdongpa Matthai, Alfeas’ tapa James, Thaddeas,

Marka 11:25

Thungen dingin na din uh ciangin midang tungah na hehna uh a om khat peuhpeuh maisak un; tua hileh vantungah a om na Pa un note’ mawhna hong maisak ding hi.

Luka 22:41

Tua ciangin amaute kiang panin suanglot khat tan bang pailai a, khukdinin thu ngen a,

Paikhiatna 33:10

Puanbuk kongkhakah meii khuam a ding a muh uh ciangin a milipin a puanbuk kong ciat uhah mi khempeuh dingto-in kun uh hi.